ឯកឧត្តម​រដ្ឋលេខាធិការ​ អ៊ឹម​ ស៊ីថុល​ អញ្ជេីញជាគណៈអធិបតីក្នុងវេទិកាផ្សព្វផ្សាយនិងពិគ្រោះយោបល់របស់​ ក្រុមប្រឹក្សាស្រុកស្វាយចេក​ នៅខេត្តបន្ទាយមានជ័យ

ចេញ​ផ្សាយ​ ៣ ធ្នូ ២០២៥ 1518

នាព្រឹកថ្ងៃទី៣​ ខែធ្នូ​ ឆ្នាំ២០២៥​ ឯកឧត្តម អ៊ឹម​ ស៊ីថុល រដ្ឋលេខាធិការប្រចាំការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកស្វាយចេក ខេត្តបន្ទាយមានជ័យ រួមជាមួយឯកឧត្តម វ៉ា ពិសី អនុរដ្ឋលេខាធិការ ឯកឧត្តម ហ៊ូ ប៊ុនហេង សមាជិកក្រុមប្រឹក្សាខេត្តបន្ទាយមានជ័យ លោក ដា ទឹង ប្រធានក្រុមប្រឹក្សាស្រុកស្វាយចេក លោក លឿង សុភក្តិ អភិបាលនៃគណៈអភិបាលស្រុកស្វាយចេក បានអញ្ជេីញជាគណៈអធិបតីក្នុងវេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សាស្រុកស្វាយចេក។ 
វេទិកានេះ ក៏មានការចូលរួមពីក្រុមការងាររាជរដ្ឋាភិបាលចុះមូលដ្ឋានឃុំ លោក លោកស្រី សមាជិកក្រុមប្រឹក្សាស្រុក គណៈអភិបាលស្រុក មេបញ្ជាការ មេបញ្ជាការរង ប្រធានអង្គភាពចំណុះរដ្ឋបាលស្រុកស្វាយចេក ក្រុមប្រឹក្សាឃុំទាំង៨នៃស្រុកស្វាយចេក មន្ត្រីកសិកម្មឃុំ មេភូមិ និងប្រជាពលរដ្ឋសរុបប្រមាណ៣០០នាក់។ វេទិកានេះរៀបចំឡើងដើម្បីផ្សព្វផ្សាយតួនាទីនិងភារកិច្ចរបស់ក្រុមប្រឹក្សាស្រុក និងគណៈអភិបាលស្រុក ព្រមទាំងទទួលស្ដាប់សំណើ សំណូមពរ របស់ប្រជាពលរដ្ឋមូលដ្ឋាន និងដាក់ចេញវិធានការដោះស្រាយនូវរាល់សំណើសំណូមពររបស់ប្រជាពលរដ្ឋនៅមូលដ្ឋាន។ 
ឯកឧត្តម អុឹម ស៊ីថុល បានកោតសរសើរនិងវាយតម្លៃខ្ពស់ចំពោះការអនុវត្តតួនាទីនិងភារកិច្ចរបស់ក្រុមប្រឹក្សាស្រុកស្វាយចេក គណៈអភិបាលស្រុក និងក្រុមប្រឹក្សាឃុំសង្កាត់ ដែលជានិច្ចជាកាលតែងតែយកចិត្តទុកដាក់ចំពោះសុខុមាលភាពប្រជាពលរដ្ឋនៅមូលដ្ឋាន ពិសេសការផ្ដល់សេវាជូនប្រជាពលរដ្ឋប្រកបដោយប្រសិទ្ធភាពនិងការទទួលខុសត្រូវ។
ជាមួយគ្នានេះ ឯកឧត្តមរដ្ឋលេខាធិការ ក៏បានជម្រាបជូនអំពីវឌ្ឍនភាពវិស័យកសិកម្ម ពិសេសការសម្របសម្រួលការទិញលក់ស្រូវនារដូវប្រមូលផល និងបានជម្រាបជូនអង្គវេទិកាអំពីតួនាទីនិងភារកិច្ចរបស់មន្ត្រីកសិកម្មឃុំ-សង្កាត់ដែលបាននឹងកំពុងចូលរួមយ៉ាងសកម្មជាមួយបងប្អូនប្រជាកសិករក្នុងការសម្របសម្រួលទាំងផ្នែកបច្ចេកទេសនិងការស្វែងរកទីផ្សារ៕