ព័ត៌មានផ្សេងៗទៀត
ឯកឧត្ដម អ៊ុក រ៉ាប៊ុនចុះពិនិត្យស្ថានីយ៍ដំណាំបន្លែក្បាលកោះ
ចេញផ្សាយ ២៥ មករា ២០១៨ 3258
កាលពីថ្ងៃទី២៩ ខែកញ្ញា ឆ្នាំ២០១៤នេះ ឯកឧត្ដម អ៊ុក រ៉ាប៊ុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទរួមដំណើរដោយឯកឧត្ដម ទី សុគន្ធ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងឯកឧត្ដម អស់លោកជាប្រធានអង្គភាពជំនាញ ដោយឡែកឯកឧត្ដម ជឹម សុខុន អភិបាលរងខេត្តកណ្តាលក៏បានអញ្ជើញចូលរួមត្រួតពិនិត្យលទ្ធផលការងារស្ថានីយ៍ពិសោធន៍ដំណាំបន្លែក្បាលកោះឋិតក្នុងសង្កាត់ក្បាលកោះ ខណ្ឌច្បារអំពៅ រាជធានីភ្នំពេញ។ ឯកឧត្ដម សូខនឫទ្ធិគុណប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានកសិកម្មបានមានប្រសាសន៍ថា ស្ថានីយ៍ពិសោធន៍ពូជបន្លែក្បាលកោះត្រូវបានបង្កើតឡើងនាឆ្នាំ១៩៨៥ មានតួនាទីពិសោធន៍ស្រាវជ្រាវណ និងធ្វើផលិតកម្មពូជបន្លែគ្រប់ប្រភេទដើម្បីផ្សព្វផ្សាយដល់ប្រជាកសិករ ដោយឡែកឆ្នាំ២០១៤នេះ ស្ថានីយ៍បាននឹងកំពុងអនុវត្តការងារពិសោធន៍ បន្សុតពូជ បន្សាំពូជ និងធ្វើផលិតកម្មពូជនូវពូជដំណាំបន្លែចំនួន ១៦មុខដែលជាប្រភេទដំណាំបន្លែយកស្លឹក និងយកផ្លែ។
នៅក្នុងសកម្មភាពការងារទាំងនេះ ស្ថានីយ៍មានគម្រោងការមួយចំនួននៅក្នុងការផលិតពូជដើម្បីត្រៀមចែកជូនប្រជាកសិករនៅពេលជួបប្រទេះគ្រោះធម្មជាតិទឹកជំនន់ រាំងស្ងួតជាយថាហេតុ ដោយឡែកជាទូទៅស្ថានីយ៍តែងតែធ្វើការផ្សព្វផ្សាយដល់ប្រជាកសិករតាមរយៈកម្មវិធីបណ្តុះបណ្តាលរយៈពេលខ្លីដល់ប្រជាកសិករដែលស្ម័គ្រចិត្ត និងចំណូលចិត្តដាំដំណាំបន្លែ។ ឯកឧត្ដម អ៊ុក រ៉ាប៊ុនមានប្រសាសន៍ស្ងើចសរសើរ និងវាយតម្លៃខ្ពស់ពីកិច្ចខិតខំប្រឹងប្រែងរបស់ស្ថានីយ៍ពិសោធន៍ពូជដំណាំបន្លែក្បាលកោះឋិតក្នុងបន្ទុកអគ្គនាយកដ្ឋានកសិកម្មដែលសម្រេចបាននូវសមិទ្ធិផល និងលទ្ធផលការងារគួរឲ្យកត់សំគាល់។ ឯកឧត្ដមរដ្ឋមន្ត្រីអ៊ុក រ៉ាប៊ុនមានប្រសាសន៍ផ្តល់នូវការលើកទឹកចិត្ត និងផ្តល់នូវអនុសាសន៍មួយចំនួនក្នុងន័យជម្រុញផលិតកម្មដំណាំបន្លែបន្ថែមទៀតនៅក្នុងចក្ខុវិស័យបង្កើនប្រភពចំណូលដល់កសិករផង និងរួមចំណែកកាត់បន្ថយការនាំចូលផលិតផលបន្លែពីប្រទេសជិតខាង ព្រោះកសិករយើងភាគច្រើនបច្ចុប្បន្ននេះពឹងផ្អែកតែទៅលើដំណាំស្រូវមួយមុខដោយពុំបានយកចិត្តទុកដាក់ទៅលើដំណាំបន្លែដែលផ្តល់ផលរយៈពេលខ្លី និងផ្តល់ប្រាក់ចំណូលទាន់ចិត្តថែមទៀតផង៕
