លោកជំទាវ យ៉ើ អាស៊ីគីន អញ្ជើញដឹកនាំក្រុមការងារ​ចូលរួមសន្និសីទលើកទី២៣ "The Committee for the Review of the Implementation of the Convention - CRIC23" នៃ United Nations Convention to Combat Desertification (UNCCD) នៅប្រទេសប៉ាណាម៉ា

ចេញ​ផ្សាយ​ ២ ធ្នូ ២០២៥ 2436

នាថ្ងៃទី១​ ខែធ្នូ​ ឆ្នាំ២០២៥​ លោកជំទាវ យ៉ើ អាស៊ីគីន អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដោយលោកស្រី ភុំ វណ្ណារ៉ា ប្រធានការិយាល័យនៃនាយកដ្ឋានសហប្រតិបត្តិការអន្តរជាតិ បានចូលរួមសន្និសីទលើកទី២៣ "The Committee for the Review of the Implementation of the Convention - CRIC23"  នៃ United Nations Convention to Combat Desertification (UNCCD) នៅប្រទេសប៉ាណាម៉ា។
សន្និសីទនេះប្រព្រឹត្តទៅចាប់ពីថ្ងៃទី១-៥ ខែធ្នូ ឆ្នាំ២០២៥ ដែលមានតំណាងចូលរួមមកពី១៩៦ប្រទេស អ្នកចូលរួមសរុប ៥០០នាក់ មកពីរដ្ឋាភិបាល សង្គមស៊ីវិល និងស្ថាប័នសិក្សា ដែលមានគោលបំណងពិភាក្សាអំពីវឌ្ឍនភាពនៃការអនុវត្តគោលដៅភាពអព្យាក្រឹតនៃការធ្លាក់ចុះគុណភាពដី កិច្ចខិតខំប្រឹងប្រែងដើម្បីពង្រឹងការកសាងសមត្ថភាព គោលដៅបច្ចុប្បន្នភាពស្តីពីនីតិវិធី និងឧបករណ៍រាយការណ៍ ក៏ដូចជាវឌ្ឍនភាពនៃការរាយការណ៍អំពីគោលបំណងយុទ្ធសាស្រ្ត និងការតាមដានក្របខ័ណ្ឌគោលនយោបាយចេញពីកិច្ចប្រជុំលើកទី១៦ នៃសន្និសីទភាគី (UNCCD COP16)។ 
លេីសពីនេះ​ គណៈកម្មាធិការ​ CRIC ផ្តល់អនុសាសន៍ស្តីពីការសម្រេចបានគោលដៅសកល ដើម្បីប្រយុទ្ធប្រឆាំងនិងការធ្លាក់ចុះគុណភាពដី និងគ្រោះរាំងស្ងួត ព្រមទាំងកសាងភាពធន់នឹងគ្រោះរាំងស្ងួតត្រឹមឆ្នាំ២០៣០ ពិភាក្សាអំពីក្របខ័ណ្ឌយុទ្ធសាស្ត្រក្រោយឆ្នាំ២០៣០ និងកោះប្រជុំអ្នកពាក់ព័ន្ធសំខាន់ៗ ដែលមានការចូលរួមពីស្ត្រី យុវជន រហូតដល់ជនជាតិដើមភាគតិច និងសហគមន៍មូលដ្ឋាន។
ពិធីបើកកិច្ចប្រជុំ CRIC23 បានកំណត់ដោយជោគជ័យនូវទិសដៅមហិច្ឆតា និងរបៀបវារៈគោលនយោបាយជាចម្បងដោយការប្រកាសបើកជាផ្លូវការនូវការពិនិត្យឡើងវិញដ៏ទូលំទូលាយអំពីវឌ្ឍនភាពសកលឆ្ពោះទៅរកគោលដៅ ភាពអព្យាក្រឹតនៃការធ្លាក់ចុះគុណភាពដី (LDN) និងការពិភាក្សាដំបូងស្តីពី ក្របខណ្ឌយុទ្ធសាស្ត្រក្រោយឆ្នាំ២០៣០ សម្រាប់អនុសញ្ញានេះ។ 
ដោយឡែក ប្រទេសម្ចាស់ផ្ទះគឺប្រទេសប៉ាណាម៉ា បានអះអាងជាថ្មីអំពីការប្តេជ្ញាចិត្តជាតិដ៏រឹងមាំរបស់ខ្លួន តាមរយៈ ការសន្យាធម្មជាតិ (Nature Pledge) និងគោលដៅរបស់ខ្លួនក្នុងការសម្រេចបាននូវ LDN ត្រឹមឆ្នាំ២០៣០។ ពិធីនេះបានបញ្ចប់ដោយការគូសបញ្ជាក់អំពីការសង្កត់ធ្ងន់យ៉ាងខ្លាំងរបស់កិច្ចប្រជុំទៅលើ សកម្មភាពបរិយាបន្ន (Inclusive Action) ដោយប្រកាសពីការដាក់បញ្ចូលអ្នកពាក់ព័ន្ធសំខាន់ៗ (រួមមានស្ត្រី យុវជន និងជនជាតិដើមភាគតិច) និងកិច្ចប្រជុំយេនឌ័រលើកដំបូងបង្អស់ ដែលនឹងត្រូវធ្វើឡើងក្នុងអំឡុងសម័យប្រជុំ CRIC នាពេលខាងមុខនេះ៕