ថ្នាក់ដឹកនាំក្រសួងកសិកម្ម អញ្ជើញដឹកនាំកិច្ចប្រជុំសម្របសម្រួលការអនុវត្តគម្រោង EMPOWER នៅស្រុកបាកាន ខេត្តពោធិ៍សាត់

ចេញ​ផ្សាយ​ ២៧ សីហា ២០២៦ 510

នៅថ្ងៃទី២៦ ខែសីហា ឆ្នាំ២០២៦ លោកជំទាវ វ៉ាន់ សែនពិសី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងារអនុវត្តគម្រោង EMPOWER ប្រចាំស្រុកបាកាន បានអញ្ជើញដឹកនាំកិច្ចប្រជុំផ្សព្វផ្សាយលទ្ធផលគ្រួសារទទួលផល និងការជ្រើសរើសកសិករ ជនបង្គោលតំណាងភូមិ ដើម្បីត្រៀមអនុវត្តដំណាក់កាលបន្ទាប់នៃគម្រោង នៅស្រុកបាកាន ខេត្តពោធិ៍សាត់។
កិច្ចប្រជុំនេះមានការអញ្ជើញចូលរួមពី លោក ឆាយ គឹមម៉ុង អភិបាលនៃគណៈអភិបាលស្រុកបាកាន លោក ហៃ ធូរ៉ា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់ តំណាងក្រុមការងាររាជរដ្ឋាភិបាល ព្រមទាំងអាជ្ញាធរភូមិ ឃុំ ស្រុក និងមន្ត្រីកសិកម្មឃុំ ព្រមទាំងក្រុមការងារអនុវត្តគម្រោង។
លោកជំទាវបានគូសបញ្ជាក់ថា នៅក្នុងកិច្ចប្រជុំនេះ អាជ្ញាធរស្រុក ឃុំ និងភូមិ បានសម្តែងនូវសេចក្តីរីករាយ និងអបអរសាទរ ដែលអាជ្ញាធរមូលដ្ឋានរបស់ខ្លួន ត្រូវបានជ្រើសរើសសម្រាប់ការអនុវត្តគម្រោង ព្រមទាំងបានចូលរួមពិនិត្យ និងជ្រើសរើសកសិករ ជនបង្គោលតំណាងភូមិ ដើម្បីសម្របសម្រួលជាមួយគ្រួសារទទួលផល និងចូលរួមក្នុងដំណើរការរៀបចំបង្កើតសហគមន៍កសិកម្មទំនើបផងដែរ។
ក្នុងឱកាសនោះ លោកជំទាវបានថ្លែងអំណរគុណដល់អាជ្ញាធរមូលដ្ឋាន មន្ត្រីជំនាញ និងក្រុមការងារអនុវត្តគម្រោងទាំងអស់  ដែលបានសហការយ៉ាងជិតស្និទ្ធ ព្រមទាំងខិតខំប្រឹងប្រែងអនុវត្តការងារប្រកបដោយស្មារតីទទួលខុសត្រូវខ្ពស់៕