ព័ត៌មានផ្សេងៗទៀត
ថ្នាក់ដឹកនាំក្រសួងកសិកម្ម អញ្ជើញដឹកនាំក្រុមការងារជំនាញពាក់ព័ន្ធចុះត្រួតពិនិត្យ និងបង្ក្រាបបទល្មើសនេសាទ ក្នុងខេត្តសៀមរាប និងបាត់ដំបង
ចេញផ្សាយ ៦ កញ្ញា ២០២៦ 3053
នៅថ្ងៃទី៥ ខែកញ្ញា ឆ្នាំ២០២៦ ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារជំនាញ ចុះត្រួតពិនិត្យ និងបង្ក្រាបបទល្មើសនេសាទ ចាប់ពីមាត់ពាមចុងឃ្នៀស សង្កាត់ចុងឃ្នៀស ក្រុងសៀមរាប រហូតដល់ឃុំកោះជីវាំង ស្រុកឯកភ្នំ ខេត្តបាត់ដំបង។
ក្នុងប្រតិបត្តិការនេះ មានការចូលរួមពីលោក ភួង ទីណា ប្រធាននាយកដ្ឋានអធិការកិច្ចជលផល លោក មិត្រ សុខសុភក្ត្រ័ នាយអធិការដ្ឋានរដ្ឋបាលជលផលខាងត្បូងបឹងទន្លេសាប និងក្រុមអន្តរាគមន៍ថ្នាក់ជាតិទប់ស្កាត់ និងបង្ក្រាបបទល្មើសជលផលបឹងទន្លេសាប ប្រចាំស្នាក់ការកំពង់ភ្លុក ដឹកនាំដោយលោក សោម សុវណ្ណ នាយរងអធិការដ្ឋានរដ្ឋបាលជលផលខាងជើងបឹងទន្លេសាប។ លោក ធិន នីសុទ្ធី នាយខណ្ឌរដ្ឋបាលជលផលសៀមរាប ផ្នែករដ្ឋបាលជលផលចុឃ្នៀស សង្កាត់រដ្ឋបាលជលផលភ្នំក្រោម សហគមន៍នេសាទចុងឃ្នៀស ព្រមទាំងកម្លាំងកងទ័ពយោធភូមិភាគទី៤ និងយោធភូមិភាគទី៥ រដ្ឋបាលក្រុងសៀមរាប និងរដ្ឋបាលស្រុកពួក។
ចំណែកនៅឯខេត្តបាត់ដំបង ប្រតិបត្តិការនេះមានការចូលរួមពីកម្លាំងខណ្ឌរដ្ឋបាលជលផលបាត់ដំបង ផ្នែករដ្ឋបាលជលផលព្រែកទាល់ សង្កាត់រដ្ឋបាលជលផលកំពង់ប្រហុក ដឹកនាំដោយលោក ជួង សុភា នាយខណ្ឌរដ្ឋបាលជលផលបាត់ដំបង និងរដ្ឋបាលស្រុកឯកភ្នំ។
ជាលទ្ធផល ក្រុមការងារបានបង្ក្រាបចំនួន ២ករណី ដោយបានរុះរើ និងបំផ្លាញចោលឧបករណ៍នេសាទស្បៃមុង រួមមាន៖ លូស្បៃមុង ៧ខ្សែ របាំងស្បៃមុងប្រវែង ៣៥០ម៉ែត្រ ក្បាលលូ ៧គ្រឿង និងបង្គោលចំរឹង ២០០ដើម ព្រមទាំងចាក់លែងត្រីចម្រុះចំនួន ១០គីឡូក្រាម ចូលក្នុងបឹងធម្មជាតិវិញ។ ចំពោះការត្រួតពិនិត្យការនេសាទដោយឧបករណ៍លបណរ ឬរ៉ាវ ចំនួន ៧០របាំង ឃើញថា ប្រជានេសាទបានអនុវត្តត្រឹមត្រូវតាមច្បាប់ស្តីពីជលផល។
នាជំនួបសំណេះសំណាលជាមួយក្រុមការងារពាក់ព័ន្ធទាំងអស់ ឯកឧត្តមអនុរដ្ឋលេខាធិការ បានសម្តែងការកោតសរសើរចំពោះកិច្ចខិតខំប្រឹងប្រែងរបស់មន្ត្រីជលផល កងកម្លាំងប្រដាប់អាវុធ អាជ្ញាធរមូលដ្ឋាន និងសហគមន៍នេសាទ ក្នុងការការពារ និងអភិរក្សធនធានជលផល។ ឯកឧត្តមក៏បានណែនាំឱ្យបន្តពង្រឹងកិច្ចសហការរវាងសមត្ថកិច្ចពាក់ព័ន្ធ និងសហគមន៍មូលដ្ឋាន ដើម្បីទប់ស្កាត់បទល្មើសជលផល និងធានានិរន្តរភាពធនធានជលផលសម្រាប់ជំនាន់បច្ចុប្បន្ន និងអនាគត៕
