ព័ត៌មានផ្សេងៗទៀត
ថ្នាក់ដឹកនាំក្រសួងកសិកម្ម ចុះវាយតម្លៃផ្ទាល់ដល់ខ្នងផ្ទះកសិករនៅស្រុកចំនួន២ ក្នុងខេត្តបាត់ដំបង ដើម្បីពិនិត្យការទទួលបានពី «គម្រោង EMPOWER»
ចេញផ្សាយ ៣០ កក្កដា ២០២៦ 1705
នៅថ្ងៃទី២៩-៣០ ខែកក្កដា ឆ្នាំ២០២៦ ឯកឧត្តម ខាត់ សុធី អនុរដ្ឋលេខាធិការ ក្រសួងកសិកម្ម បានដឹកនាំក្រុមការងារចុះពិនិត្យទិន្នន័យគ្រួសារកសិករក្រីក្រកម្រិត១ ក្រីក្រកម្រិត២ និងគ្រួសារងាយរងហានិភ័យ ដែលបានដាក់ពាក្យស្នើសុំពីគម្រោង «លើកកម្ពស់ជីវភាពប្រកបដោយប្រសិទ្ធភាពសេដ្ឋកិច្ច ដើម្បីកាត់បន្ថយភាពងាយរងគ្រោះ និងពង្រឹងភាពធន់ (EMPOWER)» ដែលការចុះពិនិត្យដល់ទីតាំងផ្ទាល់នេះ ធ្វើឡើងនៅស្រុកឯកភ្នំ និងស្រុកថ្មគោល ខេត្តបាត់ដំបង ។
ក្នុងឱកាសនោះ ឯកឧត្តម ខាត់ សុធី បានចុះពិនិត្យផ្ទាល់នូវព័ត៌មានដែលប្រជាកសិករបានបំពេញក្នុងពាក្យស្នើសុំ ដោយធ្វើការប្រៀបធៀបជាមួយស្ថានភាពជាក់ស្តែងនៅតាមខ្នងផ្ទះ និងទីតាំងអនុវត្តសកម្មភាព ដើម្បីធានាឱ្យដំណើរការអនុវត្តគម្រោងប្រកបដោយតម្លាភាព ប្រសិទ្ធភាព និងសម្រេចបាននូវការកំណត់គ្រួសារគោលដៅបានយ៉ាងត្រឹមត្រូវ ជាពិសេសគ្រួសារក្រីក្រ និងងាយរងហានិភ័យ។
ទន្ទឹមនឹងនោះ ឯកឧត្តមអនុរដ្ឋលេខាធិការ បានផ្តាំផ្ញើ និងណែនាំដល់មន្ត្រីអនុវត្តគម្រោងគ្រប់លំដាប់ថ្នាក់ ចាប់ពីថ្នាក់ក្រសួង មន្ទីរកសិកម្ម រហូតដល់អាជ្ញាធរមូលដ្ឋាន និងភាគីពាក់ព័ន្ធទាំងអស់ ឱ្យបន្តពង្រឹងកិច្ចសហការឱ្យកាន់តែជិតស្និទ្ធ និងសម្របសម្រួលការអនុវត្តការងារប្រកបដោយស្មារតីទទួលខុសត្រូវខ្ពស់ ដើម្បីធានាឱ្យការអនុវត្តគម្រោង EMPOWER ប្រព្រឹត្តទៅដោយរលូន សម្រេចបានលទ្ធផលតាមផែនការដែលបានកំណត់ និងឆ្លើយតបប្រកបដោយប្រសិទ្ធភាពចំពោះតម្រូវការជាក់ស្តែងរបស់ប្រជាកសិករ។
សូមបញ្ជាក់ថា សម្រាប់ស្រុកថ្មគោល ដែលជាស្រុកគោលដៅបន្ថែម គម្រោងបានជ្រើសរើសកសិករគោលដៅពី ៣ឃុំ៖ គឺឃុំតាម៉ឺន ឃុំតាពូង និងឃុំរូងជ្រៃ ដោយកំណត់មុខផលិតកម្មតែមួយមុខគត់ គឺការដាំបន្លែក្នុងផ្ទះសំណាញ់។ ចំណែកស្រុកឯកភ្នំ គម្រោងបានជ្រើសរើសកសិករគោលដៅពី ២ ឃុំ គឺឃុំព្រែកនរិន្ទ និងឃុំពាមឯក ដោយកំណត់មុខផលិតកម្ម ៥ មុខ។ ប៉ុន្តែ ផ្អែកលើការវាយតម្លៃជាក់ស្តែង កសិករអាចអនុវត្តបានត្រឹម ៣ មុខប៉ុណ្ណោះ គឺការដាំបន្លែក្នុងផ្ទះសំណាញ់ ការចិញ្ចឹមមាន់ស្រែ និងការដាំផ្សិត៕
