ពិធីចែកកូនដូងក្រអូបចំនួន ៨០០ដើម ជូនប្រជាកសិករ ២០០គ្រួសារ នៅស្រុកកោះញែក ខេត្តមណ្ឌលគិរី

ចេញ​ផ្សាយ​ ១៥ សីហា ២០២៦ 2325

នៅថ្ងៃទី១៤ ខែសីហា ឆ្នាំ២០២៦ មន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី បានសហការជាមួយក្រុមការងាររាជរដ្ឋាភិបាលចុះមូលដ្ឋានខេត្ត រៀបចំពិធីចែកកូនឈើហូបផ្លែប្រភេទកូនដូងក្រអូប សរុបចំនួន ៨០០ដើម ជូនដល់ប្រជាកសិករចំនួន ២០០គ្រួសារ មកពីបណ្តាឃុំនានាក្នុងស្រុកកោះញែក ខេត្តមណ្ឌលគិរី។
ពិធីនេះបានប្រព្រឹត្តទៅនៅសាលប្រជុំសាលាស្រុកកោះញែក ក្រោមអធិបតីភាព ឯកឧត្តម អ៊ួង កុសល រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកកោះញែក និងលោក ជាក់ ម៉េងហ៊ាង អភិបាលរង នៃគណៈអភិបាលខេត្តមណ្ឌលគិរី ព្រមទាំងមានការអញ្ជើញចូលរួមពីសំណាក់ថ្នាក់ដឹកនាំមន្ទីរ-អង្គភាពពាក់ព័ន្ធជុំវិញខេត្ត អភិបាលរងស្រុក មន្ត្រីជំនាញកសិកម្ម និងអ្នកពាក់ព័ន្ធជាច្រើនរូបទៀត។
ការចែកកូនដូងក្រអូបជូនប្រជាកសិករនាពេលនេះ ក្នុងគោលបំណងនៃការចូលរួមជំរុញ និងគាំទ្រដល់ការអភិវឌ្ឍវិស័យកសិកម្មនៅមូលដ្ឋាន ដោយផ្តោតលើការបង្កើនផលិតភាព ការធ្វើពិពិធកម្មដំណាំ និងការបង្កើតឱកាសសេដ្ឋកិច្ចបន្ថែមជូនប្រជាកសិករ។ ជាការរួមចំណែកកាត់បន្ថយការពឹង ផ្អែកលើប្រភពចំណូលតែមួយ និងពង្រឹងស្ថិរភាពជីវភាពរបស់គ្រួសារកសិករ។
ទន្ទឹមនឹងនោះ សកម្មភាពនេះក៏បង្ហាញពីការយកចិត្តទុកដាក់ ជាពិសេស នឹងជួយបង្កើនសកម្មភាពដាំដុះដំណាំហូបផ្លែ បង្កើនគម្របពណ៌បៃតង និងរួមចំណែកធ្វើឱ្យវិស័យកសិកម្មនៅខេត្តមណ្ឌលគិរីកាន់តែមានសក្តានុពល និងរីកចម្រើន៕