ព័ត៌មានផ្សេងៗទៀត
សេចក្តីជូនដំណឹងស្តីពីជម្ងឺផ្តាសាយជ្រូក
ចេញផ្សាយ ១៥ មករា ២០១៨ 5445
ក្រសួងកសិកម្មរុក្ខាប្រមាញ់ និងនេសាទ សូមប្រកាសជូនដំណឹងជាសាធារណៈដល់ម្ចាស់កសិដ្ឋាន អាជីវករអ្នកចិញ្ចឹមជ្រូក ព្រមទាំងប្រជាពលរដ្ឋនៅក្នុងព្រះរាជាណាចក្រកម្ពុជាឱ្យបានជ្រាបថា នាពេលថ្មីៗនេះតាមរបាយការណ៍របស់អង្គការសុខភាពពិភពលោក (WHO) បានឱ្យដឹងថា នៅប្រទេសម៉ិកស៊ីក និងសហរដ្ឋអាមេរិក មានករណីផ្ទុះ និងឆ្លងរាលដាលជម្ងឺផ្តាសាយជ្រូក ដែលជម្ងឺនេះបានឆ្លងទៅមនុស្សបណ្តាលឱ្យមានមនុស្សឈឺ និងស្លាប់ ។
ដោយឡែកនៅព្រះរាជាណាចក្រកម្ពុជា រហូតមកទល់ពេលនេះ ពុំទាន់មានការផ្ទុះជម្ងឺផ្តាសាយជ្រូកនេះនៅឡើយទេ។ ក្នុងស្មារតីយកចិត្តទុកដាក់ និងត្រៀមលក្ខណៈទុកជាមុននោះ ក្រសួងកសិកម្មរុក្ខាប្រមាញ់ និងនេសាទ សូមជូនដំណឹង និងជម្រាបជូននូវព័ត៌មានវិទ្យាសាស្រ្តស្តីពីជម្ងឺផ្តាសាយជ្រូក ដើម្បីជូនជ្រាប និងត្រៀមចូលរួមបង្ការទប់ស្កាត់ការចម្លងជម្ងឺជាមុនដូចតទៅ៖
១- រោគសញ្ញានៃជម្ងឺផ្តាសាយជ្រូក
ជម្ងឺផ្តាសាយជ្រូកបង្កឡើងដោយវីរុសប្រភេទអា (Virus Type A) នៃអនុប្រភេទ H1N1។ ជម្ងឺនេះ រាតត្បាតចំពោះសត្វជ្រូកគ្រប់វ័យ ដែលមានរោគសញ្ញាដូចខាងក្រោម៖
- ជ្រូកមិនស៊ីចំណី ឡើងកំដៅ គ្រុន ហៀរសំបោរ ហូរទឹកភ្នែក និងដេកស្ងៀមមិនធ្វើចលនា
- ក្អក កណ្តាស់ ពិបាកដកដង្ហើម ស្ទះដង្ហើម ភ្នែកក្រហម រលាកសួត ហើមសួត
- អត្រាស្លាប់ជ្រូកមានកំរិតទាប ។
២- ការចម្លងនៃជម្ងឺផ្តាសាយជ្រូក
ជម្ងឺផ្តាសាយជ្រូកឆ្លងតាមរយៈការប៉ះពាល់ផ្ទាល់រវាង៖
- ជ្រូកឈឺ ទៅជ្រូកគ្មានជម្ងឺ
- ជ្រូកឈឺ ទៅមនុស្ស
- សម្ភារៈ ឧបករណ៍ មធ្យោបាយដឹកជញ្ជូន ដែលមានវីរុសឆ្លងទៅជ្រូក និង មនុស្ស ។
សូមជម្រាបជូនថា ជម្ងឺផ្តាសាយជ្រូកនេះមិនឆ្លងតាមរយៈការបរិភោគសាច់ជ្រូកដែលបានចម្អិនល្អនោះទេ។ ទន្ទឹមនឹងនេះ ម្ចាស់កសិដ្ឋាន អ្នកចញ្ចឹមជ្រូក និងអាជីវករ ព្រមទាំងប្រជាពលរដ្ឋត្រូវចូលរួមតាមដានសុខភាពជ្រូកជាប្រចាំ ។ ក្នុងករណីពិនិត្យឃើញថាជ្រូកមានរោគសញ្ញាដូចបានជម្រាបជូនខាងលើ សូមមេត្តារាយការណ៍ ជាបន្ទាន់មកភ្នាក់ងារសុខភាពសត្វភូមិ អាជ្ញាធរមូលដ្ឋាន មន្ត្រីបសុពេទ្យដែលនៅជិតបំផុត ឬ តាមរយៈទូរស័ព្ទលេខ ០១២ ៨៣៣ ៧៩៥ ឬ ០១២ ២១៤ ៩៧០ ។
ទទួលបានសេចក្តីជូនដំណឹងនេះ ក្រសួងកសិកម្មរុក្ខាប្រមាញ់ និងនេសាទ សង្ឃឹមយ៉ាងមុតមាំថា បងប្អូនសាធារណជនទាំងអស់រក្សាបាននូវជំនឿទុកចិត្ត និងផ្តល់កិច្ចសហការល្អជាមួយមន្ត្រីជំនាញគ្រប់លំដាប់ថ្នាក់ជាពុំខានឡើយ ។
