ឯកឧត្តមរដ្ឋមន្រ្តី វេង សាខុន និងគណៈប្រតិភូបានចូលរួមកិច្ចប្រជុំលើកទី៤០ នៃរដ្ឋមន្រ្តីកសិកម្ម និងព្រៃឈើអាស៊ាន ជាមួយរដ្ឋមន្រ្តីទាំង១០ នៃប្រទេសអាស៊ាន

ចេញ​ផ្សាយ​ ១២ តុលា ២០១៨ 4478

នៅរសៀលថ្ងៃព្រហស្បតិ៍ ០២កើត ខែអស្សុជ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១១ ខែតុលា ឆ្នាំ២០១៨ ឯកឧត្តមរដ្ឋមន្រ្តី វេង សាខុន និងគណៈប្រតិភូបានចូលរួមកិច្ចប្រជុំលើកទី៤០ នៃរដ្ឋមន្រ្តីកសិកម្ម និងព្រៃឈើអាស៊ាន ជាមួយរដ្ឋមន្រ្តីទាំង១០ នៃប្រទេសអាស៊ាន។

ប្រធានបទនៃកិច្ចប្រជុំលើកទី៤០ នៃរដ្ឋមន្រ្តីកសិកម្ម និងព្រៃឈើអាស៊ាន ដែលបានលើកយកមកបង្ហាញ និងពិភាក្សារួមមាន៖

1. លទ្ធផលនៃមហាសន្និបាតលើកទីទី៣១ និង៣២ និងកិច្ចប្រជុំលើកទី៥០ នៃរដ្ឋមន្រ្តីសេដ្ឋកិច្ចអាស៊ាន

2. វឌ្ឍនៈភាពនៃការអនុវត្តក្របខណ្ឌគោលនយោបាយដែលពាក់ព័ន្ធទៅនឹងកិច្ចសហប្រតិបត្តិការស្បៀង កសិកម្ម និងព្រៃឈើអាស៊ាន

3. ការរៀបចំសម្រាប់កិច្ចប្រជុំលើកទី១៨ នៃរដ្ឋមន្រ្តីកសិកម្ម និងព្រៃឈើអាស៊ានបូកបី

4. ការរៀបចំសម្រាប់កិច្ចប្រជុំលើកទី៦ រវាងរដ្ឋមន្រ្តីអាស៊ាន និងចិន

ជាលទ្ធផលនៃកិច្ចប្រជុំលើកទី៣៩ នៃរដ្ឋមន្រ្តីកសិកម្ម និងព្រៃឈើអាស៊ាន នៃការអនុវត្តក្របខណ្ឌគោលនយោបាយកិច្ចសហប្រតិបត្តិការស្បៀង កសិកម្ម និងព្រៃឈើអាស៊ាន ២០១៧-២០១៨ សម្រេចបានចំណុចសំខាន់ៗចំនួន ៦ រួមមាន៖

1. ឯកសារណែនាំសម្រាប់ជំរុញឲ្យមានការទទួលខុសត្រូវសម្រាប់ការវិនិយោគលើស្បៀង កសិកម្ម និងព្រៃឈើ

2. ការបញ្រ្ចាបសមភាពយេនឌ័រនៅក្នុងកម្មវិធីស្បៀង កសិកម្ម និងព្រៃឈើ

3. កម្រិតសំណល់ថ្នាំកសិកម្មអតិបរមារបស់អាស៊ាន (ASEAN MRL) និង ប្រភេទស្តង់ដារផលិតផលកសិផលរបស់អាស៊ាន (ASEAN Standards)

4. គោលនយោបាយដែលជំរុញកិច្ចសហប្រតិបត្តិការអន្តរវិស័យរវាងព្រៃឈើ និងវិស័យផ្សេងៗ

5. ការអនុវត្តការចិញ្ចឹមសត្វល្អ (GAHP)

6. ត្រីវិស័យរបស់អាស៊ានក្នុងការពង្រឹងតួនាទីរបស់សហគមកសិកម្ម នៅក្នុងខ្សែចង្វាក់ផលិតកម្មកសិកម្មសកលពីឆ្នាំទី២០១៨ ដល់២០២៥។

អង្គប្រជុំក៏បានជំរុញឲ្យសមាជិកអាស៊ានទាំងអស់បន្តពង្រឹងសន្តិសុខស្បៀង កសិធុរកិច្ច និងសុវត្ថិភាពចំណីអាហារ។ ដោយឡែកពាក់ព័ន្ធទៅនឹងអនុវិស័យសត្វ អង្គប្រជុំបានសម្រេចបង្កើតនូវស្តង់ដារក្នុងការចាក់វ៉ាក់សាំងសត្វ និងការអនុវត្តការចិញ្ចឹមសត្វល្អ ជាពិសេសកសិដ្ឋានចិញ្ចឹមជ្រូក។ ក្រៅពីនេះអង្គប្រជុំក៏បានឯកភាពក្នុងការបង្កើតក្រុមការងារបច្ចេកទេសលើការកំណត់បទដ្ឋានណែនាំសម្រាប់ការអនុវត្តវារិវប្បកម្មល្អ និងការអនុវត្តការចិញ្ចឹមបង្គាល្អ។ ចំពោះអនុវិស័យព្រៃឈើ អង្គប្រជុំបានគាំទ្រឲ្យមានការរៀបចំនូវបទដ្ឋានណែនាំពីការអភិវឌ្ឍន៏កសិ-រុក្ខាកម្ម និងយន្តការគ្រប់គ្រងធនធានព្រៃឈើប្រកបដោយនិរន្តភាពដើម្បីពង្រឹងភាពប្រកួតប្រជែងក្នុងការធ្វើពាណិជ្ជកម្មព្រៃឈើនៅលើឆាកអន្តរជាតិ ដោយគោរពទៅតាមលក្ខខណ្ឌតម្រូវរបស់ពិភពលោក។