ខណ្ឌរដ្ឋបាលជលផលពោធិ៍សាត់ លែងត្រីរាជ ០១ក្បាល ទម្ងន់១៣៦គីឡូក្រាម ក្នុងតំបន់អភិរក្ស

ចេញ​ផ្សាយ​ ៣០ កញ្ញា ២០២៦ 519

នៅថ្ងៃទី៣០ ខែកញ្ញា ឆ្នាំ២០២៦ លោក ភុន សុវណ្ណា នាយខណ្ឌរដ្ឋបាលជលផលនៃខេត្តពោធិ៍សាត់  និងក្រុមការងារ ខណ្ឌរដ្ឋបាលជលផលនៃមន្ទីរកសិកម្ម រុក្ខាប្រមាញ់ និងនេសាទ ខេត្តពោធិ៍សាត់ បានលែងត្រីរាជ ០១ក្បាល ទម្ងន់ ១៣៦គីឡូក្រាម ប្រវែង២,៣១ម៉ែត្រ ចូលទៅក្នុងកន្លែងអភិរក្សជលផលកំពង់ប្រាក់ ខេត្តពោធិ៍សាត់  ក្រោយទទួលបានពីប្រជានេសាទឈ្មោះ ឡុង គៀង រស់នៅភូមិទី០៣ ឃុំកំពង់លួង ស្រុកក្រគរ ខេត្តពោធិ៍សាត់ ដែលនេសាទបានដោយឧបករណ៍លប ណរ៉ាវ នៅចំណុចផ្លូវក្របី ភូមិអូរអាកល់ ឃុំអូរសណ្តាន់ ស្រុកក្រគរ ខេត្តពោធិ៍សាត់។
ក្នុងដំណើរនេះ ក៏មានការចូលរួមពីផ្នែករដ្ឋបាលជលផលក្រគរ សង្កាត់រដ្ឋបាលជលផលកំពង់លួង និងមានការចូលរួមពីក្រុមការងារនៃអគ្គនាយកដ្ឋានជលផល វិទ្យាស្ថានស្រាវជ្រាវវារីជាតិ និងវារីវប្បកម្មនៃបណ្ឌិត្យសភាកសិកម្មកម្ពុជា ក្រុមការងារគម្រោងអច្ឆរិយភាពទន្លេមេគង្គ និងសហគមន៍នេសាទអូរតាប្រុកផងដែរ។
នាយខណ្ឌរដ្ឋបាលជលផលខេត្តពោធិ៍សាត់ បានគូសបញ្ជាក់ថា ក្នុងឆ្នាំ២០២៦នេះ ខណ្ឌរដ្ឋបាលជលផលពោធិ៍សាត់បានលែងប្រភេទត្រីកម្រនេះសរុប០៧លើក ដោយមានចំនួន១១ក្បាល រួមមាន ត្រីគល់រាំងចំនួន ០៤ក្បាល និងត្រីរាជចំនួន ០៧ក្បាល៕