លោកជំទាវអនុរដ្ឋលេខាធិការ អ៊ឹម រចនា ដឹកនាំក្រុមការងារជំនាញចែករំលែកបទពិសោធនៃការគ្រប់គ្រងអភិរក្សសត្វផ្សោតទឹកសាប​នៅប្រទេសចិន ជូនដល់ឆ្មាំទន្លេ នៅទីស្នាក់បុស្តិ៍ត្បូងខ្លា នៃខេត្តស្ទឹងត្រែង

ចេញ​ផ្សាយ​ ១៩ សីហា ២០២៥ 580

នៅថ្ងៃទី១៨ ខែសីហា ឆ្នាំ២០២៥ លោកជំទាវ អ៊ឹម រចនា អនុរដ្ឋលេខាធិការ​ក្រសួងកសិកម្ម រុក្ខាប្រមាញ់ និងនេសាទ ដឹកនាំក្រុមការងារជំនាញទៅកាន់ទីស្នាក់ការប៉ុស្តិ៍ឆ្មាំទន្លេអភិក្សសត្វផ្សោតត្បូងខ្លា នៃខេត្តស្ទឹងត្រែង  ដើម្បីចែករំលែកបទពិសោធនៃការគ្រប់គ្រង​អភិរក្ស​សត្វផ្សោតទឹកសាបនៅប្រទេសចិន ជូនដល់ឆ្មាំទន្លេនៅក្នុងខេត្តស្ទឹងត្រែង បន្ទាប់​ពីលោកជំទាវបាន​ដឹកនាំដំណើរទស្សនកិច្ចសិក្សាការងារអភិរក្សផ្សោតនៅប្រទេសចិន កាលពីខែមិថុនា ឆ្នាំ២០២៥កន្លងទៅ។

ការជួបសំណេះសំណាល ចែករំលែកបទពិសោធនេះ មានការចូលរួមផងដែរពីសំណាក់ លោក​ អ៊ុក វិបុល ប្រធាននាយកដ្ឋានអភិរក្សជលផល នៃរដ្ឋបាល​ជលផល លោក ផៃ សុមានី អនុប្រធាននាយកដ្ឋានអភិរក្សជលផល លោក ភួង ទីណា នាយរងអធិការដ្ឋានរដ្ឋបាលជលផលមេគង្គ លោក ស្រី សមវិចិត្រ នាយ​ខណ្ឌរដ្ឋបាលជលផលស្ទឹងត្រែង លោក អៀម សំអ៊ន់ ប្រធានកម្មវិធីតំណាង​អង្គការ WWF នៅខេត្តក្រចេះនិងស្ទឹងត្រែង។

តាមរយៈបទបង្ហាញរបស់លោក ផៃ សុមានី អនុប្រធាននាយកដ្ឋានអភិរក្សជលផល លោកជំទាវ អ៊ឹម រចនា បានគូសបញ្ជាក់បន្ថែមថា ប្រទេសចិន គឺជាប្រទេសតែមួយគត់លើលោក ដែលទទួលបានជោគជ័យនៅក្នុងការអភិរក្សសត្វផ្សោតទឹកសាប Finless Porpoise នៅទន្លេយ៉ាងហ្សេ ឱ្យ​មានចំនួនកើនឡើងវិញប្រកបដោយស្ថិរភាព។ បើតាមលោកជំទាវ ជោគជ័យនៃការអភិរក្សនិងគ្រប់គ្រងសត្វផ្សោតទឹកសាបនៅទន្លេយ៉ាងហ្សេនៅប្រទេសចិន សម្រេចបានតាមរយៈការប្រើប្រាស់បច្ចេកវិទ្យាទំនើប ដែលកម្ពុជា​កំពុងពិនិត្យលទ្ធភាព ថាតើអាចធ្វើបានលើចំណុចណាខ្លះ ទៅតាមធនធាននិងសមត្ថភាពដែលខ្លួនមាន។

ជាចុងបញ្ចប់ លោកជំទាវ អ៊ឹម រចនា បានសម្តែងនូវការថ្លែងអំណរគុណ​ចំពោះការប្ដេជ្ញាចិត្តខ្ពស់របស់មន្ដ្រីឆ្មាំទន្លេ និងក្រុមការងារជំនាញអភិរក្សផ្សោតនៃអង្គការ WWF កម្ពុជា ដែលបានបំពេញភារកិច្ចប្រកបដោយការទទួលខុសត្រូវខ្ពស់ ក្នុងការការពារសត្វផ្សោតទន្លេមេគង្គដែលជារតនសម្បត្តិ​របស់​ជាតិ ការបង្ក្រាបបទល្មើសនេសាទខុសច្បាប់ តាមរយៈការល្បាតចល័ត ២៤ម៉ោងលើ២៤ម៉ោង ជារៀងរាល់ថ្ងៃ​។ លោកជំទាវសង្ឃឹមនិងជឿជាក់ថា បងពូជាមន្ដ្រីឆ្មាំទន្លេ នឹងបន្តបំពេញតួនាទីភារកិច្ចរបស់ខ្លួន ដើម្បីថែរក្សានិងអភិរក្សធនធានជលផលកម្រ​ ជាពិសេសសត្វផ្សោតទន្លេមេគង្គនៅកម្ពុជាឲ្យកើនឡើងបន្ថែមទៀត៕