ឯកឧត្តមរដ្ឋលេខាធិការ ហ៊ាន វណ្ណហន អញ្ជើញដឹកនាំកិច្ចប្រជុំពិនិត្យលទ្ធផលបេសកកម្មគាំទ្រការអនុវត្តគម្រោងលើកទី២របស់ធនាគារពិភពលោក

ចេញ​ផ្សាយ​ ២៧ មករា ២០២៦ 318

នារសៀលថ្ងៃទី២៧ ខែមករា ឆ្នាំ២០២៦ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោង បានអញ្ជើញដឹកនាំកិច្ចប្រជុំពិនិត្យ និងពិភាក្សាលើរបាយការណ៍បេសកកម្មគាំទ្រការអនុវត្តគម្រោងលើកទី២ (Second Implementation Support Mission) នៃគម្រោងកែលម្អសន្តិសុខទឹកកម្ពុជា (CaWSIP) នៅទីស្តីការក្រសួងកសិកម្ម រុក្ខាប្រមាញ់ និងនេសាទ។
កិច្ចប្រជុំនេះ មានការអញ្ជើញចូលរួមពី លោកប្រធានគ្រប់គ្រងគម្រោង គ្រប់ប្រធានផ្នែករួមមាន ផ្នែកហិរញ្ញវត្ថុ ផ្នែកលទ្ធកម្ម ផ្នែកបច្ចេកទេស ផ្នែកតាមដាននិងវាយតម្លៃ ផ្នែកយេនឌ័រ ផ្នែកគាំពារបរិស្ថាន ព្រមទាំងទីប្រឹក្សាជំនាញ និងមន្ត្រីពាក់ព័ន្ធ។
អង្គប្រជុំបានផ្តោតលើការពិភាក្សា លើលទ្ធផលដែលទទួលបានពីបេសកកម្មគាំទ្រការអនុវត្តកន្លងមក ដើម្បីវាយតម្លៃវឌ្ឍនភាព និងបញ្ហាប្រឈមនានាដែលកើតមានក្នុងដំណើរការអនុវត្តគម្រោង។ លើសពីនេះ ពិនិត្យរាល់សកម្មភាពដែលនឹងត្រូវអនុវត្តបន្ត និងជំរុញដល់គ្រប់ផ្នែកទាំងអស់សម្រេចឱ្យបាននូវលទ្ធផលដែលបានព្រមព្រៀងក្នុងរបាយការណ៍នៃបេសកកម្មគាំទ្រការអនុវត្តគម្រោងលើកទី២របស់ធនាគារពិភពលោក។ 
ជាកិច្ចបញ្ចប់ ឯកឧត្តមនាយកគម្រោង បានផ្តល់អនុសាសន៍ឱ្យមន្ត្រីគ្រប់ផ្នែកទាំងអស់ រួមទាំងទីប្រឹក្សាគម្រោងផងដែរ បន្តសហការគ្នាឱ្យកាន់តែជិតស្និទ្ធ ដើម្បីចូលរួមអនុវត្តសកម្មភាពដែលមានលើកឡើងក្នុងរបាយការណ៍បេសកកម្មលើកទី២នេះឱ្យបានទាន់ពេលវេលា ដើម្បីសម្រេចឱ្យបានតាមផែនការនិងគោលដៅរបស់គម្រោង។
សូមជម្រាបផងដែរថា បេសកកម្មលើកទី២របស់ក្រុមការងារធនាគារពិភពលោក បានធ្វើឡើងចាប់ពីថ្ងៃទី១ ខែធ្នូ រហូតដល់ថ្ងៃទី១២ ខែធ្នូ ឆ្នាំ២០២៥។ ក្នុងនោះដែរ ក៏មានការចុះពិនិត្យទីតាំងអនុគម្រោង ស្ថិតក្នុងខេត្តក្រចេះ និងខេត្តមណ្ឌលគិរីផងដែរ ដើម្បីសិក្សាស្វែងយល់ពីស្ថានភាពបច្ចុប្បន្ននៃប្រព័ន្ធធារាសាស្ត្រ និងស្ថានភាពការងារកសិកម្មវៃឆ្លាតរបស់កសិករនៅតំបន់គោលដៅគម្រោង៕