ឯកឧត្តមរដ្ឋលេខាធិការ អុឹម សុីថុល អញ្ជេីញដឹកនាំកិច្ចប្រជុំលើការងារនីតិកម្មនៃក្រសួងកសិកម្ម រុក្ខាប្រមាញ់ និងនេសាទ

ចេញ​ផ្សាយ​ ៨ កញ្ញា ២០២៥ 1051

នៅព្រឹកថ្ងៃទី៨ ខែកញ្ញា ឆ្នាំ២០២៥ ឯកឧត្តម អុឹម ស៊ីថុល រដ្ឋលេខាធិការប្រចាំការ បានដឹកនាំកិច្ចប្រជុំលើការងារនីតិកម្មនៃក្រសួងកសិកម្ម រុក្ខាប្រមាញ់ និងនេសាទ ដោយមានការចូលរួមពីថ្នាក់ដឹកនាំទទួលបន្ទុក និងតំណាងគ្រប់អង្គភាពក្រោមឱវាទ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។

ក្នុងកិច្ចប្រជុំនេះ បានពិភាក្សាលើការងារតាក់តែងនិងវិសោធនកម្មច្បាប់ពាក់ព័ន្ធវិស័យកសិកម្ម ព្រមទាំងការកសាងលិខិតបទដ្ឋានគតិយុត្តក្រោមច្បាប់ពាក់ព័ន្ធវិស័យកសិកម្ម ជាអាទិ៍៖ ច្បាប់ស្ដីពីព្រៃឈើ ច្បាប់ស្ដីពីជលផល ច្បាប់ស្ដីពីការគ្រប់គ្រងពូជដំណាំនិងសិទ្ធអ្នកបង្កាត់ពូជដំណាំ ច្បាប់ស្តីពីការគ្រប់គ្រងថ្នាំកសិកម្មនិងជីកសិកម្ម ច្បាប់ស្ដីពីសហគមន៍កសិកម្ម ច្បាប់ស្ដីពីសុខភាពសត្វនិងផលិតកម្មសត្វ និងច្បាប់ស្ដីពីការការពាររុក្ខជាតិនិងភូតគាមអនាម័យ។

ឯកឧត្តមរដ្ឋលេខាធិការ បានណែនាំឱ្យនាយកដ្ឋាននីតិកម្ម សហការជាមួយអង្គភាពជំនាញពាក់ព័ន្ធក្រោមឱវាទក្រសួងដើម្បីបំពេញការងារឱ្យបានរលូនលើការជំរុញរៀបចំ កសាងផែនការសកម្មភាព គម្រោងអភិវឌ្ឍន៍លើសេចក្ដីព្រាងច្បាប់ និងលិខិតបទដ្ឋានគតិយុត្តក្នុងវិស័យកសិកម្ម៕