ព័ត៌មានផ្សេងៗទៀត
ឯកឧត្តមរដ្ឋមន្ត្រីអំពាវនាវឱ្យយកចិត្តទុកដាក់មន្ត្រីចូលនិវត្តជន
ចេញផ្សាយ ២២ មករា ២០១៨ 2896
ឯកឧត្តមបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអំពាវនាវដល់មន្ត្រីរបស់ឯកឧត្តម ឱ្យបន្តយកចិត្តទុកដាក់ ចំពោះមន្ត្រីចូលនិវត្តន៍ និងពិចារណាក្នុងការនាំយកមន្ត្រី ដែលមានបទពិសោធន៍មកជួយការងារក្នុងអង្គភាព។
ខណៈជួបជាមួយនិវត្តជន ក្រសួងកសិកម្មជាច្រើនរយនាក់ កាលពីព្រឹកថ្ងៃទី១១ ខែមេសា នាទីស្តីការក្រសួងឯកឧត្តមរដ្ឋមន្ត្រីបានប្រាប់ទៅមន្ត្រីក្រោមឱវាទរបស់ឯកឧត្តម ដែលចូលរួមក្នុងពិធីនោះដែរថា គ្រប់អង្គភាពក្រោមឱវាទ ត្រូវបង្កលក្ខណៈងាយស្រួល ចុះសួរសុខទុក្ខដាក់ ចំពោះមន្ត្រីចូលនិវត្តន៍ មន្ត្រីដែលជួបប្រទះបញ្ហាក្នុងគ្រួសារ។
ជាមួយនេះក៏ត្រូវពិចារណារកមន្ត្រីចូលនិវត្តន៍ ដែលមានបទពិសោធន៍ឱ្យមកជួយការងារក្នុងអង្គភាព ហើយដែលអង្គភាពជួយឧបត្ថម្ភទៅនិវត្តជនវិញ ដែលប្រការនេះគឺល្អទាំងសងខាងបង្កើនស្មារតី សាមគ្គីជួយគ្នាទៅវិញទៅមក និងមានគុណប្រយោជន៍ ដល់ការអភិវឌ្ឍន៍វិស័យកសិកម្មផងដែរ។ ឯកឧត្តមរដ្ឋមន្ត្រី បានបន្តដោយស្នើឱ្យយកចិត្តដាក់ផងដែរ ក្នុងការទទួលយកសំណូមពរ ឬចំណាប់អារម្មណ៍ផ្សេងៗរបស់មន្ត្រីចូលនិវត្តន៍ ដែលប្រកបដោយគំនិតស្ថាបនាក្នុងន័យជួយអភិវឌ្ឍន៍ក្នុងវិស័យកសិកម្ម។
ឯកឧត្តមរដ្ឋមន្ត្រី បានបន្តទៀតដោយលើកយកប្រសាសន៍ របស់សម្តេចតេជោហ៊ុន សែន នាយករដ្ឋមន្ត្រីកម្ពុជា ដែលតែងតែរំលឹកថា សូមចាត់ទុកថាកាយវិការ ដែលយើងបានជួយអ្នកដទៃ ជាពិសេសជួយមនុស្សចាស់ជរាគឺដូចជាជួយខ្លួនឯងផ្ទាល់ដែរ ដែលកាយវិការដ៏ល្អប្រពៃ របស់យើងចំពោះមនុស្សជំនាន់មុនទាំងនេះ គឺពិតជាបានបន្សល់ទុកកូនចៅជំនាន់ក្រោយ របស់យើងរៀនសូត្រ និងត្រង់ត្រាប់តាម។
ក្នុងពិធីនោះ ក៏មានការផ្តល់ជូននូវអំណោយជាថវិកា និងសម្ភារៈមួយចំនួនផងដែរ។ គួរ រំលឹកថាជារៀងរាល់ឆ្នាំឯកឧត្តមរដ្ឋមន្ត្រីតែងតែជួបជាមួយមន្ត្រីចូលនិវត្តន៍ ដើម្បីសម្តែងការដឹងគុណ និងសាកសួរសុខទុក្ខផងដែរ៕
