ថ្នាក់ដឹកនាំជាន់ខ្ពស់ក្រសួងកសិកម្ម អញ្ជើញដឹកនាំកិច្ចប្រជុំនិងផ្សព្វផ្សាយ «គម្រោង EMPOWER» ដើម្បីលើកកម្ពស់ជីវភាពកសិករតាមរយៈការដាំបន្លែក្នុងផ្ទះសំណាញ់ នៅស្រុកត្រាំកក់ ខេត្តតាកែវ

ចេញ​ផ្សាយ​ ២៨ កក្កដា ២០២៦ 2743

នៅថ្ងៃទី២៨ ខែកក្កដា ឆ្នាំ២០២៦ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងកិច្ចប្រជុំ និងផ្សព្វផ្សាយការអនុវត្ត «គម្រោងលើកកម្ពស់ជីវភាពប្រកបដោយប្រសិទ្ធភាពសេដ្ឋកិច្ច ដើម្បីកាត់បន្ថយភាពងាយរងគ្រោះ និងពង្រឹងភាពធន់ (EMPOWER)» នៅស្រុកត្រាំកក់ ខេត្តតាកែវ។ កិច្ចប្រជុំនេះ មានការអញ្ជើញចូលរួមពី លោក ញ៉ិប ស្រ៊ន ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត ព្រមទាំងអាជ្ញាធរដែនដីថ្នាក់ស្រុក-ឃុំ និងមន្ត្រីជំនាញពាក់ព័ន្ធជាច្រើនរូប។ 
កិច្ចប្រជុំនេះរៀបចំឡើងក្នុងគោលបំណង៖ ១. ពិនិត្យវឌ្ឍនភាពការងារដែលសម្រេចបានកន្លងមក។ ២. ចុះស្រង់ទិន្នន័យ និងជ្រើសរើសគ្រួសារកសិករគោលដៅ (គ្រួសារក្រ១, ក្រ២ និងគ្រួសារងាយរងហានិភ័យ) ឱ្យបានគ្រប់ជ្រុងជ្រោយ និងចំគោលដៅតាមផែនការដែលបានកំណត់។ 
នាឱកាសនោះ ឯកឧត្តម រដ្ឋលេខាធិការ បានផ្តល់អនុសាសន៍ណែនាំដល់ក្រុមការងារក្រសួង មន្ទីរជំនាញ និងអាជ្ញាធរឃុំ-សង្កាត់ពាក់ព័ន្ធទាំងអស់ ត្រូវបន្តសហការគ្នាយ៉ាងជិតស្និទ្ធ ដើម្បីក្តាប់ឱ្យបានច្បាស់ និងឆ្លើយតបបានទាន់ពេលវេលាចំពោះតម្រូវការជាក់ស្តែងរបស់ប្រជាកសិករ។ ជាមួយគ្នានេះ ឯកឧត្តមបានជំរុញឱ្យក្រុមការងារបន្តចុះតាមដាន ពិនិត្យព័ត៌មាន និងដឹកនាំការងារផ្ទាល់ដល់ខ្នងផ្ទះកសិករ ដើម្បធានាឱ្យការគ្រប់គ្រង និងការអនុវត្តគម្រោងទទួលបានប្រសិទ្ធភាពខ្ពស់៕