ឯកឧត្តមវេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងពិធីបើកសម្ពោធដាក់តាំងពិព័រណ៌វិស័យសុខភាពសត្វ និងផលិតកម្មសត្វ ខ្នាតអន្តរជាតិលំដាប់លេខ១ នៅកម្ពុជាជាផ្លូវការនៅមជ្ឈមណ្ឌលពិព័រណ៌កោះពេជ្រ

ចេញ​ផ្សាយ​ ១ វិច្ឆិកា ២០១៨ 3754

នាព្រឹកថ្ងៃព្រហស្បតិ៍ ៨រោច ខែអស្សុជ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០១ ខែវិច្ឆិកា ឆ្នាំ២០១៨ ឯកឧត្តមវេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងពិធីបើកសម្ពោធដាក់តាំងពិព័រណ៌វិស័យសុខភាពសត្វ និងផលិតកម្មសត្វ ខ្នាតអន្តរជាតិលំដាប់លេខ១ នៅកម្ពុជាជាផ្លូវការនៅមជ្ឈមណ្ឌលពិព័រណ៌កោះពេជ្រ។ ការតាំងពិព័រណ៌នេះ ត្រូវបានសហការរៀបចំនិងឧបត្ថម្ភដោយអគ្គនាយកដ្ឋានសុខភាពសត្វ និងផលិតកម្មសត្វ និងក្រុមហ៊ុន AMB-Tarsus Events Group របស់ម៉ាឡេស៊ី ហើយក្នុងព្រឹត្តិការណ៍នេះយើងសង្កេតឃើញមានការអញ្ជើញចូលរួមផងដែរពីសំណាក់ឯកឧត្តម លោក ជំទាវជាថ្នាក់ដឹកនាំក្រសួង ស្ថាប័នរដ្ឋពាក់ព័ន្ធ អង្គការក្រៅរដ្ឋាភិបាល ដៃគូអភិវឌ្ឍ វិស័យឯកជន តំណាងក្រុមហ៊ុនជាតិ-អន្តរជាតិ តំណាងជ័យលាភីមកពីក្រុមហ៊ុនចិញ្ចឹមសត្វ ចំណីសត្វ កែច្នៃសាច់សត្វ និងអង្ករ សហគមន៍កសិកម្ម ភ្ញៀវទេសចរណ៍ ពាណិជ្ជករ ម្ចាស់កសិដ្ឋានចិញ្ចឹមសត្វ និងតំណាងកសិករចិញ្ចឹមសត្វយ៉ាងច្រើនកុះករ។ ឆ្លៀតក្នុងឱកាសនេះ ឯកឧត្តមរដ្ឋមន្រ្តីបានសម្តែងនូវកិច្ចស្វាគមន៍ចំពោះវត្តមានរបស់សមាជិក សមាជិកាដែលបានឆ្លៀតឱកាសដ៏មានតម្លៃអញ្ជើញចូលរួមក្នុងព្រឹត្តិការណ៍តាំងពិព័រណ៌ដ៏មានសារៈសំខាន់ដែលមានរយៈពេល០៣ នាពេលនេះ និងជាពិសេសបានថ្លែងអំណរអរគុណយ៉ាងជ្រាលជ្រៅចំពោះក្រុមហ៊ុនAMB-Tarsus Events Group ដែលបានផ្តួចផ្តើមគំនិតរៀបចំតាំងពិព័រណ៌ខ្នាតអន្តរជាតិលេខ១ ជាលើកទី៣នៅព្រះរាជាណាចក្រកម្ពុជានាថ្ងៃនេះ ដោយបានអញ្ជើញក្រុមហ៊ុនជាតិ-អន្តរជាតិពាក់ព័ន្ធមកចូលរួមក្នុងពិធីនេះពោរពេញទៅដោយអត្ថន័យយ៉ាងធំធេង និងប្រកបដោយមោទនភាព ពិសេសការដាក់តាំងបង្ហាញនូវផលិតផលផ្សេងៗមកពីប្រទេសម៉ាឡេស៊ី ចិន កូរ៉េ តួគី ឥណ្ឌា និងផលិតផលក្នុងស្រុកជាច្រើនប្រភេទ ហើយក៏ជាឱកាសដើម្បីទាក់ទាញភ្ញៀវទេសចរណ៍ និងវិនិយោគិនបរទេសឲ្យចូលមកទស្សនា និងបណ្តាក់ទុនលើវិស័យកសិកម្ម ពិសេសវិស័យផលិតកម្មសត្វនិងសុខភាពសត្វនៅក្នុងព្រះរាជាណាចក្រកម្ពុជាផងដែរ។

មានប្រសាសន៍ក្នុងពិធីនេះ លោករីឆាត យាវ អនុប្រធានក្រុមហ៊ុន AMB-Tarsus Events Group ដែលជាក្រុមហ៊ុនរៀបចំពិព័រណ៌នេះ បានសម្តែងនូវអំណរអរគុណយ៉ាងអនេកជូនចំពោះថ្នាក់ដឹកនាំក្រសួង ក្រុមហ៊ុនជាតិ និងអន្តរជាតិ ស្ថាប័នពាក់ព័ន្ធទាំងអស់ សហគមន៍កសិកម្មនិងបងប្អូនប្រជាកសិករ ជាពិសេសឯកឧត្តមរដ្ឋមន្រ្តីដែលបានចំណាយពេលដ៏មានសតម្លៃអញ្ជើញមកជាអធិបតីក្នុងពិធីនេះ។ លោកបានបញ្ជាក់បន្ថែមថានេះជាឱកាសសម្រាប់អ្នកជំនាញផ្នែកឧស្សាហកម្មចិញ្ចឹមសត្វ ផលិតចំណីសត្វ ក្នុងការធ្វើទំនាក់ទំនង ដកស្រង់បទពិសោធន៍លើការងារបច្ចេកទេស និងឱកាសផ្សេងៗដែលទាក់ទងនឹងការធ្វើអាជីវកម្មក្នុងព្រះរាជាណាចក្រកម្ពុជា ជាពិសេសគឺការទាក់ទាញវិនិយោគិនឲ្យងាកមកចាប់អារម្មណ៍បណ្តាក់ទុកលើវិស័យផលិតកម្មសត្វ និងសុខភាពសត្វដែលកំពុងមានសក្តានុពលនៅលើទីផ្សារក្នុងនិងក្រៅប្រទេស។

ឆ្លៀតយកឱកាសដ៏មានតម្លៃនេះ ឯកឧត្តមរដ្ឋមន្រ្តីបានផ្ញើសារជូនដល់អង្គការក្រៅរដ្ឋាភិបាល ដៃគូអភិវឌ្ឍ តំណាងក្រុមហ៊ុនជាតិ

អន្តរជាតិ តំណាងជ័យលាភីមកពីក្រុមហ៊ុនចិញ្ចឹមសត្វ ក្រុមហ៊ុនផលិតចំណីសត្វ កែច្នៃសាច់សត្វ និងអង្ករ ពាណិជ្ជករ ម្ចាស់កសិដ្ឋាន ចិញ្ចឹមសត្វ និងតំណាងកសិករចិញ្ចឹមសត្វ ដែលសារទាំងនោះមានខ្លឹមសារជាបន្តបន្ទាប់ដូចខាងក្រោម៖

ទី១- ត្រូវរួមគ្នាជំរុញការផលិតចំណីសត្វ ដោយប្រើប្រាស់វត្ថុធាតុដើមក្នុងស្រុកដើម្បីបង្កើតការងារជូនពលរដ្ឋនៅមូលដ្ឋាន

កាត់បន្ថយថ្លៃដើម និងការនាំចូលវត្ថុធាតុដើមទាំងនោះ។ ទន្ទឹមនឹងនេះ ត្រូវលើកកំពស់សុខុមាលភាពសត្វ ធានាសុខភាពសាធារណៈ តាមរយៈការអនុវត្តផលិតកម្មសត្វល្អ (Good Animal Husbandry Practices, GAHP)។ ដូច្នេះ ត្រូវសហការជាមួយអង្គភាព ដៃគូអភិវឌ្ឍ វិស័យឯកជន និងស្ថាប័នស្រាវជ្រាវធ្វើការសិក្សាឲ្យបានល្អិតល្អន់នូវចំណីសត្វ ថ្នាំព្យាបាល និងថ្នាំការពារ ឬផលិតផលផ្សេងៗដើម្បីធានាប្រសិទ្ធភាព និងកាត់បន្ថយហានីភ័យដល់សុខភាពសត្វ និងមនុស្សឲ្យបានជាអប្បបរមា។

ទី២- ថ្នាំការពារ និងព្យាបាលសត្វ ចំណីសត្វ ចំណីបន្ថែម សារធាតុផ្សេងៗដែលប្រើក្នុងការផ្សំចំណីសត្វ ត្រូវធ្វើការចុះ

បញ្ជីឲ្យបានត្រឹមត្រូវដោយតម្រូវឲ្យមានស្លាកសញ្ញាជាភាសាខ្មែរ របៀបប្រើ ការថែរក្សាទុកដាក់ និងអាយុកាលដើម្បីធានាគុណភាព សុវត្ថិភាពស្របតាមច្បាប់ដែលបានកំណត់។ ម្ចាស់អាជីវកម្មទាំងអស់ត្រូវអនុវត្តឲ្យបានខ្ជាប់ខ្ជួនតាមខ្លឹមសារនៃអនុក្រឹត្យ សេចក្តីប្រកាស និងសារាចរណ៍ណែនាំដែលចេញដោយក្រសួងកសិកម្ម រុក្ខាប្រមាញ់ និងនេសាទ ប្រយោជន៍ដើម្បីធានាឲ្យបាននូវក្រមសីលធម៌ មនសិការវិជ្ជាជីវៈ និងតម្លាភាពខ្ពស់ដើម្បីផលប្រយោជន៍រួម ធានាបាននូវសុវត្ថិភាព និងសុខភាពសាធារណៈ សុខភាពសត្វ អ្នកប្រើប្រាស់ និងអ្នកចិញ្ចឹមសត្វ ពិសេសប្រជាកសិករផ្ទាស់។

ទី៣- ចូលរួមសហការឲ្យបានល្អជាមួយអង្គភាពជំនាញនានាក្នុងការសម្របសម្រួលពាណិជ្ជកម្មកសិកម្ម សត្វ និងផលិតផលសត្វឲ្យបានល្អប្រសើរ និងមានប្រសិទ្ធភាព ដូចជាការនាំចូលនិងនាំចេញកសិផលក្នុងស្រុកទៅកាន់បណ្តាប្រទេសនានាលើពិភពលោក។ ជំរុញលើកទឹកចិត្តដល់ការបង្កាត់ពូជសត្វដើម្បីបង្កើនសក្តានុពល ផលិតកម្មសត្វ និងការប្រកួតប្រជែង កាត់បន្ថយការនាំចូល ព្រមទាំងពង្រឹងភាពជាដៃគូរវាងផ្នែកសាធារណៈ ឯកជន អ្នកចិញ្ចឹមសត្វ និងបង្កើតបរិយាកាសវិនិយោគលើឧស្សាហកម្មចិញ្ចឹមសត្វ ការកែច្នៃម្ហូបអាហារ និងផលិតផលសត្វឲ្យបានល្អប្រសើរ។

ក្នុងនាមថ្នាក់ដឹកនាំក្រសួង ឯកឧត្តមរដ្ឋមន្រ្តីបានផ្តល់ការជឿទុកចិត្តយ៉ាងមុតមាំថាក្រសួងនឹងបន្តកិច្ចសហប្រតិបត្តិការដ៏ស្អិតល្មួតជាមួយវិស័យឯកជនក្នុងការធានាពង្រឹងភាពជាដៃគូ ក្នុងស្មារតីទទួលខុសត្រូវខ្ពស់តាមអភិក្រម “រដ្ឋ-ឯកជន-ដៃគូអភិ វឌ្ឍន៍និងសហគមន៍”ដើម្បីបង្កើននូវបរិយាកាសអំណោយផលសម្រាប់ការវិនិយោគទុនលើវិស័យផលិតកម្មសត្វនៅក្នុងព្រះរាជា ណាចក្រកម្ពុជានាពេលអនាគត។ ឯកឧត្តមរដ្ឋមន្រ្តីសង្ឃឹមនិងជឿជាក់ថាការតាំងពិព័រណ៍ក្នុងរយៈពេលបីថ្ងៃនេះ នឹងទទួលបាន នូវផ្លែផ្កា តាមរយៈការចែករំលែកព័ត៌មាន បទពិសោធន៍ល្អៗ នឹងមានការវិនិយោគបន្ថែមទៀតលើវិស័យនេះនាពេលអនាគត។