ថ្នាក់ដឹកនាំក្រសួងកសិកម្ម ដឹកនាំកិច្ចប្រជុំពិនិត្យវឌ្ឍនភាពគម្រោង EMPOWER នៅខេត្តបន្ទាយ​មានជ័យ ដើម្បីពង្រឹងប្រសិទ្ធភាព និងតម្លាភាពក្នុងការផ្តល់​ផល​ប្រយោជន៍ជូនប្រជាពលរដ្ឋ

ចេញ​ផ្សាយ​ ២៦ កញ្ញា ២០២៦ 352

នៅថ្ងៃទី២៥ ខែកញ្ញា ឆ្នាំ២០២៦ ឯកឧត្តម ស្រី វុឌ្ឍី អនុរដ្ឋលេខាធិការក្រសួង​កសិកម្ម រុក្ខាប្រមាញ់ និងនេសាទ និងជាប្រធានទទួលបន្ទុកអនុវត្តគម្រោង​លើកកម្ពស់​ជីវភាព ប្រកបដោយប្រសិទ្ធភាពសេដ្ឋកិច្ច ដើម្បីកាត់បន្ថយភាព​ងាយរ​ងគ្រោះ និងពង្រឹងភាពធន់ (EMPOWER) ប្រចាំក្រុងសិរីសោភ័ណ បានដឹកនាំកិច្ចប្រជុំពិនិត្យ និងពិភាក្សាអំពីវឌ្ឍនភាពការអនុវត្តគម្រោង នៅសាលប្រជុំមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ។
កិច្ចប្រជុំនេះមានការអញ្ជើញចូលរួមពី លោកស្រី អន ស៊ីថា ប្រធានស្តីទីមន្ទីរ​កសិកម្ម រុក្ខាប្រមាញ់ និងនេសាទខេត្តបន្ទាយ​មានជ័យ និងជាប្រធានអនុវត្ត គម្រោងថ្នាក់ខេត្ត លោក សំ ឆោមសង្ហា អនុប្រធានអគ្គលេខាធិការដ្ឋាន អ្នកសម្របសម្រួល​គម្រោងថ្នាក់ស្រុក មន្ត្រីជំនាញពាក់ព័ន្ធ និងមន្ត្រីកសិកម្ម សង្កាត់មកពីសង្កាត់​ទឹកថ្លា ភ្នៀត កំពង់ស្វាយ និងម្កាក់។
កិច្ចប្រជុំបានផ្តោតលើ ការ​ពិនិត្យ​វឌ្ឍនភាព​ការងារចុះពិនិត្យទីតាំង ​សម្រាប់​ដំឡើង​ផ្ទះ​​សំណាញ់ ទ្រុងមាន់ និងរោងផ្សិត ព្រមទាំង ការត្រៀមរៀបចំសន្និបាត កំណើត​ដំបូងសហគមន៍ទំនើប សម្រាប់បន្តជំរុញការអនុវត្តសកម្មភាពគម្រោង ឱ្យស្រប​តាម​ផែនការកំណត់៕