ថ្នាក់ដឹកនាំក្រសួងកសិកម្ម អញ្ជើញបំពេញទស្សនកិច្ចនៅទីក្រុងជីងចូវ ខេត្តហឺណាន សារធាណរដ្ឋប្រជាមានិតចិន

ចេញ​ផ្សាយ​ ២៥ កញ្ញា ២០២៦ 484

នាថ្ងៃទី២៤ ខែកញ្ញា ឆ្នាំ២០២៦ ប្រតិភូក្រសួងកសិកម្ម រុក្ខាប្រមាញ់ និងនេសាទដឹកនាំដោយ ឯកឧត្តម គី ច័ន្ទរំដួល បានអញ្ជើញបំពេញទស្សនកិច្ចនៅមជ្ឈមណ្ឌលពិពរណ៌កសិកម្មក្រុងជីងចូវ ខេត្តហឺណាន សារធាណរដ្ឋប្រជាមានិតចិន ក្នុងគោលបំណពង្រីកទំហំនៃការនាំចេញកសិកម្មកម្ពុជា មកកាន់ទីផ្សារលក់ដុំប្រទេសចិន​និងចែកចាយបន្ដទៅទីផ្សារនានា។
នាឱកាសនៃដំណើរទស្សនៈកិច្ច ឯកឧត្តម គី​ ច័ន្ទរំដួល បានជួបពិភាក្សាជាមួយ លោក Fang Guogen អគ្គនាយកនៃមជ្ឈមណ្ឌលពិពរណ៌កសិកម្មក្រុងជីងចូវ អំពីកាលានុវត្តភាពវិនិយោគចំនួន ៣រួមមាន៖​ (១)ការវិនិយោគនាំចេញកសិកម្មសក្កានុពលកម្ពុជា​ ដែលបានចុះពិធីសាររួចជាមួយនឹងអគ្គរដ្ឋបាលគយចិន (២)ការវិនិយោគនាំចូលធាតុចូលកសិកម្ម​ ព្រមទាំងគ្រឿងយន្ដកសិកម្ម បច្ចេកវិទ្យាទំនើបកសិកម្មជាដើម ពីប្រទេសចិនមកទីផ្សារកម្ពុជា និង(៣)ការបណ្តាក់ទុនវិនិយោគដោយផ្ទាល់(FDI) នៅប្រទេស កម្ពុជា​ ដែលមានលក្ខណៈសម្បត្តិគ្រប់គ្រាន់ពេញលេញ(QIP) ហេីយស្របតាមច្បាប់វិនិយោគនៃព្រះរាជាណាចក្រកម្ពុជា ជាមួយនឹងអត្ថប្រយោជន៍ជាច្រេីនផងដែរ។
មុននឹងបញ្ចប់​ ឯកឧត្តម​ គី​ ច័ន្ទរំដួល​ បានអញ្ជើញអ្នកវិនិយោគចិន ចូលរួមព្រឹត្តិការណ៍ពិព័រណ៌កសិកម្មកម្ពុជា(CAFE26) ដែលនឹងប្រព្រឹត្តទៅនាខែតុលាខាងមុខនេះ ហេីយភាគីចិន ក៏បានបង្ហាញចំណាប់អារម្មណ៍លើការនាំចូលកសិផលសក្កានុពលកម្ពុជាមកកាន់ទីផ្សារប្រទេសចិន រួមមាន៖ ដំណាប់ស្វាយ គ្រាប់ស្វាយចន្ទី ធុរេន ផ្លែមៀន ព្រមទាំងនឹងធ្វើទស្សនៈកិច្ចទៅប្រទេសកម្ពុជានាពេលខាងមុខឆាប់ៗនេះ ដេីម្បីសិក្សាឱ្យបានស៊ីជម្រៅ​ និងជំរុញលេីការវិនិយោគកសិ-ពាណិជ្ជកម្ម៕