Other News
ឯកឧត្តមរដ្ឋលេខាធិការ ឃុន សាវឿន អញ្ជើញដឹកនាំក្រុមការងារចម្រុះ ចុះសម្របសម្រួលដោះស្រាយទំនាស់រវាងប្រជានេសាទដូចគ្នា នៅចំណុចអាងទឹកទំនប់៧៨ ក្រុងសៀមរាប ខេត្តសៀមរាប
ចេញផ្សាយ ៩ មីនា ២០២៥ 2518
នៅថ្ងៃទី០៧ ខែមីនា ឆ្នាំ២០២៥ ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញដឹកនាំក្រុមការងារចម្រុះ ចុះសម្របសម្រួល និងដោះស្រាយទំនាស់រវាងអ្នកនេសាទ និងអ្នកនេសាទដូចគ្នា ដែលពួកគាត់ធ្វើការនេសាទប្រើឧបករណ៍មងរាយ សន្ទូច និងឧបករណ៍លបរ៉ាវ នៅចំណុចអាងទឹកទំនប់៧៨ (អាងទឹកជាយឬស្សី) ស្ថិតនៅក្នុងសង្កាត់សៀមរាប សង្កាត់ស្វាយដង្គំ និងសង្កាត់សំបួរ ក្រុងសៀមរាប ខេត្តសៀមរាប។
ដំណើរបេសកកម្មនោះ មានការចូលរួមពី លោក ហាយ យង់ អភិបាលរងនៃគណៈអភិបាលក្រុងសៀមរាប កម្លាំងយោធភូមិភាគទី៤ ផ្នែកសឹករងខេត្ត ប៉ុស្តិ៍នគរបាលរដ្ឋបាលស្វាយដង្គំ និងគណៈកម្មការសហគមន៍នេសាទចុងឃ្នៀស និងប្រជានេសាទ សរុបចំនួន១០៥នាក់ ស្ត្រី១៤នាក់។
ឯកឧត្តមរដ្ឋលេខាធិការ បានគូសបញ្ជាក់ថា ទំនាស់នេះកើតឡើងបណ្តាលមកពីបងប្អូនប្រជានេសាទមួយចំនួនប្រើប្រាស់ឧបករណ៍នេសាទ លបរ៉ាវក្រឡាតូចជាង ៣សង់ទីម៉ែត្រ និងប្រវែងរាប់រយម៉ែត្រ ខុសពីការកំណត់ដោយច្បាប់ស្ដីពីជលផល។ កន្លងមកកម្លាំងសមត្ថកិច្ចខណ្ឌរដ្ឋបាលជលផល សហការជាមួយអាជ្ញាធរមូលដ្ឋាន ក៏បានចុះផ្សព្វផ្សាយច្បាប់ស្តីពីជលផល និងបានចុះបង្ក្រាបបទល្មើសជលផល នៅតំបន់នេះជាប្រចាំ។ បន្ថែមពីនេះ ឯកឧត្តមរដ្ឋលេខាធិការ និងមន្ត្រីជំនាញបានពន្យល់អំពីការប្រើប្រាស់ឧបករណ៍នេសាទ តាមច្បាប់ស្តីពីជលផល និងការអនុវត្តន៍ច្បាប់ ជូនដល់បងប្អូនប្រជានេសាទ ដែលមានទំនាស់លើការនេសាទនេះផងដែរ។
ជាលទ្ធផលនៃការសម្របសម្រួល បងប្អូនប្រជានេសាទនៅតំបន់នោះ បានព្រមព្រៀងស្រុះស្រួលគ្នា ឈប់ប្ដឹងផ្តល់គ្នាតទៅទៀត និងបានឯកភាពប្រើប្រាស់ឧបករណ៍នេសាទលបរ៉ាវ ក្រឡាចាប់ពី៣សង់ទីម៉ែត្រឡើង ប្រវែង៥០ម៉ែត្រ/១គ្រួសារ និងចំនួន២របាំង/លបរ៉ាវ ដែលមានចន្លោះពី ១ទៅ១រ៉ាវ ប្រវែង១០០ម៉ែត្រ ដោយស្ម័គ្រចិត្ត៕
