អាជីវករលក់ជី និងថ្នាំកសិកម្មខេត្តកណ្តាល រីករាយចូលរួមក្នុងពិធីសំណេះសំណាល និងទទួលបានព័ត៌មាន និងចំណេះដឹងថ្មីៗក្នុងវិស័យកសិកម្ម

ចេញ​ផ្សាយ​ ៤ កុម្ភៈ ២០២៥ 2752

នៅរសៀលថ្ងៃទី៣ ខែកុម្ភៈ ឆ្នាំ២០២៥ អាជីវករជី និងថ្នាំកសិកម្មចំនួន ១៩០នាក់ បានចូលរួមក្នុងពិធីសំណេះសំណាលជាមួយថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ និងទទួលបានព័ត៌មាន និងចំណេះដឹងថ្មីៗអំពីគោលនយោបាយក្នុងវិស័យកសិកម្ម និងកិច្ចខិតខំប្រឹងប្រែងរបស់រាជរដ្ឋាភិបាល និងក្រសួងកសិកម្ម ក្នុងការជួយគាំទ្រដល់ប្រជាកសិករ និងជំរុញអភិវឌ្ឍវិស័យកសិកម្ម។

នៅក្នុងពិធីសំណេះសំណាលនេះ ឯកឧត្តមរដ្ឋលេខាធិការ គង់ ច័ន្ទវាសនា បានលើកឡើងអំពីកិច្ចខិតខំប្រឹងប្រែង និងសមិទ្ធផលថ្មីៗដែលក្រសួងកសិកម្មសម្រេចបានក្នុងឆ្នាំ២០២៤កន្លងទៅ ក្នុងការអនុវត្តយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាល ជាពិសេសការចុះដោះស្រាយបញ្ហាប្រឈមនានាជូនបងប្អូនប្រជាកសិករនៅទូទាំងប្រទេស។

ទន្ទឹមនេះ ឯកឧត្តមបានជម្រាបជូនបងប្អូនអាជីវករអំពីគោលនយោបាយអាទិភាពទី៥ និងទី៦របស់រាជរដ្ឋាភិបាល​ ដែលផ្តោតលើ​ការដាក់ពង្រាយមន្ត្រីកសិកម្មឃុំ ការអភិវឌ្ឍ​សហគមន៍កសិកម្មទំនើប និងការជួយរក្សាលំនឹងថ្លៃកសិផល ជាពិសេស​ក្នុងពេលបច្ចុប្បន្នដែលតម្លៃស្រូវអូអឹម និងអ៊ីអ៊ែរមានការធ្លាក់ចុះ ធៀបនឹងឆ្នាំមុនៗដែលស្ថានភាពទីផ្សារមានលក្ខណៈអំណោយផលល្អ។ 

ឯកឧត្តមក៏បានស្នើសុំឱ្យអាជីវករទាំងអស់ដែលជាដៃគូផ្ទាល់របស់កសិករ និងក្រសួង​ ក្នុងការផ្តល់បច្ចេកទេស និងការផ្គត់ផ្គង់ធាតុ​ចូលកសិកម្ម​ ចូលរួមជាមួយ​រាជរដ្ឋាភិបាល និងក្រសួងកសិកម្ម ក្នុងការចែករំលែកព័ត៌មានល្អៗ និងវិជ្ជមានជួយដល់កសិករ និងចៀសវាងផ្សព្វផ្សាយព័ត៌មានដែលបង្កចលាចល និងអសន្តិសុខសង្គម ដែលធ្វេីឱ្យខាតប្រយោជន៍កសិករ និងផ្តល់ផលអវិជ្ជមានដល់ការអភិវឌ្ឍវិស័យកសិកម្ម។

បងប្អូនអាជីវករជី និងថ្នាំកសិកម្ម បង្ហាញក្តីរីករាយដែលទទួលបានព័ត៌មាន និងចំណេះដឹងថ្មីៗពាក់ព័ន្ធនឹងវិស័យកសិកម្ម និងប្តេជ្ញាចូលរួមគាំទ្រ និងផ្សព្វផ្សាយគោលនយោបាយរបស់រាជរដ្ឋាភិបាល និងព័ត៌មានវិជ្ជមាននានាក្នុងវិស័យកសិកម្ម ដើម្បីជាប្រយោជន៍ដល់ប្រជាកសិករ និងការអភិវឌ្ឍវិស័យកសិកម្ម៕