ឯកឧត្តមអនុរដ្ឋលេខាធិការ ទឹម បូរក្ស អញ្ជើញដឹកនាំក្រុមការងារចម្រុះ ចុះបង្ក្រាបបទបទល្មើសជលផល ស្រុកកំពង់សៀម ខេត្តកំពង់ចាម

ចេញ​ផ្សាយ​ ២៧ សីហា ២០២៥ 349

នៅថ្ងៃទី២៧ ខែសីហា ឆ្នាំ២០២៥ ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តាមការណែនាំរបស់ឯកឧត្តមរដ្ឋលេខាធិការ ហាស់ សារ៉េត អញ្ជើញដឹកខណ្ឌរដ្ឋបាលជលផលកំពង់ចាម អធិការដ្ឋានរដ្ឋបាលជលផលមេគង្គ សហការជាមួយអាជ្ញាធរស្រុកកំពង់សៀម ដោយមានការសម្របសម្រួលពីឯកឧត្តមព្រះរាជអាជ្ញា នៃអយ្យការអមសាលាដំបូងខេត្តកំពង់ចាម បានចុះប្រតិបត្តិការបង្ក្រាបបទល្មើសជលផល ដោយរុះរើ និងបំផ្លាញចោលនូវឧបករណ៍ល្មើសច្បាប់ចំនួនពីរករណី នៅក្នុងស្រុកកំពង់សៀម ខេត្តកំពង់ចាម។

ឧបករណ៍ល្មើសច្បាប់ដែលក្រុមការងាររឹបអូសបាន នៅចំណុចកន្លែងរមាស់ ឃុំកៀនជ្រៃ ស្រុកកំពង់សៀម ខេត្តកំពង់ចាម រួមមាន លូស្បៃមុងចំនួន ១៥មាត់  របាំងស្បៃមុងប្រវែង ៣៧៥ម៉ែត្រ  បង្គោលចម្រឹងចំនួន ២២៥ដើម និងចាក់លែងកូនត្រីចម្រុះចូលបឹងធម្មជាតិវិញ។

ចំណែក ឧបករណ៍ល្មើសច្បាប់ដែលក្រុមការងាររឹបអូសបាន នៅចំណុចបឹងត្រពាំងផ្ដៅ ឃុំកៀនជ្រៃ ស្រុកកំពង់សៀម ខេត្តកំពង់ចាម រួមមាន ស្បៃមុងចំនួន ១៣មាត់  របាំងស្បៃមុងប្រវែង ៣២៥ ម៉ែត្រ បង្គោលចម្រឹងចំនួន ១៩៥ដើម និងចាក់លែងត្រីចម្រុះចូលបឹងធម្មជាតិវិញ។

ជាចុងបញ្ចប់ឯកឧត្តមអនុរដ្ឋលេខាធិការ បានគូសបញ្ជាក់ថា ក្រុមការងារនិងបន្តត្រួតពិនិត្យ និងបង្ក្រាបបទល្មើសក្នុងភូមិសាស្ត្រទន្លេ បឹង ព្រែក តាមបណ្តាលស្រុកក្នុងខេត្តកំពង់ចាម និងផ្សព្វផ្សាយដល់ប្រជានេសាទឈប់នេសាទដោយប្រើប្រាស់ឧបករណ៍ល្មើសច្បាប់៕