ឯកឧត្តមអនុរដ្ឋលេខាធិការ ទឹម បូរក្ស បានដឹកនាំក្រុមការងារចម្រុះ ចុះពិនិត្យ និងបង្រ្កាបបទល្មើសនេសាទ នៅខេត្តត្បូងឃ្មុំ

ចេញ​ផ្សាយ​ ១០ មករា ២០២៥ 3181

នៅថ្ងៃទី១០ ខែមករា ឆ្នាំ២០២៥ ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារចម្រុះ ចុះពិនិត្យ និងបង្រ្កាបបទល្មើសនេសាទ នៅចំណុចភូមិសាស្រ្តបឹងក្រពិត ឃុំមៀន និងឃុំព្រះធាតុ ក្នុងស្រុកអូររាំងឪ ខេត្តត្បូងឃ្មុំ។

ដំណើរចុះពិនិត្យនេះ មានការចូលរួមពីសំណាក់លោក ស៊ុន សារ៉ាត់ អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្ត តំណាងលោកប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ  រួមជាមួយកម្លាំងចម្រុះ ដែលមានសមត្ថកិច្ចអធិការដ្ឋានរដ្ឋបាលជលផលមេគង្គ កម្លាំងសមត្ថកិច្ចខណ្ឌរដ្ឋបាលជលផលត្បូងឃ្មុំ       សហការជាមួយកម្លាំងអាជ្ញាធរឃុំមៀន ប៉ុស្តិ៍នគរបាលរដ្ឋបាលឃុំមៀន និងគណៈកម្មការសហគមន៍នេសាទបឹងក្រពិត។

ក្នុងប្រតិបត្តិការចុះបង្ក្រាបនេះ បានប្រើប្រាស់កាណូតចំនួន២គ្រឿង នៅតាមភូមិសាស្ត្រជុំវិញបឹងក្រពិត ឃុំមៀន និងឃុំព្រះធាតុ ខេត្តត្បូងឃ្មុំ តែពុំប្រទះបទល្មើសជលផលណាមួយឡើយ មានតែការធ្វើនេសាទឧបករណ៍ស្របច្បាប់ជាលក្ខណៈគ្រួសារ។

បន្ថែមពីនេះ ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ក៏បានដឹកនាំកម្លាំងសមត្ថកិច្ចចម្រុះ បន្តត្រួតពិនិត្យមើលការធ្វើនេសាទដោយឧបករណ៍ម៉ាញ់ តាមដងទន្លេមេគង្គភូមិសាស្ត្រខេត្តត្បូងឃ្មុំ និងខេត្តកំពង់ចាម។ តាមការពិនិត្យជាក់ស្តែងឃើញថា មានទូកម៉ាញ់ចំនួន៨វង់ កំពុងធ្វើអាជីវកម្មនេសាទត្រីនៅម្តុំផ្នែកខាងក្រោមនិងខាងលើស្ពានគីហ្សូណា តាមបណ្តោយដងទន្លេមេគង្គ។ ផលត្រីដែលនេសាទបានក្នុងមួយម៉ាញ់ក្នុងមួយលើកបានប្រមាណពី៣០ ទៅ៧០គីឡូក្រាម ឬខ្លះបានលើស  អាស្រ័យចំលើហ្វូងត្រី។ ត្រីទាំងនោះ មានតម្លៃចន្លោះពី១០០០-៥០០០៛ ក្នុង១គីឡូក្រាម៕