កិច្ចប្រជុំពិភាក្សា និងផ្តល់ធាតុចូលលើរបាយការណ៍វិភាគគោលនយោបាយពាក់ព័ន្ធនឹងការបើកផ្លូវឱ្យការជំរុញម៉ាស៊ីនកសិកម្មអគ្គិសនីនិងវៃឆ្លាត ប្រកបដោយបរិយាបន្ន (Enabling Inclusive Electric and Smart Agricultural Mechanisation in Cambodia)

ចេញ​ផ្សាយ​ ៦ តុលា ២០២៦ 143

ព្រឹកថ្ងៃទី៦ ខែតុលា ឆ្នាំ២០២៦ នៅអគ្គនាយកដ្ឋានក្សេត្រសាស្ត្រ លោក ឃុន កក្កដា អគ្គនាយករងទទួលបន្ទុករួមអគ្គនាយកដ្ឋានក្សេត្រសាស្រ្ត បានដឹកនាំកិច្ចប្រជុំពិភាក្សា និងផ្តល់ធាតុចូលលើរបាយការណ៍វិភាគគោលនយោបាយពាក់ព័ន្ធនឹងការបើកផ្លូវឱ្យការជំរុញម៉ាស៊ីនកសិកម្មអគ្គិសនីនិងវៃឆ្លាត ប្រកបដោយបរិយាបន្ន (Enabling Inclusive Electric and Smart Agricultural Mechanisation in Cambodia) ។ កិច្ចប្រជុំនេះមានការចូលរួមពីលោកអគ្គនាយករងនៃអគ្គនាយកដ្ឋានក្សេត្រសាស្រ្ត លោកប្រធាន អនុប្រធាននាយកដ្ឋានជំនាញពាក់ព័ន្ធ លោកអនុប្រធានលេខាធិការដ្ឋាន និងមន្រ្តីជំនាញនៃអគ្គនាយកដ្ឋានក្សេត្រសាស្រ្ត សរុបចំនួន ២០នាក់។ 

តាមរយៈបទបង្ហាញដោយលោក យន ទ្រី អគ្គនាយករងនៃអគ្គនាយកដ្ឋានក្សេត្រសាស្ត្រ របាយការណ៍វិភាគគោលនយោយបាយនេះមានសារៈសំខាន់ក្នុងការផ្តល់ធាតុចូលសម្រាប់រៀបចំគោលនយោបាយផ្អែកលើភស្តុតាង និងទិន្នន័យ (evidence-based policy making) ដែលចូលរួមកាត់បន្ថយថ្លៃដើមផលិតកម្ម កាត់បន្ថយការបាត់បង់ និងជំរុញយន្តូបនីយកម្មកសិកម្មអគ្គិសនីនិងវៃឆ្លាត។ ការសិក្សានេះក៏បានដកស្រង់បទពិសោធន៍ជាក់ស្តែងពីប្រទេសមួយចំនួនផងដែរ ដូចជា បង់ក្លាដេស ឥណ្ឌា វៀតណាម ថៃ ហ្វីលីពីន និងចិន។

អង្គប្រជុំបានស្វែងយល់អំពីលទ្ធផលនៃរបាយការណ៍វិភាគគោលនយោបាយនេះ និងបានផ្តល់យោបល់យ៉ាងផុសផុល ដើម្បីកែលម្អសេចក្តីព្រាងរបាយការណ៍នេះឱ្យកាន់តែមានភាពគ្រប់ជ្រុងជ្រោយ។ ការជំរុញការប្រើប្រាស់គ្រឿងយន្តអគ្គិសនីនិងឆ្លាតវៃនេះ ជាជម្រើសថ្មីមួយសម្រាប់កសិករ ក្នុងកាលៈទេសៈនៃភាពមិនប្រកដប្រជានៃភូមិសាស្ត្រនយោបាយ និងការកើនឡើងតម្លៃប្រេងជាសកល។