Other News
ឯកឧត្តម ឌិត ទីណា ប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ លើកទឹកចិត្តមន្ដ្រីអាជ្ញាធរស្រុកភ្នំស្រុក បន្តយកចិត្តទុកដាក់បម្រើប្រជាជនឱ្យអស់ពីសមត្ថភាព
ចេញផ្សាយ ២២ មីនា ២០២៤ 2555
នៅព្រឹកថ្ងៃសុក្រ ទី២២ ខែមីនា ឆ្នាំ២០២៤នេះ ឯកឧត្តមរដ្ឋមន្ដ្រី ឌិត ទីណា បានអញ្ជើញដឹកនាំកិច្ចប្រជុំជាមួយក្រុមការងាររាជរដ្ឋាភិបាលចុះមូលដ្ឋានស្រុកភ្នំស្រុក នៃខេត្តបន្ទាយមានជ័យ។ កិច្ចប្រជុំនេះ ក៏មានការអញ្ជើញចូលរួមពីឯកឧត្តមប្រធានក្រុមប្រឹក្សាខេត្ត ឯកឧត្ត អភិបាលនៃគណៈអភិបាលខេត្ត ឯកឧត្តម លោកជំទាវ លោក លោកស្រី អនុប្រធាន និងសមាជិកក្រុមការងាររាជរដ្ឋាភិបាលចុះមូលដ្ឋានខេត្ត ស្រុក និងថ្នាក់ដឹកនាំ កងកម្លាំង មន្ត្រីមូលដ្ឋាននៃស្រុកភ្នំស្រុក។
បន្ទាប់ពីបានស្ដាប់របាយការណ៍របស់សមត្ថកិច្ចនិងអាជ្ញាធរមូលដ្ឋានប្រចាំឃុំទាំង៦ នៃស្រុកភ្នំស្រុករួចមក ឯកឧត្តមរដ្ឋមន្ដ្រីបានវាយតម្លៃជាបឋមថា ស្ថានភាពទូទៅនៃស្រុកភ្នំស្រុកទាំងមូល ដំណើរការជាប្រក្រតី បើទោះបីជាមានបញ្ហាប្រឈមខ្លះក៏ដោយ។ ឯកឧត្តមរដ្ឋមន្ដ្រី ឌិត ទីណា បានលើកទឹកចិត្តដល់មន្ដ្រីរាជការនិងអាជ្ញាធរនៅឃុំទាំង៦នៃស្រុកភ្នំស្រុក បន្តយកចិត្តទុកដាក់បម្រើប្រជាជនឱ្យអស់ពីសមត្ថភាព និងលទ្ធភាពដែលខ្លួនមាន សំដៅលើកកម្ពស់ជីវភាព និងសុខមាលភាពរបស់ប្រជាជនឱ្យកាន់តែល្អប្រសើរឡើង។
ចំពោះសំណើផ្សេងៗដែលឃុំនីមួយៗនៃស្រុកភ្នំស្រុកបានលើកឡើង ឯកឧត្តមរដ្ឋមន្ដ្រីប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ នឹងទទួលយកទៅពិចារណា ដោយពិនិត្យទៅលើភាពចាំបាច់ និងលទ្ធភាពដែលមាន ដោយតម្កល់ផលប្រយោជន៍ប្រជាជនជាធំ៕
