ភាពជោគជ័យនៃកម្មវិធី ASPIRE បានជំរុញឱ្យ ក្រុមអ្នកយកព័ត៌មាន របស់ IFAD សម្រេចចងក្រងផលិតវីដេអូ ដើម្បីផ្សព្វផ្សាយជូនអ្នកពាក់ព័ន្ធ និងពិភពលោកបានដឹង

ចេញ​ផ្សាយ​ ២៨ វិច្ឆិកា ២០២៥ 2421

ដោយទទួលស្គាល់ថា កម្មវិធី " ផ្សព្វផ្សាយបច្ចេកទេសកសិកម្មថ្មី ដែលធន់ទៅនឹងការប្រែប្រួលអាកាសធាតុ (Agriculture Services Programme for Innovation, Resilience and Extension, ASPIRE) " ដែលគ្រប់គ្រង និងអនុវត្តដោយក្រសួងកសិកម្ម រុក្ខាប្រមាញ់ និងនេសាទ ក្រសួងសេដ្ឋកិច្ច និងហិរញ្ញវត្ថុ ឧត្តមក្រុមប្រឹក្សាសេដ្ឋកិច្ចជាតិ (SNEC) និងគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យ នៅថ្នាក់ក្រោមជាតិ (NCDD) ពីឆ្នាំ ២០១៥ ដល់ ២០២២ សម្រេចបានជោគជ័យខ្លាំង ដោយបានរួមចំណែកបង្កើនតម្លៃទ្រព្យសម្បត្តិ ឬ ជីវភាពកសិករ ជិត ១៥ ម៉ឺនគ្រួសារ ហើយត្រូវបានរាជរដ្ឋាភិបាលកម្ពុជា ក្រសួងកសិកម្ម រុក្ខាប្រមាញ់ និងនេសាទ និងមូលនិធិអន្តរជាតិសម្រាប់អភិវឌ្ឍន៍កសិកម្ម (International Fund for Agricultural Development, IFAD) ដែលជាស្ថាប័នមួយរបស់អង្គការសហប្រជាជាតិ ចាត់ទុកថាជាកម្មវិធីដែលមានស្នាដៃដ៏ល្អ ក្រុមអ្នកយកព័ត៌មាននៃទីស្នាក់ការកណ្តាលរបស់ IFAD បានមកបំពេញបេសកកម្មនៅកម្ពុជា ពីថ្ងៃទី ២៤ ដល់ ២៨ ខែវិច្ឆិកា ឆ្នាំ២០២៥។
ក្រុមអ្នកយកព័ត៌មាននេះបានពិនិត្យលទ្ធផលផ្ទាល់ នៅ ៖ ១) សហគមន៍កសិកម្មទឹកហូតមានជ័យក្តីសង្ឃឹម ដែលស្ថិតនៅភូមិត្រពាំងក្រពើ ឃុំទឹកហូត ស្រុករលាប្អៀរ ខេត្តកំពង់ឆ្នាំង ២) សហគមន៍កសិកម្មទំនើបម្រេចមេមត់ត្បូងឃ្មុំ និងចម្ការកសិករគំរូ ដែលស្ថិតនៅភូមិត្រមូង ឃុំត្រមូង ស្រុកមេមត់ ខេត្តត្បូងឃ្មុំ និង ៣) សហគមន៍កសិកម្មអារក្សត្នោតអភិវឌ្ឍន៍ និងចម្ការស្វាយចន្ទី ដែលស្ថិតនៅភូមិគីឡូ ១០ ឃុំអារក្សត្នោត ស្រុកស្ទឹងត្រង់ ខេត្តកំពង់ចាម ហើយបានជួបសម្ភាសជាមួយ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និង ឯកឧត្តម មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ។
ក្រុមអ្នកយកព័ត៌មាននេះក៏បានថត និងផលិតខ្សែវីដេអូ សម្រាប់ចាក់បញ្ចាំងនៅក្នុងកិច្ចប្រជុំលើកទី ៤៩ របស់ក្រុមប្រឹក្សាភិបាល IFAD (ដែលមានសមាជិកជារដ្ឋមន្ត្រីក្រសួងហិរញ្ញវត្ថុ និងក្រសួងកសិកម្ម នៅក្នុងពិភពលោក) ដែលនឹងប្រព្រឹត្តទៅនៅក្នុងខែកុម្ភៈ ឆ្នាំ ២០២៦ សំដៅបង្ហាញប្រាប់ប្រទេសសមាជិកផ្សេងទៀត ឱ្យរៀនសូត្រ និងយកតម្រាប់តាម ។ ខ្សែវីដេអូនេះមានរៀបរាប់អំពី ៖ ១) ស្ថានភាពជាក់ស្តែងនៃវិស័យកសិកម្មនៅកម្ពុជា ២) យុទ្ធសាស្ត្រ និងការប្រឹងប្រែងរបស់រាជរដ្ឋាភិបាលកម្ពុជា និងក្រសួងកសិកម្ម រុក្ខាប្រមាញ់ និងនេសាទ ក្នុងការដោះស្រាយបញ្ហាអាទិភាព ៣) ផ្លែផ្កានៃកិច្ចសហប្រតិបត្តិការ ឬ ភាពជាដៃគូជាមួយ IFAD ៤) វិធីគ្រប់គ្រង និងអនុវត្តកម្មវិធី ឬ គម្រោងដ៏ល្អ និង ៥) មរតក និងប្រសិទ្ធភាពយូរអង្វែង របស់កម្មវិធី ASPIRE។
គួរបញ្ជាក់ថា កម្មវិធី ASPIRE បានប្រើប្រាស់ប្រាក់កម្ចី ដែលរាជរដ្ឋាភិបាលកម្ពុជាបានខ្ចីពី IFAD សម្រាប់កែលម្អប្រព័ន្ធផ្សព្វផ្សាយកសិកម្ម នៅកម្ពុជា ។ ដោយទទួលស្គាល់លទ្ធផល សរសើរ និងទុកចិត្ត រាជរដ្ឋាភិបាលកម្ពុជា ក្រសួងសេដ្ឋកិច្ច និងហិរញ្ញវត្ថុ ក្រសួងកសិកម្ម រុក្ខាប្រមាញ់ និងនេសាទ សហភាពអឺរ៉ុប ធនាគារវិនិយោគអឺរ៉ុប មូលនិធិបរិស្ថានសាកល (GEF) និង China-IFAD South-South and Triangular Cooperation Facility (SSTC) ក៏បានសម្រេចគាំទ្រឱ្យមានកម្មវិធី ASPIRE ជំហានទី ២  ឬ កម្មវិធី ASPIRE-AT (កម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម Agriculture Services Programme for an Inclusive Rural Economy and Agricultural Trade) ។ កម្មវិធីទី ២ នេះ កំពុងត្រូវបានអនុវត្តពីឆ្នាំ ២០២៣ ដល់ ២០៣០ ដោយផ្តោតជាសំខាន់លើការគាំទ្រកសិករ សហគមន៍កសិកម្ម អ្នកប្រមូលទិញ អ្នកកែច្នៃ និងអ្នកនាំចេញ ក្នុងការបង្កើនផលិតភាព គុណភាព និងសុវត្ថិភាពចំណីអាហារ និងការធ្វើពាណិជ្ជកម្មផលិតផលកសិកម្ម ទាំងសម្រាប់ទីផ្សារក្នុងស្រុក និងទីផ្សារអន្តរជាតិ៕