Other News
ឯកឧត្តមអនុរដ្ឋលេខាធិការ ប៉ែន ផល្លីកា អញ្ជើញចូលរួមកិច្ចប្រជុំពិនិត្យផ្តល់យោបល់ លើរបាយការណ៍ដំបូង ស្តីពី «ការអនុវត្តអនុសញ្ញាស្តីពីសិទ្ធិជនពិការនៅកម្ពុជា»
ចេញផ្សាយ ២៨ កុម្ភៈ ២០២៥ 3148
នៅថ្ងៃទី២៧ ខែកុម្ភៈ ឆ្នាំ២០២៥ ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមកិច្ចប្រជុំពិនិត្យផ្តល់យោបល់ លើរបាយការណ៍ដំបូង ស្តីពី «ការអនុវត្តអនុសញ្ញាស្តីពីសិទ្ធិជនពិការនៅកម្ពុជា» នៅទីស្ដីការ ក្រសួងសង្គមកិច្ច អតីតយុទ្ធជន និងយុវនីតិសម្បទា។
កិច្ចប្រជុំប្រព្រឹត្តទៅក្រោមអធិបតីភាព ឯកឧត្ដម ម៉េត មករា រដ្ឋលេខាធិការ និងជាអនុប្រធានក្រុមប្រឹក្សាសកម្មភាពជនពិការ តំណាងដ៏ខ្ពង់ខ្ពស់ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា។ កិច្ចប្រជុំនេះធ្វើឡើង ដើម្បីពិនិត្យពិគ្រោះផ្តល់យោបល់លើរបាយការណ៍ដំបូងនេះ ដោយសារកម្ពុជាមានកាតព្វកិច្ច ត្រូវដាក់ជូនអង្គការសហប្រជាជាតិ ក្រោយពីកម្ពុជាបានផ្តល់សច្ចាប័នអនុសញ្ញាស្តីពីសិទ្ធិជនពិការ នៅថ្ងៃទី២០ ខែកញ្ញា ឆ្នាំ២០១២ និងចូលជាធរមាន នៅថ្ងៃទី១៩ ខែមករា ឆ្នាំ២០១៣។
ឯកឧត្តម ម៉េត មករា បានគូសបញ្ជាក់ថា របាយការណ៍នេះបានប្រមូលព័ត៌មាន និងធាតុចូលយ៉ាងទូលំទូលាយ ពីក្រសួងស្ថាប័ន ចំនួន២៥ និងអង្គភាពពាក់ព័ន្ធនានាដើម្បីចងក្រងទិន្នន័យជនមានពិការភាពដែលមកទទួលសេវាផ្សេងៗ ហើយរាជរដ្ឋាភិបាលកម្ពុជា តែងតែយកចិត្តទុកដាក់ និងគិតគូរជាប្រចាំ អំពីសុខុមាលភាព និងជាពិសេសលើកកម្ពស់សិទ្ធិជនមានពិការភាព ក្នុងក្របខណ្ឌជាតិតាំងពីឆ្នាំ១៩៩៣មកម៉្លេះ។ ឯកឧត្តម បានសំណូមពរដល់តំណាងមកពីគ្រប់ក្រសួង ស្ថាប័ន ពាក់ព័ន្ធទាំងអស់ មេត្តាពិនិត្យផ្តល់យោបល់ និងគាំទ្រលើរបាយការណ៍ ដើម្បីផ្តល់លទ្ធភាពដល់ក្រុមការងារ នៃអគ្គលេខាធិការដ្ឋានក្រុមប្រឹក្សាសកម្មភាពជនពិការ អាចនឹងចាត់វិធានការបន្តបញ្ជូនរបាយការណ៍នេះ តាមរយៈរាជរដ្ឋាភិបាលទៅអង្គការសហប្រជាជាតិ៕
