ឯកឧត្តមបណ្ឌិត ហ៊ាន វណ្ណហន អញ្ជើញដឹកនាំក្រុមការងារ CaWSIP-MAFF ចូលរួមកិច្ចប្រជុំបូកសរុបលទ្ធផលបេសកកម្មគាំទ្រគម្រោងរបស់ធនាគារពិភពលោក

ចេញ​ផ្សាយ​ ៩ តុលា ២០២៦ 91

នៅថ្ងៃទី៨ ខែតុលា ឆ្នាំ២០២៦ ឯកឧត្តមបណ្ឌិត ហ៊ាន វណ្ណហន រដ្ឋលេខាធិការ និងជានាយកគម្រោងកែលម្អសន្តិសុខទឹកកម្ពុជា (CaWSIP-MAFF) បានអញ្ជើញជាអធិបតីចូលរួមកិច្ចប្រជុំបូកសរុបលទ្ធផលបេសកកម្មគាំទ្រគម្រោង (Wrap-up meeting)  របស់ធនាគារពិភពលោក តាមប្រព័ន្ធ Microsoft Teams។
កិច្ចប្រជុំនេះ ត្រូវបានរៀបចំឡើងដើម្បី បូកសរុប និងពិនិត្យលទ្ធផលនៃបេសកកម្ម វឌ្ឍនភាពនៃការអនុវត្តសកម្មភាពគម្រោង បញ្ហាប្រឈម និងចំណុចដែលត្រូវយកចិត្តទុកដាក់ ព្រមទាំងពិភាក្សាលើអនុសាសន៍ និងការងារអាទិភាពសម្រាប់បន្តអនុវត្ត ដើម្បីជំរុញការអនុវត្តគម្រោងឱ្យកាន់តែមានប្រសិទ្ធភាព និងសម្រេចបានតាមគោលដៅដែលបានកំណត់។
ដោយឡែកក្នុងអំឡុងបេសកកម្ម ចាប់ពីថ្ងៃទី៧ ដល់ថ្ងៃទី៨ ខែតុលា ឆ្នាំ២០២៦ ក្រុមការងារ CaWSIP-MAFF និងប្រតិភូធនាគារពិភពលោក បានចុះពិនិត្យទីតាំងអនុវត្តគម្រោងនៅខេត្តបាត់ដំបង និងខេត្តកំពង់ធំ ដោយផ្តោតលើការអនុវត្តបច្ចេកទេសកសិកម្មឆ្លាតវៃ និងកសិកម្មអភិរក្ស រួមមាន ការដាំដំណាំគ្របដណ្តប់ដី (Cover Crops) ការប្រើប្រាស់គ្រឿងយន្តក្នុងកសិកម្មអភិរក្ស (Conservation Agriculture) និងការអនុវត្តកសិកម្មឆ្លាតវៃ (Smart Agriculture) ព្រមទាំងបានពិភាក្សាជាមួយកសិករ និងដៃគូពាក់ព័ន្ធ។ នៅខេត្តកំពង់ធំ ក្រុមការងារបានចុះពិនិត្យទីតាំងបង្ហាញផលិតកម្មស្រូវ និងបន្លែ សរុបចំនួន ៦ទីតាំង។
ជាលទ្ធផល និងចំណុចដែលបានរកឃើញពីការចុះពិនិត្យជាក់ស្តែង ត្រូវបានយកមកបូកសរុប និងពិភាក្សាក្នុងកិច្ចប្រជុំ ដើម្បីកំណត់បញ្ហាប្រឈម ផ្តល់អនុសាសន៍ និងឯកភាពលើ ទិសដៅ និងការងារត្រូវបន្ត សម្រាប់ជំរុញការអនុវត្តសកម្មភាពគម្រោងឱ្យមានប្រសិទ្ធភាព និងទាន់ពេលវេលា៕