Other News
ឯកឧត្តម ឡោ រស្មី អនុរដ្ឋលេខាធិការក្រសួងកសិកម្ម អញ្ជើញជាអធិបតីក្នុងពិធីផ្សព្វផ្សាយ អប់រំ បង្ការ ទប់ស្កាត់ និងការជួញដូរគ្រឿងញៀន ដល់មន្រ្តីរាជការ សាស្រ្តាចារ្យ និស្សិតសង្ឃ និងនិស្សិត នៃសាកលវិទ្យាល័យភូមិន្ទកសិកម្ម
ចេញផ្សាយ ១៣ ធ្នូ ២០២៤ 2247
នៅព្រឹកថ្ងៃទី១២ ខែឆ្នូ ឆ្នាំ២០២៤ ឯកឧត្តម ឡោ រស្មី អនុរដ្ឋលេខាធិការ និងជាអនុប្រធានក្រុមការងារផ្សព្វផ្សាយ អប់រំ បង្ការ ទប់ស្កាត់ និងការជួញដូរគ្រឿងញៀន ប្រចាំក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងពិធីផ្សព្វផ្សាយ អប់រំ បង្ការ ទប់ស្កាត់ និងការជួញដូរគ្រឿងញៀន ដល់មន្រ្តីរាជការ សាស្រ្តាចារ្យ និងនិស្សិត នៃសាកលវិទ្យាល័យភូមិន្ទកសិកម្ម។
ពិធីនេះ មានការចូលរួមផងដែរ ពីសំណាក់ឯកឧត្តមឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ ទំនាក់ទំនងសាធារណៈ តំណាងអគ្គលេខាធិការដ្ឋាននៃ អ.ជ.ប.គ.ញ ដោយមានការអញ្ជើញចូលរួមពីមន្ត្រីរាជការ សាស្រ្តាចារ្យ និស្សិតសង្ឃ និងនិស្សិត។
តាមរយ:បទបង្ហាញរបស់គ្រូឧទ្ទេសនៃអគ្គលេខាធិការដ្ឋាន អ.ជ.ប.គ.ញ មន្ត្រីរាជការ សាស្រ្តាចារ្យ និងនិស្សិតចំនួន ៦១២នាក់ បានស្វែងយល់អំពីផលប៉ះពាល់នៃគ្រឿងញៀន ការអនុវត្តលិខិតបទដ្ឋានគតិយុត្ត និងច្បាប់ស្តីពីការត្រួតពិនិត្យគ្រឿងញៀន និងអត្ថប្រយោជន៍នៃការប្រើប្រាស់ App No Drug ដើម្បីទទួលបានព័ត៌មានឆាប់រហ័ស និងរាយការណ៍ជូនដល់សមត្ថកិច្ចអំពីករណីគ្រឿងញៀនជាដើម។
នាឱកាសនេះ ឯកឧត្តមអនុរដ្ឋលេខាធិការ បានផ្តាំផ្ញើ និងលើកទឹកចិត្តដល់មន្រ្តីរាជការ សាស្ត្រាចារ្យ និងនិស្សិតទាំងអស់ ឱ្យបន្តនៅឆ្ងាយពីគ្រឿងញៀន និងចូលរួមក្នុងយុទ្ធនាការប្រយុទ្ធប្រឆាំងនឹងគ្រឿងញៀន ស្របតាមបទបញ្ជាលេខ០១ របស់រាជរដ្ឋាភិបាល និងច្បាប់ស្តីពីការត្រួតពិនិត្យគ្រឿងញៀន និងជួយផ្សព្វផ្សាយនូវចំណេះដឹងដែលទទួលបាននាពេលនេះឪ្យបានទូលំទូលាយដល់បងប្អូនទាំងអស់គ្នាឱ្យជៀសឆ្ងាយពីគ្រឿងញៀន។
ក្នុងកម្មវិធីផ្សព្វផ្សាយនេះផងដែរ ក៏មានការប្រកួតប្រជែងផ្នែកវោហារកោសល ដែលមាននិស្សិតមកពី ៣មហាវិទ្យាល័យ ចូលរួមប្រកួតរូមមាន មហាវិទ្យាល័យវេជ្ជសាស្រ្តសត្វ មហាវិទ្យាល័យវិទ្យាសាស្រ្តកសិកម្ម និងមហាវិទ្យាល័យសេដ្ឋកិច្ចកសិកម្ម និងអភិវឌ្ឍន៍ជនបទ លើប្រធានបទពាក់ព័ន្ធនឹងគ្រឿងញៀន។
និស្សិតដែលទទួលបានជ័យលាភីទទួលបានថវិកាចំនួន ២លានរៀល និងក្រុមដែលមិនទទួលបានជ័យលាភីទទួលបានថវិកាលើកទឹកចិត្តចំនួន ១លានរៀលក្នុងមួយក្រុម៕
