ឯកឧត្តម គី ច័ន្ទរំដួល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញបើកសន្និបាតបូកសរុបការងារកសិកម្ម ខេត្តប៉ៃលិន ឆ្នាំ២០២៣ និងលើកទិសដៅបន្តឆ្នាំ២០២៤

ចេញ​ផ្សាយ​ ២៣ មករា ២០២៤ 3175

នៅថ្ងៃ២៣ ខែមករា ឆ្នាំ២០២៤ ឯកឧត្តមគី ច័ន្ទរំដួល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញបើកសន្និបាតបូកសរុបការងារកសិកម្ម រុក្ខាប្រមាញ់ និងនេសាទ ខេត្តប៉ៃលិន ឆ្នាំ២០២៣ និងលើកទិសដៅបន្តឆ្នាំ២០២៤។

កិច្ចប្រជុំនេះ មានការចូលរួមពីអភិបាលរងខេត្ត ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តប៉ៃលិន មន្ត្រីរដ្ឋបាលស្រុក និងមន្ត្រីការិយាល័យនីមួយៗ នៃមន្ទីរកសិកម្ម រុក្ខាប្រមាញ់ និងនេសាទខេត្តប៉ៃលិន។

នាឱកាសនេះ ឯកឧត្តមគី ច័ន្ទរំដួល បានណែនាំដល់មន្ត្រីគ្រប់លំដាប់ថ្នាក់ រក្សាសាមគ្គីភាពផ្ទៃក្នុង ដើម្បីអនុវត្តការងារឲ្យបានត្រឹមត្រូវប្រកបដោយអភិបាលកិច្ចល្អ។

ឯកឧត្តមបានផ្តល់អនុសាសន៍បន្ថែមដល់មន្ទីរកសិកម្ម រុក្ខាប្រមាញ់ និងនេសាទ ខេត្តប៉ៃលិន សម្រាប់ឆ្នាំ២០២៤ ដោយត្រូវអនុវត្តឱ្យបានម៉តចត់នូវយុទ្ធសាស្ត្របញ្ចកោណដំណាក់ទី១ របស់រាជរដ្ឋាភិបាល ដែលបានកំណត់យកកម្មវិធីគោលនយោបាយអាទិភាពទី៥ និងទី៦ និងសម្របសម្រួល សហការគ្នាឱ្យបានល្អជាមួយមន្ត្រីកសិកម្មឃុំ ដែលនឹងដាក់ពង្រាយក្នុងពេលឆាប់ៗខាងមុននេះ រួមទាំងបង្កើនការយកចិត្តទុកដាក់លើបញ្ហាគ្រោះធម្មជាតិដែលបង្កដោយការប្រែប្រួលអាកាសធាតុ។

បន្ថែមពីនេះ ត្រូវពង្រឹងការគ្រប់គ្រងគុណភាពថ្នាំកសិកម្ម និងជី និងបន្តពង្រឹកការអភិរក្សជលផល ជាពិសេសត្រីមេពូជ ខិតខំជំរុញការងារវារីវប្បកម្ម ទប់ស្កាត់បទល្មើសព្រៃឈើ និងការកាប់រានដីព្រៃធ្វើកម្មសិទ្ធ ពង្រឹងសហគមន៍ព្រៃឈើ ជំរុញការរៀបចំសហគមន៍បន្លែទំនើប សហគមន៍ចិញ្ចឹមសត្វ លើកកម្ពស់ផលិតផលដំណាំឈើហូបផ្លែ និងជំរុញដំណាំឧស្សាហកម្ម៕