ឯកឧត្តមបណ្ឌិតយ៉ង សាំងកុមារ អញ្ជើញជាអធិបតីភាព ក្នុងសិក្ខាសាលា​ពិគ្រោះយោបល់ និងតម្រង់ទិសគម្រោងលើកកម្ពស់តំបន់ទន្លេមេគង្គ ដល់មន្ត្រីកសិកម្មឃុំ-សង្កាត់ នៅខេត្តមណ្ឌលគិរី និងខេត្តរតនគិរី

ចេញ​ផ្សាយ​ ១៨ កញ្ញា ២០២៥ 732

នៅថ្ងៃទី១៧-១៨ ខែកញ្ញា ឆ្នាំ២០២៥ ឯកឧត្តមបណ្ឌិតយ៉ង សាំង កុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងឯកឧត្តម ខាត់ សុធី អនុរដ្ឋលេខាធិការ បានអញ្ជើញជាអធិបតិភាព ក្នុងសិក្ខាសាលា​ពិគ្រោះ​យោបល់ និងតម្រង់ទិសគម្រោងលើកកម្ពស់តំបន់ទន្លេមេគង្គ នៅខេត្តមណ្ឌលគីរី និងខេត្តរតនគីរី (Mekong Elevate, MAP 2) និងមានការចូលរួមពី​លោក​ប្រធានមន្ទីរកសិកម្ម ខេត្តទាំងពីរ ដែលសិក្ខាសាលាធ្វើឡើង​ដើម្បី​លើក​​ស្ទួយ​ភាពធន់​នៃ​វិស័យកសិកម្ម និងជីវភាពកសិករ ជាពិសេស​កសិករ​ពិការ​ភាព និងជនជាតិ​ដើមភាគតិច។ 
នាឱកាសនៃអង្គសិក្ខាសាលា ឯកឧត្តមបណ្ឌិត យ៉ង សាំង កុមារ បានណែនាំ​ដល់អ្នកពាក់ព័ន្ធក្នុងការអនុវត្តន៍គម្រោងត្រូវយកចិត្តទុកដាក់សហការជំរុញកសិ​ផលដែលមានតម្លៃខ្ពស់ និងសមស្របសម្រាប់ខេត្តទាំង២ ដែលមានដំណាំ​ដូចជា៖ ស្ពៃបូកគោ ស្ពៃក្តោប ដំឡូងបារាំង កាហ្វេ ទុរេន ស្វាយចន្ទី។ ដោយ​ឡែក​សម្រាប់ស្រុកកោះញែកនៃខេត្តមណ្ឌលគិរី គឺការចូលរួមសហការជាមួយ​ប្រព័ន្ធកញ្ចប់សេវារួមជូនកសិករ (Farmers' One Stop Services) ដើម្បី​ដោះស្រាយ​បញ្ហាទុន ទីផ្សារ និងបង្កើនប្រាក់ចំណេញជូនកសិករ​ពីផលិតកម្ម​ស្រូវ និងពង្រឹងតួនាទីស្រុកកោះញែកជាជង្រុកស្រូវ​អង្ករសម្រាប់​ខេត្តមណ្ឌល​គីរី និងខេត្តរតនគីរី។ 
ឯកឧត្តមបណ្ឌិត បញ្ជាក់បន្ថែមទៀតថា ការងារទាំងអស់នេះគឺ ជាការ​ផ្លាស់​ប្តូរឥរិយាបថដ៏​សំខាន់​មួយក្នុងផលិតកម្មកសិកម្ម ក្នុងគោលដៅបង្កើន​គុណភាព កាត់បន្ថយថ្លៃដើម​ផលិត បង្កើនប្រាក់ចំណេញជូនដល់គ្រួសារ​កសិករ ជាពិសេសកសិករ​ខ្នាត​តូច​​ងាយរងគ្រោះ កសិករមានពិការភាព កសិករ​ជាជនជាតិដើមភាគតិច​នៃ​តំបន់ភាគឦសានកម្ពុជា។
សូមបញ្ជាក់ថា គម្រោងលើកកម្ពស់តំបន់ទន្លេមេគង្គ អនុវត្តដោយអង្គការ CARE ដែលគាំទ្រមូលនិធីពីរដ្ឋាភិបាលអូស្រ្តាលី ដើម្បីធានាឱ្យគម្រោងដើរ​ត្រូវគ្នា​ជាមួយគោលនយោបាយរាជរដ្ឋាភិបាល ជាពិសេសក្នុងការសហការ​ជាមួយមន្រ្តីកសិកម្មឃុំ បង្កើនគុណភាព និងប្រសិទ្ធភាពសេវាបម្រើកសិករ៕