ឯកឧត្ដមរដ្ឋលេខាធិការ ហ៊ាន វណ្ណហន អញ្ជើញដឹកនាំក្រុមការងារ ចុះពិនិត្យ​ផលិតកម្ម​សហគមន៍កសិកម្មទំនើប នៅខេត្ដសៀមរាប

ចេញ​ផ្សាយ​ ២៣ ឧសភា ២០២៥ 2050

នៅថ្ងៃទី២៣ ខែឧសភា ឆ្នាំ២០២៥ ឯកឧត្តម ហ៊ាន វណ្ណហន រដ្ឋលេខាធិការ និងជាប្រធានគណៈកម្មាធិការដឹកនាំគម្រោង CASDP អមដំណើរដោយមន្រ្ដីអនុវត្ដ​គម្រោងមន្ទីរកសិកម្មខេត្ដសៀមរាប និងមន្រ្ដីពាក់ព័ន្ធ បានចុះជួបសំណេះសំណាល​ជាមួយ​ប្រធាន និងសមាជិកសហគមន៍កសិកម្មទំនើបសសី  និងសហគមន៍កសិកម្ម​ឃុំពពេលរុងរឿង ស្ថិតនៅខេត្ដសៀមរាប។ 
ជំនួបនេះ ធ្វើឡើងដើម្បីស្វែងយល់ពីស្ថានភាព ដឹកនាំដំណើរការអាជីវកម្ម បញ្ហាប្រឈម និងពិនិត្យលើចំណុចខ្វះខាតបច្ចេកទេសរបស់សហគមន៍ ក្នុងគោល​បំណងរួមតែមួយគឺជួយសហគមន៍ ពង្រឹងប្រសិទ្ធភាពដឹកនាំ ពង្រឹង និង​ពង្រីកទីផ្សារ ដោយផ្អែកលើស្ដង់ដាផលិតផលរួមតែមួយ ឆ្លើយតបតាមតម្រូវការទីផ្សារ និង​លើក​កម្ពស់សេដ្ឋកិច្ចជនបទ។ 
ថ្លែងក្នុងជំនួបនោះ ឯកឧត្តមរដ្ឋលេខាធិការ បានកោតសសើរចំពោះឆន្ទ:បង្កើតឡើង និងដំណើការសហគមន៍ទំនើប ស្របតាមគោលនយោបាយអាទិភាពរបស់រាជ​រដ្ឋាភិបាល​កម្ពុជា។ បើទោះបីសហគមន៍ឆ្លងកាត់ឧបសគ្គ​ប៉ុន្តែនៅតែជំនះរៀបចំចាត់​ចែង​ផែនការ​ផលិតកម្ម និងធ្វើយ៉ាងណាឱ្យផលិតផលមានស្តង់ដារនៅលើទីផ្សារ។ 
បន្ថែមពីនេះទៀត ឯកឧត្ដមរដ្ឋលេខាធិការ ក៏លើកទឹកចិត្ដដល់ប្រធានសហគមន៍ត្រូវ​ផ្តួច​ផ្តើមបង្កើតឱ្យមានកូដសំរាប់ស្វែងរកប្រភព(Traceability Code)ដើម្បីគ្រប់គ្រង ថែរក្សាស្ថិរភាព គុណភាពផលិតផលរបស់សហគមន៍ ដោយត្រូវគ្រប់គ្រងបច្ចេកទេស​ក្នុងផលិតកម្ម ត្រូវតែហ្មត់ចត់ មានស្តង់ដារតែមួយ ដែលត្រូវតាមការចង់​បាននៅ​លើទីផ្សារ។ 
បន្ទាប់ពីជំនួបពិភាក្សា ឯកឧត្ដមរដ្ឋលេខាធិការ រួមជាមួយសហការីអមដំណើរ និងមន្រ្ដី​ពាក់ព័ន្ធ​បានបន្តចុះពិនិត្យមើលកសិដ្ឋានដាំបន្លែ ហេដ្ឋារចនាសម្ព័ន្ធរបស់សហគមន៍ ដើម្បីពិនិត្យ​មើលស្ថានភាពក្នុងការដាំដុះជាក់ស្ដែង ក៏ដូចជាការផ្ដល់មតិយោបល់​កែលម្អ​បន្ថែម និងបានចុះពិនិត្យមើលផ្ទះសំណាញ់១ខ្នង ដែលទទួលបានពី ODA/ Korea ផ្តល់ជូនដល់សហគមន៍៕