ឯកឧត្តមបណ្ឌិត ហ៊ាន វណ្ណហន អញ្ជើញដឹកនាំមន្ត្រីជំនាញទទួលជួបពិភាក្សាជាមួយគណៈប្រតិភូអង្គការ UNESCO លើគម្រោងលើកកម្ពស់ចីរភាពទឹកក្រោមដីឆ្លងដែនកម្ពុជា-វៀតណាម

ចេញ​ផ្សាយ​ ២៧ មិថុនា ២០២៦ 3694

នៅថ្ងៃទី២៦ ខែមិថុនា ឆ្នាំ២០២៦ ឯកឧត្តមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្តមរដ្ឋមន្ត្រី ឌិត ទីណា បានទទួលជួបជាមួយគណៈប្រតិភូអង្គការ UNESCO ដឹកនាំដោយ មន្រ្តីផ្នែកវិទ្យាសាស្រ្តអង្គការ, ជំនាញការទឹកក្រោមដី (IGRAC) និងទីប្រឹក្សាជាតិផ្នែកជលសាស្រ្ត ដើម្បីពិភាក្សាលើគម្រោង លើកកម្ពស់ចីរភាពទឹកក្រោមដីឆ្លងដែន រវាងអាងទន្លេមេគង្គកម្ពុជា និងតំបន់ដីសណ្ដទន្លេមេគង្គវៀតណាម។
គម្រោង CMDA នេះ មានគោលបំណងលើកកម្ពស់ការគ្រប់គ្រងធនធានទឹកក្រោមដីឆ្លងដែនរវាងកម្ពុជា និងវៀតណាម ក្នុងតំបន់អាងទន្លេមេគង្គ ដែលមានផ្ទៃដីប្រមាណម្ភៃម៉ឺន គីឡូម៉ែត្រការ៉េ និងជាប្រភពទឹកសម្រាប់ប្រជាជនប្រើប្រាស់ បរិភោគ និងប្រើសម្រាប់វិស័យកសិកម្ម ព្រមទាំងមានសារៈសំខាន់ខ្ពស់ចំពោះប្រព័ន្ធអេកូឡូស៊ី ដីសើម បឹងទន្លេសាប វាលស្រែ និងតំបន់ឆ្នេរសមុទ្រ ការពារធនធានទឹកក្រោមដី និងប្រព័ន្ធអេកូឡូស៊ី ដើម្បីធានាសន្តិសុខទឹក ការអភិវឌ្ឍប្រកបដោយចីរភាព និងជីវភាពរស់នៅ  របស់ប្រជាជនបច្ចុប្បន្ន និងអនាគត។
ក្នុងជំនួបពិភាក្សា ឯកឧត្ដមបណ្ឌិត បានសង្កត់ធ្ងន់ថា ទឹកបានប្រើប្រាស់ច្រើនបំផុតក្នុងវិស័យកសិកម្ម លើការដាំដុះដំណាំ ចិញ្ចឹមសត្វ និងវារីវប្បកម្ម ដោយការប្រើប្រាស់ទឹកលើផ្ទៃដីភាគច្រើន។ ឯកឧត្ដមក្នុងនាមក្រសួងកសិកម្ម បន្តប្តេជ្ញាចិត្តធ្វើការយ៉ាងជិតស្និទ្ធជាមួយក្រសួងបរិស្ថាន ក្រសួងធនធានទឹក និងឧតុនិយម និងដៃគូអភិវឌ្ឍន៍នានា ក្នុងការពង្រឹងការចែករំលែកទិន្នន័យ ការផ្លាស់ប្តូរចំណេះដឹង បទពិសោធន៍ និងជំនាញបច្ចេកទេស ព្រមទាំងគាំទ្រគំនិតផ្តួចផ្តើមនានា ដែលលើកកម្ពស់ការគ្រប់គ្រងធនធានទឹកក្រោមដីប្រកបដោយចីរភាព ដើម្បីជាប្រយោជន៍ដល់វិស័យកសិកម្ម ការអភិវឌ្ឍជនបទ និងមនុស្សជំនាន់ក្រោយ។ 
ជាទីបញ្ចប់ ឯកឧត្ដមបណ្ឌិតក៏បានចាត់ជំនាញពាក់ព័ន្ធបន្ដកិច្ចសហការជាមួយនឹងគម្រោង ក្នុងការពង្រឹងភាពជាដៃគូ ពង្រីកកិច្ចសហប្រតិបត្តិការក្នុងតំបន់ និងកំណត់វិធានការជាក់ស្តែង ដើម្បីធានាឱ្យការអនុវត្តគម្រោង CMDA ប្រព្រឹត្តទៅដោយជោគជ័យ និងសម្រេចបាននូវលទ្ធផលតាមការរំពឹងទុក៕