ព័ត៌មានផ្សេងៗទៀត
ឯកឧត្តម ឌិត ទីណា និងក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ នាំយកស្បៀងជូនជនភៀសសឹកបានជាង ៧០០០គ្រួសារ ក្នុងរយៈពេលប្រចាំការពេញមួយសប្ដាហ៍
ចេញផ្សាយ ៣១ កក្កដា ២០២៥ 1173
ចាប់តាំងពីការផ្ទុះអាវុធនៅថ្ងៃទី ២៤ កក្កដា ឆ្នាំ២០២៥ ឯកឧត្តមរដ្ឋមន្ត្រី ឌិត ទីណា បានអញ្ជើញដឹកនាំក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ មកប្រចាំការត្រៀមអន្តរាគមន៍គាំពារថែទាំប្រជាពលរដ្ឋ និងគ្រួសារកងទ័ព ដែលបានភៀសខ្លួនមកទីតាំងសុវត្ថិភាពក្នុងក្រុង-ស្រុកទាំង៩ របស់ខេត្តបន្ទាយមានជ័យ។
នៅស្រុកភ្នំស្រុក ស្រុកថ្មពួក និងស្រុកព្រះនេត្រព្រះ ឯកឧត្តមរដ្ឋមន្ត្រី បានសួរសុខទុក្ខ និងនាំយកស្បៀងជូនប្រជាពលរដ្ឋ និងគ្រួសារកងទ័ព ដែលមួយចំនួនធំបានភៀសខ្លួនចេញពីជុំវិញសមរភូមិសឹកប្រាសាទតាមាន់ធំ និងប្រាសាទតាក្របី ក្នុងស្រុកបន្ទាយអំពិល ខេត្តឧត្តរមានជ័យ។
ឯកឧត្តមរដ្ឋមន្ត្រីក៏បានសួរសុខទុក្ខពុកម៉ែបងប្អូនដែលបានភៀសខ្លួនពីតំបន់ព្រំដែនខេត្តបន្ទាយមានជ័យផ្ទាល់ មករកទីតាំងសុវត្ថិភាពនៅស្រុកអូរជ្រៅ ស្រុកស្វាយចេក ស្រុកមង្គលបូរី និងក្រុងសិរីសោភ័ណផងដែរ។
ជានិច្ចកាល ឯកឧត្តមរដ្ឋមន្ត្រី បានពាំនាំការផ្ដាំផ្ញើសួរសុខទុក្ខ និងសេចក្តីនឹករលឹកពីសំណាក់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ហើយបានបន្តចាត់ចែងការចែកចាយអំណោយបរិច្ចាគដោយសប្បរសជនជូនពុកម៉ែបងប្អូន និងកងកម្លាំងជួរមុខ។
បន្ថែមពីលើការចុះសួរសុខទុក្ខពុកម៉ែបងប្អូន ឯកឧត្តមរដ្ឋមន្ត្រីបានតាមដានស្ថានភាពតំបន់ព្រំដែនខេត្តបន្ទាយមាជ័យយ៉ាងដិតដល់ ព្រមទាំងបានចុះពិនិត្យស្ថានភាពផ្ទាល់នៅច្រកទ្វារព្រំដែនអន្តរជាតិប៉ោយប៉ែតផងដែរ។
ក្នុងរយៈពេលប្រចាំការពេញមួយសប្តាហ៍នេះក្រុមការងាររាជរដ្ឋាភិបាល និងរដ្ឋបាលខេត្ត បាននាំយកស្បៀងជូនពុកម៉ែបងប្អូនភៀសសឹកបានជាង ៧០០០ គ្រួសារ។ ការផ្ដល់សេវាគាំពារនិងការចែកស្បៀងនឹងបន្តរហូតដល់ពុកម៉ែបងប្អូនអាចវិលត្រឡប់ទៅផ្ទះសម្បែងវិញ នៅពេលស្ថានភាពតំបន់ព្រំដែនមានស្ថិរភាព៕
