ឯកឧត្តមបណ្ឌិត យ៉ង សាំង កុមារ និងលោក Bryan Fornari អញ្ជើញជាអធិបតី​ភាព​​ក្នុងពិធីបើកវគ្គបណ្តុះបណ្តាល ស្តីពី «ខ្សែច្រវាក់ផលិតកម្មដំណាំ​ស្វាយ​ចន្ទី និងម្រេច» ដល់មន្រ្តីកសិកម្មឃុំ-សង្កាត់ និងកសិករបង្គោល មកពីខេត្តកំពត ត្បូងឃ្មុំ និងខេត្តកែប

ចេញ​ផ្សាយ​ ១២ សីហា ២០២៥ 706

នៅថ្ងៃទី១២ ខែសីហា ឆ្នាំ២០២៥ ឯកឧត្តមបណ្ឌិត យ៉ង សាំង កុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងលោក Bryan Fornari ប្រធានផ្នែកសហប្រតិបត្តិការនៃសហភាពអឺរុបនៅកម្ពុជា បានអញ្ជើញជា​អធិបតីភាពក្នុងពិធីបើកវគ្គបណ្តុះបណ្តាលស្តីអំពី «ខ្សែច្រវាក់ផលិតកម្ម​ដំណាំស្វាយចន្ទី និងម្រេច» ដល់មន្រ្តីកសិកម្មឃុំ និងកសិករបង្គោល ដែលមកពីខេត្តកំពត ត្បូងឃ្មុំ និងខេត្តកែប។

វគ្គបណ្តុះបណ្តាលដែលរៀបចំធ្វើឡើងនៅខេត្តកំពត មានការអញ្ជេីញចូលរួមផងដែរពីសំណាក់​ ឯកឧត្តម ប៉ក់ សម័យសុនីតិ ឯកឧត្តម ឃឹម ហ្វីណង់ ឯកឧត្តម​ ខាត់ សុធី អនុរដ្ឋលេខាធិការ លោក ចាន់ រិទ្ធិ ប្រធានមន្ទីរកសិកម្មខេត្តកំពត លោកអនុប្រធានមន្ទីរកសិកម្មខេត្តត្បូងឃ្មុំ លោក ចាយ ជីម ប្រធាននាយកដ្ឋានកសិ-ឧស្សាហ កម្ម លោក គង់ ពុទ្ធារិទ្ធ តំណាងនាយកដ្ឋានផ្សព្វផ្សាយកសិកម្ម រុក្ខាប្រមាញ់ និងនេសាទ មន្រ្ដីកសិកម្មឃុំ គ្រូបង្គោល​សហគមន៍​ តំណាងគម្រោង CAPSAFE EU-Germany តំណាងអង្គការ GIZ សរុបចំនួន ១៤៧នាក់។

ថ្លែងនាឱកាសបើកវគ្គបណ្តុះបណ្តាល ឯកឧត្តមបណ្ឌិត យ៉ង សាំង កុមារ បានគូសបញ្ជាក់ថា ការបណ្តុះបណ្តាលនេះ ជាការចូលរួមចំណែក យ៉ាងសំខាន់ក្នុងការពង្រឹងសមត្ថភាពប្រតិបត្តិការងាររបស់មន្រ្តី​កសិកម្ម​ឃុំ-សង្កាត់ ធ្វើការបម្រើកសិករ លើកស្ទួយប្រាក់ចំណូល​ពីផលិតកម្ម​កសិកម្ម ជាពិសេសផលិតកម្មស្វាយចន្ទី និងម្រេច ដែលជាដំណាំមានសារសំខាន់សម្រាប់សេដ្ឋកិច្ចជាតិ និងជីវភាពកសិករ។

ជាចុងបញ្ចប់​ ឯកឧត្តមបណ្ឌិត បានបញ្ជាក់ផងដែរអំពីគោល​នយោបាយ​​​អាទិភាពទី៥ និងទី៦ តួនាទី និងភារកិច្ចមន្ត្រីកសិកម្មឃុំ ការអភិវឌ្ឍសហគមន៍កសិកម្មទំនើប ដែលជាគន្លឹះដោះស្រាយ​បញ្ហា​ប្រឈម​​របស់​កសិករ បច្ចេកទេស ទុន និងទីផ្សារ ធានាបាន​លើ​ការ​បង្កើន​ប្រាក់​ចំណេញ។ ជាមួយគ្នានេះដែរ ដើម្បីពង្រឹងបាននូវ​ការ​ប្រកួតប្រជែង និងនិរន្តរភាព​សេដ្ឋកិច្ច យើងត្រូវពិនិត្យមើល ថាតើ​កសិផល​ណាដែលនឹងត្រូវជំរុញជាអាទិភាព ក្នុងនោះ​ស្វាយចន្ទី និង​ម្រេច ជាកសិផល​អាទិភាពចូលរួមចំណែក​ដល់​សេដ្ឋកិច្ច និងប្រាក់​ចំណូល​កសិករ ស្របតាមគោលនយោបាយ «មានហូប មានប្រេី​ មានបាន និងមានរហូត» របស់ក្រសួងកសិកម្ម រុក្ខាប្រមាញ់ និងនេសាទ៕