ព័ត៌មានផ្សេងៗទៀត
កសិករអាចប្រើប្រាស់ដីមិនធ្វើកសិកម្មធ្វើជាស្រះទឹកបាន
ចេញផ្សាយ ២២ មករា ២០១៨ 4058
នៅឯឃុំញែងញង ស្រុកត្រាំកក់ ឯកឧត្តមបណ្ឌិត ច័ន្ទសារុន រដ្ឋមន្ត្រីក្រសួងកសិកម្ម បានប្រាប់ដល់កសិករជាច្រើនរយនាក់ ដែលមកចូលរួមសម្ពោធស្រះទឹកធំបង្គួរមួយថា កសិករអាចពិនិត្យមើលដីទំនេរ មិនអាចដាំដុំបាន ហើយចង់ប្រែក្លាយ ទៅជាស្រះទឹកនោះ គឺក្រុមការងារ របស់ឯកឧត្តម និងជួយបានភ្លាម។ ឯកឧត្តមបានពន្យល់ថា ការបង្កើតប្រភពទឹក នៅមូលដ្ឋានគឺមានសារៈសំខាន់ណាស់។
កាលពីពេលថ្មីៗកន្លងទៅនេះ ឯកឧត្តមរដ្ឋមន្ត្រីក្រសួងកសិកម្ម បានអញ្ជើញចូលរួមសម្ពោធស្រះទឹកសហគមន៍ មួយកន្លែងនៅឃុំញែងញង។ ស្រះនេះមានទំហំ៣២ម៉ែត្រ គុណនឹង២៥ ម៉ែត្រ និងចំណាយថវិកាចំនួន២.៨០៥ដុល្លា ដែលផ្តល់ដោយឯកឧត្តមរដ្ឋមន្ត្រី។
នៅពេលចូលរួមឯកឧត្តម បានប្រាប់ទៅកសិករ អំពីសារសំខាន់នៃការបង្កើតប្រភពទឹកគ្រប់គ្រងទឹក និងប្រើប្រាស់ប្រកបការសន្សំសំចៃ និងមានប្រសិទ្ធភាព។ ឯកឧត្តមបន្តថា ប្រជាជននៅក្នុងមូលដ្ឋានអាចពិនិត្យមើលពីដីទំនេរ ដែលមិនអំណោយផល សម្រាប់ការធ្វើកសិកម្ម តែត្រូវប្រែក្លាយវាឲ្យទៅជាស្រះទឹកបាន។
ប្រសិនជាមានបំណងបែបនេះមែន ឯកឧត្តមនឹងបញ្ជូនមន្ត្រីក្រុមការងារ របស់ឯកឧត្តមឲ្យមកពិនិត្យ ដើម្បីជួយដោះស្រាយ ត្រូវតែរួមគ្នាដោះស្រាយបញ្ហាទឹកឲ្យបាន។ គ្រប់ភូមិត្រូវតែមានស្រះទឹក ក្នុងភូមិមួយយ៉ាងហោចក៏ត្រូវមានស្រះទឹកសហគមន៍មួយដែរ។
នេះជាប្រភពទឹកសម្រាប់គ្រួសារ។ ឯកឧត្តមបានបន្តទៀតថា ការផ្តល់ស្រះទឹកមានន័យថា ផ្តល់មុខរបរព្រោះកសិករប្រើប្រាស់ទឹកនេះ សម្រាប់ការធ្វើកសិកម្ម។ ស្រះនឹងផ្តល់ពហុប្រយោជន៍ដល់កសិករ។ មានស្រះទឹកត្រូវមានត្រី មានដីត្រូវមានស្រូវមានបន្លែ។
