ឯកឧត្តមអនុរដ្ឋលេខាធិការ ហុង ណារិត អញ្ជើញចូលរួមថ្លែងបទអន្តរាគមន៍ក្នុងសន្និសីទស្តីពីកិច្ចសហប្រតិបត្តិការលើវិស័យកសិកម្ម និងការកាត់បន្ថយភាពក្រីក្រ ចិន(ក្វាងស៊ី)-អាស៊ាន នៅទីក្រុងណាននីង ប្រទេសចិន

ចេញ​ផ្សាយ​ ១៩ កញ្ញា ២០២៥ 264

នៅថ្ងៃទី១៨ ខែកញ្ញា ឆ្នាំ២០២៥ ឯកឧត្តម ហុង ណារិត អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមថ្លែងបទអន្តរាគមន៍ក្នុងសន្និសីទស្តីពីកិច្ចសហប្រតិបត្តិការលើវិស័យកសិកម្ម និងការកាត់បន្ថយភាពក្រីក្រ ចិន(ក្វាងស៊ី)-អាស៊ាន នៅទីក្រុងណាននីង ខេត្តក្វាងស៊ី ប្រទេសចិន។
នាឱកាសនោះ ឯកឧត្តមអនុរដ្ឋលេខាធិការ តំណាងឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានមានថ្លែងដោយសង្កត់ធ្ងន់លើថាមភាពនៃកិច្ចសហប្រតិបត្តិការ និងភាពជាដៃគូរវាងរដ្ឋាភិបាលចិន និងអាស៊ាន ដើម្បីសម្រេចគោលដៅលើកកម្ពស់ជីវភាពរស់នៅរបស់ពលរដ្ឋនៅទីជនបទ និងការធានាសន្តិសុខស្បៀង តាមរយៈការរួមគ្នាអភិវឌ្ឍវិស័យកសិកម្មប្រកបដោយនិរន្តរភាព ស្របតាមគោលនយោបាយអាទិភាពរបស់រាជរដ្ឋាភិបាលកម្ពុជា។
ក្នុងនោះដែរ ឯកឧត្តម ហុង ណារិត ក៏បានចែករំលែកគោលនយោបាយអាទិភាពចំនួនបីរបស់រាជរដ្ឋាភិបាលកម្ពុជា ដើម្បីលើកស្ទួយ និងជំរុញការអភិវឌ្ឍវិស័យកសិកម្មនៅកម្ពុជា ជូនដល់អង្គសន្និសីទ។ ក្នុងនោះមាន៖ (១) គោលនយោបាយរក្សាលំនឹងថ្លៃ សំដៅការលើកកម្ពស់ផលិតកម្មកសិកម្ម លទ្ធភាពរកទីផ្សារ ស្ថិរភាពតម្លៃផលិតផលកសិកម្ម និងលើកកម្ពស់ការប្រកួតប្រជែងទីផ្សារ (២) ការដាក់ពង្រាយមន្រ្តីកសិកម្មឃុំ/សង្កាត់នៅទូទាំងប្រទេស ដើម្បីផ្តល់សេវាបច្ចេកទេសកសិកម្ម និងពង្រីកសេវាឱ្យកាន់តែជិតដល់សហគមន៍កសិកម្មនៅជនបទ និង (៣) ការរៀបចំអភិវឌ្ឍ និងបង្កើតសហគមន៍កសិកម្មទំនើប សំដៅប្រែក្លាយក្រុមកសិករទៅជាសហគមន៍មួយមានរចនាសម្ព័ន្ធល្អ ដោយមានការតម្រង់ទិសទីផ្សារប្រកបដោយសេដ្ឋកិច្ចមាត្រដ្ឋាន និងសហគមន៍ដែលជំរុញដោយមានការប្រើប្រាស់បច្ចេកវិទ្យាទំនើប។
ក្រៅពីការចូលរួមសន្និសីទ ឯកឧត្តម ហុង ណារិត និងគណៈប្រតិភូក្រសួង ក៏បានចូលរួមពិធីបើកពិព័រណ៍ និងធ្វើទស្សនកិច្ចសិក្សានៅកសិដ្ឋានបង្កាត់ពូជស្រូវហាយប្រីដឈានមុខគេមួយរបស់ក្រុមហ៊ុន Guangxi Zhaohe Seed Industry Co., Ltd និងទស្សនាខ្សែច្រវាក់ផលិតកម្មក្នុងកសិដ្ឋានចិញ្ចឹមគោដោយប្រើបច្ចេកវិទ្យាទំនើបមួយកន្លែងរបស់ក្រុមហ៊ុន Guangxi Shibu Dairy Group Co., Ltd៕