ឯកឧត្តមអនុរដ្ឋលេខាធិការ ឈុំ ឆុនលី អញ្ជើញដឹកនាំក្រុមការងារជួប​សំណេះសំណាលជាមួយប្រជាកសិករ ពិនិត្យការងារកសិកម្ម និងវាយ​តម្លៃ​ការងារ​បង្កបង្កើនផលដំណាំឧស្សាហកម្ម នៅខេត្តកំពង់ចាម និងខេត្តត្បូងឃ្មុំ

ចេញ​ផ្សាយ​ ២៥ វិច្ឆិកា ២០២៥ 1012

នៅថ្ងៃទី២៤ ខែវិច្ឆិកា ឆ្នាំ២០២៥ ឯកឧត្តម ឈុំ ឆុនលី អនុរដ្ឋលេខា​ធិការ​​ក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារ​ក្រោមឱវាទមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ចាម និងខេត្តត្បូងឃ្មុំ ជួប​សំណេះ​សំណាលជាមួយប្រជាកសិករ ពិនិត្យការងារកសិកម្ម និងវាយ​តម្លៃការងារបង្កបង្កើនផលដំណាំ​ឧស្សាហកម្ម នៃខេត្តទាំងពីរ។
នាដំណើរនោះ នៅខេត្តកំពង់ចាម ឯកឧត្តមបានចុះពិនិត្យសៃឡូ លោក លឹម គឹមសៀង ដែលបានប្រមូលទិញពោតក្រហម។ សហគ្រាស​គ្រាប់​ស្វាយចន្ទីចំការលើ ឡឹង ម៉ានុត។ ចំណែកនៅខេត្តត្បូងឃ្មុំទៅ ចម្ការកសិករដាំដុះដំណាំម្នាស់នៅ​ក្នុងឃុំទន្លេបិទ ស្រុកត្បូងឃ្មុំ ដែលមានផ្ទៃដីដាំដុះដំណាំម្នាស់​ចំនួន​១៦៥ហិកតា ទទួលបានបរិមាណផលប្រមាណ ៤ ៥០០តោន/ឆ្នាំ ក្នុង១ហិកតា។ ចុះទៅសហគមន៍កសិកម្មបៃតងគោកស្រុក នៅក្នុងភូមិ​គោកស្រុក ឃុំគោកស្រុក ស្រុកតំបែរ សហគមន៍ទទួល​ទិញដំឡូងមីស្រស់ពីកសិករ នៅក្នុង១ថ្ងៃទិញ​ដំឡូងមីស្រស់ចំនួន ពី៧០-៨០តោន។ ចុះទៅចម្ការកសិករឈ្មោះ អ៊ុក ទៀល ស្ថិតនៅ​ឃុំកំពាន់ ស្រុកមេមត់ ខេត្តត្បូងឃ្មុំ បានដាំដុះដំណាំម្រេច ចំនួន១​៥​ហិកតា ក្នុង១ហិកតាទទួលបានទិន្នផលពី៥-៦តោន។
នាឱកាសនៃជំនួបជាមួយប្រជាកសិករ ឯកឧត្តមអនុរដ្ឋលេខាធិការ បាន​គូសបញ្ជាក់អំពីអត្ថប្រយោជន៍ នៃការចងក្រងជាសហគមន៍​កសិកម្ម​ទំនើប ដល់ប្រជាកសិករដាំដុះដំណាំម្រេច និងបំផុសជាគំនិតដល់​តំណាង​​សមាជិកសហគមន៍កសិកម្មទំនើប ដើម្បីកៀគរសមាជិក​ចូលរួម​ក្នុងសហគមន៍កសិកម្មទំនើបបន្ថែមទៀត។ ឯកឧត្តមបានលើក​ឡើង​ពីតួនាទីមន្រ្ដីកសិកម្មឃុំ បានចុះផ្ដល់បច្ចេកទេសក្នុងការប្រើប្រាស់ជី ថ្នាំ​កសិកម្មដល់កសិករ និងណែនាំមន្ទីរកសិកម្ម រុក្ខាប្រមាញ់ និងនេសាទ ខេត្តត្បូងឃ្មុំ និងមន្រ្ដីកសិកម្មឃុំ បន្តតាមដានរាល់ការងារផលិតកម្ម​ដំណាំឧស្សាហកម្មរបស់កសិករនៅក្នុងខេត្តទាំងមូល។
សូមបញ្ជាក់ថា ក្នុងខេត្តត្បូងឃ្មុំមានសហគមន៍សរុប៣៧ សហគមន៍​កសិកម្ម រួមមាន៖ សហគមន៍កសិកម្មផលិតស្រូវចំណី សហគមន៍​កសិកម្មផលិតស្រូវពូជ សហគមន៍កសិកម្មផលិតបន្លែ សហគមន៍​កសិកម្ម​ផលិតស្វាយចន្ទី សហគមន៍កសិកម្មផលិតដំឡូងមី សហគមន៍​កសិកម្មផលិតកៅស៊ូគ្រួសារ សហគមន៍កសិកម្មផលិតពោតក្រហម សហគមន៍​កសិកម្មផលិតម្រេច និងសហគមន៍កសិកម្មទំនើប​ម្រេច​មេមត់​ត្បូងឃ្មុំ៕