ថ្នាក់ដឹកនាំក្រសួងកសិកម្ម ដឹកនាំកិច្ចប្រជុំផ្សព្វផ្សាយ ពង្រឹងកិច្ចសហការក្នុង​ការអនុវត្តគម្រោង EMPOWER និងការជ្រើសរើសកសិករបង្គោលតាមភូមិ

ចេញ​ផ្សាយ​ ២១ សីហា ២០២៦ 3938

នៅថ្ងៃទី២១ ខែសីហា ឆ្នាំ២០២៦ ឯកឧត្តម តូច ប៊ុនហួរ រដ្ឋលេខាធិការ ក្រសួង​កសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំផ្សព្វផ្សាយ និងជ្រើសរើស​កសិករ​តំណាងតាមភូមិ (កសិករបង្គោល) ក្នុងក្របខណ្ឌគម្រោង «លើកកម្ពស់​ជីវភាព​ប្រកបដោយប្រសិទ្ធភាពសេដ្ឋកិច្ច ដើម្បីកាត់បន្ថយភាពងាយរងគ្រោះ និង​ពង្រឹងភាពធន់ (EMPOWER)» នៅស្រុកត្រាំកក់ ខេត្តតាកែវ។
កិច្ចប្រជុំនេះមានការចូលរួមពី លោក ញ៉ិប ស្រ៊ន ប្រធានមន្ទីរកសិកម្ម រុក្ខា​ប្រមាញ់ និងនេសាទ ក្រុមការងារគម្រោង EMPOWER ថ្នាក់ខេត្ត តំណាង​រដ្ឋបាល​ស្រុក ឃុំ ភូមិ មន្ត្រីកសិកម្មឃុំ ព្រមទាំងមន្ត្រីជំនាញ និងអ្នកពាក់ព័ន្ធ​ជាច្រើន​រូប។
គោលបំណងនៃកិច្ចប្រជុំ ដើម្បីផ្សព្វផ្សាយអំពីការអនុវត្ត និងបន្តអនុវត្តគម្រោង EMPOWER ព្រមទាំងពង្រឹងកិច្ចសហការ រវាងក្រុមការងារគម្រោង​ជាមួយ​អាជ្ញាធរ​មូលដ្ឋាន​គ្រប់លំដាប់ថ្នាក់ សំដៅជ្រើសរើសកសិករតំណាងតាមភូមិ (កសិករបង្គោល) ឱ្យបានសមស្រប និងមានប្រសិទ្ធភាព។ តាមផែនការរបស់​គម្រោង កសិករបង្គោលត្រូវជ្រើសរើស ដោយមានការសម្របសម្រួល​តាមរយៈ​មេភូមិ ដើម្បីចូលរួមគ្រប់គ្រង និងគាំទ្រគ្រួសារដែលទទួលផល។
នៅក្នុងកិច្ចប្រជុំ ឯកឧត្តម តូច ប៊ុនហួរ បានគូសបញ្ជាក់ពីសារៈសំខាន់នៃតួនាទី​របស់​កសិករបង្គោល ក្នុងការជួយសម្របសម្រួលការអនុវត្តសកម្មភាពគម្រោង​នៅ​មូលដ្ឋាន។ ជាពិសេស កសិករបង្គោលត្រូវមានតួនាទី ​ រួមមាន៖ ១.សម្រប​សម្រួល​ការដំឡើងផ្ទះសំណាញ់ ២.សហការជាមួយក្រុមហ៊ុននៅតាមទីតាំង​គ្រួសារ​ទទួលផល ៣.ចូលរួមបណ្តុះបណ្តាល ដើម្បីពង្រឹងចំណេះដឹងទាំង​ទ្រឹស្តី និងការអនុវត្តជាក់ស្តែង ៤. ចែករំលែកចំណេះដឹង និងបច្ចេកទេស​ដល់គ្រួសារ​ដែលជាសមាជិកក្រុម ៥.តាមដាន និងផ្តល់ការប្រឹក្សាបច្ចេកទេស​ដល់សមាជិក​ក្រុម និង៦. ចូលរួមរៀបចំ ចងក្រង និងបង្កើតសហគមន៍​កសិកម្ម​ទំនើប៕