ព័ត៌មានផ្សេងៗទៀត
ឯកឧត្តមបណ្ឌិត អ៊ុក រ៉ាប៊ុន ជួបពិភាក្សា ជាមួយលោក Mi-Ho, Jon អគ្គនាយកនៃមជ្ឈមណ្ឌលធុរកិច្ចកូរ៉េ ប្រចាំនៅរាជធានីភ្នំពេញ
ចេញផ្សាយ ២៣ មករា ២០១៨ 2474
នៅថ្ងៃទី ១៧ ខែ ធ្នូ ឆ្នាំ ២០១៣ ចាប់ពីម៉ោង ៩ ដល់ម៉ោង ៩ និង ៥០ នាទីព្រឹក ឯកឧត្ដមបណ្ឌិត អ៊ុក រ៉ាប៊ុន រដ្ឋ មន្ដ្រីក្រសួងកសិកម្ម រុក្ខាប្រមាញ់ និងនេសាទបានអនុញ្ញាតជូន លោក Mi-Ho, Jon អគ្គនាយកនៃមជ្ឈមណ្ឌលធុរកិច្ចកូរ៉េ ប្រចាំនៅ រាជធានីភ្នំពេញ និងសហការី ៣ នាក់ ក្នុងនាម Korea Trade-Investment Promotion Agency, KOTRA ចូលជួបសម្ដែងការ គួរសម និងពិភាក្សាការងារ នៅទីស្ដីការក្រសួង ។
លោក Mi-Ho, Jon បានគោរពថ្លែងអំណរគុណជូនឯកឧត្ដមរដ្ឋមន្ដ្រី ចំពោះការផ្ដល់ឱកាសដ៏មានតម្លៃ ដើម្បីទទួលជួប សវនាការ និងសម្ដែងនូវក្ដីអបអរសាទរចំពោះការចូលកាន់ដំណែងរបស់ឯកឧត្ដមរដ្ឋមន្ដ្រី ។ បន្ទាប់មក លោក និងសហការីបាន ជម្រាបអំពីគោលបំណងនៃជំនួបគឺគោរពរាយការណ៍អំពីគោលគំនិត វឌ្ឍនភាព និងកិច្ចការគ្រោងអនុវត្ដបន្ដ ទាក់ទងនឹងគម្រោង បង្កើតកម្រងឧស្សាហកម្មស្រូវ អង្ករ (Proposed Rice Industry Cluster Project, RICE) ដែលមានគោលបំណង ជួយកែលម្អ និងពង្រឹងខ្សែសង្វាក់ផលិតកម្ម និងគ្រប់គ្រងស្រូវអង្ករ សំដៅធ្វើឱ្យកម្ពុជាផលិតបានស្រូវអង្ករច្រើន ប្រកបដោយគុណភាព ស្របតាម តម្រូវការទីផ្សារអន្ដរជាតិ ។ មុននឹងផ្ដើមអនុវត្ដ ភាគីកូរ៉េបានចំណាយពេល ៨ ខែ ដើម្បីសិក្សា ហើយគ្រោងសហការជាមួយក្រសួង ដើម្បីរៀបចំធ្វើសិក្ខាសាលាស្ដីពីគម្រោងនេះ នៅថ្ងៃទី ២០ ខែ ធ្នូ ឆ្នាំ ២០១៣ នៅរាជធានីភ្នំពេញ ។
គួរបញ្ជាក់ថា KOTRA មាន ប្រវត្ដិធ្វើសកម្មភាពដើម្បីគាំទ្រក្រុមហ៊ុនកូរ៉េ និងក្រុមហ៊ុនអន្ដរជាតិជាង ៥០ ឆ្នាំ ហើយដោយពិនិត្យឃើញអំពីគោលនយោបាយថ្មី របស់រដ្ឋាភិបាលកូរ៉េ សំដៅជួយអភិវឌ្ឍប្រទេសកម្ពុជា KOTRA មានបំណងអនុវត្ដគម្រោងនេះ ដោយសហការ ជាមួយក្រុមហ៊ុន កូរ៉េ និងក្រុមហ៊ុនក្នុងស្រុកមួយចំនួន ដោយប្រើប្រាស់ទីកន្លែងតូចដើម្បីអនុវត្ដបង្ហាញសកម្មភាព និងបច្ចេកវិទ្យាសមស្របនានា ចាប់ ពីផលិតកម្ម រហូតដល់ការកែច្នៃ ដើម្បីទទួលបានអង្ករប្រមាណ ១០,០០០ តោន/ឆ្នាំ សម្រាប់នាំចេញ ដោយប្រើប្រាស់ថវិកា ODA ពីរដ្ឋាភិបាលកូរ៉េ ។ ក្នុងនោះ គេមានគម្រោងរៀបចំឱ្យមានមជ្ឈមណ្ឌលសម្ងួត និងទុកដាក់ ។ គេបានរកឃើញថាកម្ពុជាមាន លក្ខខណ្ឌធម្មជាតិយ៉ាងល្អប្រសើរសម្រាប់ផលិតកម្មស្រូវ ហើយអង្ករកម្ពុជាមានគុណភាពយ៉ាងល្អ រហូតដល់ទទួលបានចំណាត់ថ្នាក់ លេខ ១ ដែលជាអំណោយផលដ៏ប្រសើរសម្រាប់ដណ្ដើមបានទីផ្សារអន្ដរជាតិ ។ កិច្ចការដែលគួរយកចិត្ដទុកដាក់គឺ ជួយពង្រឹងបន្ថែម នូវកិច្ចប្រតិបត្ដិការនានាក្នុងខ្សែសង្វាក់ផលិតកម្ម និងតម្លៃ ដោយធ្វើការបណ្ដុះបណ្ដាល ឬអភិវឌ្ឍធនធានមនុស្ស ហើយបញ្ចូលមកប្រើ ប្រាស់នូវបច្ចេកវិទ្យាទំនើប ព្រមទាំងកែលម្អហេដ្ឋារចនាសម្ព័ន្ធនានា ដើម្បីជំរុញបង្កើនទិន្នផល ភាពសុទ្ធខាងពូជ សមត្ថភាពស្រោច ស្រព អត្រាអង្ករ និងអត្រាអង្ករដើមដែលកិនបាន ទន្ទឹមគ្នានឹងការកាត់បន្ថយការចំណាយសម្រាប់ផលិតកម្ម ការគ្រប់គ្រង ការកិន បម្លែង ការដឹកជញ្ជូន សេវាកម្មរដ្ឋបាល ។ល។ ក្នុងចំណោមអ្នកពាក់ព័ន្ធនានា មានធនាគារមួយឈ្មោះ Korea Exim Bank បាន ចាប់អារម្មណ៍ និងចូលរួម ហើយកំពុងរៀបចំរបាយការណ៍ស្ដីពីលទ្ធផលសម្រេចបានជូននាយករដ្ឋមន្ដ្រីរបស់គេ ។
ឯកឧត្ដមរដ្ឋមន្ដ្រីបានថ្លែងអំណរគុណដល់ថ្នាក់ដឹកនាំ និងមន្ដ្រី KOTRA ដែលបានផ្ដួចផ្ដើមគំនិតអនុវត្ដគម្រោងខាងលើ ដែលសមស្របជាខ្លាំងជាមួយនឹងស្ថានភាពជាក់ស្ដែងនៅកម្ពុជា ជាពិសេសដើម្បីធ្វើឱ្យសម្រេចនូវគោលនយោបាយរបស់រាជរដ្ឋា ភិបាល ក្នុងការបង្កើនផលិតកម្មស្រូវ និងនាំចេញអង្ករ។ ឯកឧត្ដមរដ្ឋមន្ដ្រីបានបង្ហាញនូវឆន្ទៈគាំទ្រ និងចូលរួមសហប្រតិបត្ដិការ ជម្រាបជូនភាគីភ្ញៀវអំពីវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា (CARDI) ដែលមានភាពសមស្របសម្រាប់ទទួលសហ ការអនុវត្ដកិច្ចការនេះ និងសម្ដែងនូវក្ដីសង្ឃឹមយ៉ាងមុតមាំថាកិច្ចសហប្រតិបត្ដិការនេះ ជាពិសេសការនាំមកប្រើប្រាស់នូវបច្ចេកវិទ្យា ទំនើប និងការអភិវឌ្ឍធនធានមនុស្ស នឹងផ្ដល់នូវលទ្ធផលយ៉ាងល្អប្រសើរ ។ យើងត្រូវសហការរួមគ្នាជាមួយក្រសួង-ស្ថាប័នពាក់ព័ន្ធ និងវិស័យឯកជនផងដែរ។ ទន្ទឹមនឹងនេះក៏ត្រូវគិតគូរអំពីការកំណត់តំបន់គោលដៅឱ្យបានច្បាស់លាស់ ផ្សារភ្ជាប់ទៅនឹងសហគមន៍អភិ វឌ្ឍកសិកម្មនិងការអនុវត្ដកសិកម្មតាមកិច្ចសន្យាផងដែរ។
ជំនួប និងការពិភាក្សាការងារបានប្រព្រឹត្ដទៅប្រកបដោយបរិយាកាសស្និទ្ធស្នាល និងកិច្ចសហប្រតិបត្ដិការខ្ពស់ ។
