ព័ត៌មានផ្សេងៗទៀត
ចុះពិនិត្យស្ថានភាពស្រូវវស្សានៅខេត្តកែប
ចេញផ្សាយ ១៧ មករា ២០១៨ 3517
ឯកឧត្ដមបណ្ឌិតច័ន្ទ សារុន រដ្ឋមន្រ្ដីក្រសួងកសិកម្ម រក្ខាប្រមាញ់ និងនេសាទ និងសហការី បានអញ្ជើញចុះទៅពិនិត្យស្ថានភាព ស្រូវវស្សា និងជួបសំណេះសំណាល ជាមួយកសិករ១០០គ្រួសារនៅ ភូមិចំការបី ឃុំពងទឹក ស្រុកដំណាក់ចង្អើរ កាលពីថ្ងៃទី ៣១ ខែតុលា ឆ្នាំ២០១០ ។
យោងតាមរបាយការណ៏ របស់មន្ទីរកសិកម្មខេត្ដកែប បានឱ្យដឹងថាខេត្ដកែបឆ្នាំនេះ មិនមាន ផលប៉ះពាល់ពីគ្រោះរាំងស្ងួត ទឹកជំនន់ និងសត្វល្អិតដូចឆ្នាំមុននោះទេ។ ជារួមស្ថានភាពស្រូវ មានការលូតលាស់ បានល្អជាងឆ្នាំទៅ ហើយប្រជាពលរដ្ឋភាគច្រើនក៏មានការផ្លាស់ប្ដូរ ងាកមកប្រើពូជស្រូវស្រាល និងស្រូវកណ្ដាលវិញ រីឯស្រូវធ្ងន់អនុវត្ដប្រមាណតែ៩ភាគរយនៃផ្ទៃដីដាំដុះប៉ុណ្ណោះ។
ឯកឧត្ដមបន្ដថាថ្វីត្បិតតែភ្លៀង មានភាពរអាក់រអួល ពីដើមរដូវ តែចុងរដូវធ្លាក់រាយប៉ាយបានល្អ។ ចំពោះការងារដាំដុះស្រូវសម្រេច បានតាមផែនការ១០០ភាគរយស្មើនឹង៣.០៨០ហិកតា។
មានប្រសាសន៏នាឱកាសនោះ ឯកឧត្ដមបណ្ឌិតច័ន្ទ សារុន បានថ្លែនូវការកោតសរសើរ និងអបអរសាទរចំពោះ ការអនុវត្ដន៏សម្រេបបាន១០០ភាគរយ តាមផែនការក្រសួងដាក់ចុះ។ ឯកឧត្ដមបានបន្ដថា ជារួមស្ថានភាពដំណាំស្រូវវស្សាឆ្នាំនេះ នៅទូទាំងប្រទេសមានការលូតលាស់ល្អ ហើយការអនុវត្ដន៏បានលើសឆ្នាំមុន គឺសម្រេចបានទូទាំងប្រទេស២.៣៩០.៤៧២ហិកតា ស្មើ ១០៤,៨៨ភាគរយនៃផែនការ ២.២៧៩.១៨០ហិកតា។
ក្រៅពីការសាទរឯកឧត្ដមរដ្ឋមន្រ្ដី បានសំណូមពរ ដល់កសិករទាំងអស់ថា សូមកុំត្រេកអរ និងសប្បាយភ្លេចខ្លួន ត្រូវបន្ដការយកចិត្ដទុកដាក់ តាមដានការព្យាករណ៏អាកាសធាតុ ឱ្យបានជាប់ជាប្រចាំ ដើម្បីបញ្ចៀស នូវគ្រោះថ្នាក់ជាយថាហេតុ។ តាមដាន និងចុះអង្កេតជាក់ស្ដែងឃើញថា ការប្រើប្រាស់ពូជមិនសុទ្ធ គ្មានប្រភពច្បាស់លាស់ គួរងាកទៅរកពូជសុទ្ធល្អ និងមាន ប្រភពច្បាស់លាស់។
ត្រូវចុះមើលថែភ្លឺស្រែ និងពង្រឹងភ្លឺឱ្យបានរឹងមាំប្រយោជន៏រក្សាទឹកទុកប្រើប្រាស់នាចុងរដូវ ។ សូមជៀសវាងកុំបូមឬបាចស្រះ ត្រពាំង ប្រឡាយ និងប្រភពទឹកនានា ដើម្បីចាប់ត្រីផ្ទុយទៅវិញ ត្រូវរួមគ្នាពង្រឹងទំនប់ឱ្យបានរឹងមាំធានាតម្កល់ទឹកទុកប្រើប្រាស់ និងបញ្ចៀសការខ្វះទឹកជាយថាហេតុ ។ សូមកុំទុកដីឱ្យនៅទំនេរពេលចប់ដំណាំស្រូវត្រូវផ្ទេរដីទៅដាំដំណាំចម្ការវិញដូចពាក្យលោកថា “ រពឹសដៃផ្ទៃឆ្អែត “ ។
ឯកឧត្ដមក៏បានសំណូមពរឱ្យមន្រ្ដីមន្ទីរកសិកម្មទាំងអស់ឧស្សាហ៏ចុះមូលដ្ឋានឱ្យបានញឹកញាប់ ដើម្បីក្ដាប់បញ្ហាពិតប្រាកដ និងជួយអន្ដរាគមន៏បានទាន់ពេលវេលា និងមានប្រសិទ្ធភាព៕
