ឯកឧត្តមរដ្ឋលេខាធិការ ប្រាក់​ ដាវីដ អញ្ជើញដឹកនាំមន្ត្រីបង្គោលតាមអនុវិស័យ ចូលរួមកិច្ចប្រជុំពិសេសរបស់ឧត្តមមន្ត្រីកសិកម្ម និងព្រៃឈើអាស៊ានលើកទី៤៦​ និង​កិច្ច​ប្រជុំ​ពាក់ព័ន្ធ

ចេញ​ផ្សាយ​ ២១ សីហា ២០២៥ 755

នៅថ្ងៃទី១៩-២០ ខែសីហា ឆ្នាំ២០២៥ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាឧត្តមមន្រ្តីកសិកម្ម និងព្រៃឈើអាស៊ានរបស់កម្ពុជា បានអញ្ជើញដឹកនាំមន្រ្តីបង្គោលតាមអនុវិស័យ ចូលរួមកិច្ចប្រជុំពិសេសរបស់ឧត្តមមន្ត្រីកសិកម្ម និងព្រៃឈើអាស៊ានលើកទី៤៦ (SSOM-46th AMAF) ព្រៃឈើអាស៊ានបូក៣លើកទី២៤ (SSOM-24th AMAF Plus Three) និងអាស៊ាន-សហព័ន្ធរុស្ស៊ីលើកទី១០ (10th ARSOMA) ព្រមទាំងកិច្ចប្រជុំពាក់ព័ន្ធ ដែលប្រទេសមីយ៉ាន់ម៉ាទទួលធ្វើជាម្ចាស់ផ្ទះ តាមរយៈប្រព័ន្ធវីដេអូ។

កិច្ចប្រជុំនេះ ធ្វើឡើងក្នុងគោលបំណង ពិនិត្យ និងពិភាក្សាលើកិច្ចសហប្រតិបត្តិការអាស៊ានលើវិស័យស្បៀង កសិកម្ម និងព្រៃឈើ (FAF) វឌ្ឍនភាពការងាររបស់ក្រុមការងារតាមវិស័យអាស៊ាន អនុវិស័យ និងក្រុមអ្នកជំនាញអាស៊ានដែលបានអនុវត្តកន្លងមក ក្នុងនោះមានឯកសារសំខាន់ៗដូចជា សេចក្តីថ្លែងការរបស់ថ្នាក់ដឹកនាំកំពូលអាស៊ាន លើចក្ខុវិស័យ ស្បៀងអាហារ កសិកម្ម និងព្រៃឈើអាស៊ានឆ្ពោះទៅកាន់ឆ្នាំ២០៤៥ (ASEAN Leaders’ Declaration on the Vision for Food, Agriculture and Forestry Towards 2045)  ក្របខណ្ឌយុទ្ធសាស្តវិស័យស្បៀងអាហារ កសិកម្ម និងព្រៃឈើអាស៊ានឆ្ពោះទៅកាន់ឆ្នាំ២០៤៥ (ASEAN Framework for Cooperation in Food, Agriculture and Forestry Sector Towards 2045)  ផែនការយុទ្ធសាស្រ្តវិស័យស្បៀងអាហារ កសិកម្ម និងព្រៃឈើអាស៊ានឆ្នាំ២០២៦-២០៣០ (Food, Agriculture and Forestry Sectoral Plan 2026-2030) និងកិច្ចសហប្រតិបត្តិការកសិកម្ម និងសន្តិសុខស្បៀងអាស៊ាន-រុស្ស៊ី ២០២១ ដល់ ២០២៥ (ASEAN-Russia Agriculture and Food Security Cooperation Work Programme (2021 – 2025) និងគម្រោងសកម្មភាពថ្មីសម្រាប់កម្មវិធីកិច្ចសហប្រតិបត្តិការកសិកម្ម និងសន្តិសុខស្បៀងអាស៊ាន-រុស្ស៊ី (២០២៦-២០៣០) ជាដើម។

ទន្ទឹមនឹងនេះ ឯកឧត្តមគូសបញ្ជាក់ថា កិច្ចប្រជុំ ក៏បានពិនិត្យ ពិភាក្សាលើការផ្តល់ជាអាទិភាពលើកិច្ចសហប្រតិបត្តិការតាមវិស័យ និងគម្រោងកិច្ចសហប្រតិបត្តិការអាស៊ានជាមួយដៃគូសន្ទនា អង្គការអន្តរជាតិ និងស្ថាប័នពាក់ព័ន្ធក្នុងតំបន់ លើវិស័យសំខាន់ៗរបស់ FAF។ ឯកឧត្តមបន្តថា រាល់លទ្ធផលនៃកិច្ចប្រជុំខាងលើនឹងត្រូវដាក់ឆ្លងពិនិត្យ និងសម្រេចក្នុងកិច្ចប្រជុំរដ្ឋមន្រ្តីកសិកម្ម និងព្រៃឈើអាស៊ាន និងកិច្ចប្រជុំពាក់ព័ន្ធនាពេលខាងមុខ៕