ឯកឧត្តមរដ្ឋមន្ត្រី វេង សាខុន និងឯកឧត្តមអភិបាលនៃគណ:អភិបាលខេត្តកំពង់ធំ បានអញ្ជើញជាអធិបតីភាពក្នុងពិធីទិវាពិភពលោកប្រយុទ្ធប្រឆាំងនឹងការធ្លាក់ចុះគុណភាពដី និងគ្រោះរំាងស្ងួត ក្រោមពាក្យស្លោក “រួមគ្នាប្រយុទ្ធប្រឆំាងនឹងគ្រោះរំាងស្ងួត” ឆ្នាំ២០២២ បានប្រារព្វនៅក្នុងសហគមន៍ព្រៃឈើឃ្មុំស្រករថ្លុកឬស្សី ភូមិត្រពាំងថ្ម ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ

ចេញ​ផ្សាយ​ ១៧ មិថុនា ២០២២ 2276

នៅព្រឹកថ្ងៃសុក្រ ៣រោច ខែជេស្ឋ ឆ្នាំខាល ចត្វាស័កព.ស. ២៥៦៦ ត្រូវនឹងថ្ងៃទី១៧ ខែមិថុនា ឆ្នាំ២០២២ ទិវាពិភពលោកប្រយុទ្ធប្រឆាំងនឹងការធ្លាក់ចុះគុណភាពដី និងគ្រោះរំាងស្ងួត ក្រោមពាក្យស្លោក “រួមគ្នាប្រយុទ្ធប្រឆំាងនឹងគ្រោះរំាងស្ងួត” ឆ្នាំ២០២២ បានប្រារព្វនៅក្នុងសហគមន៍ព្រៃឈើឃ្មុំស្រករថ្លុកឬស្សី ភូមិត្រពាំងថ្ម ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ស្ថិតក្រោមអធិបតីភាពឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងឯកឧត្តម ងួន រតន: អភិបាលនៃគណ:អភិបាលខេត្តកំពង់ធំ និងមានវត្តមានឯកឧត្តម លោកជំទាវជាថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ ឯកឧត្តមអភិបាលរងខេត្ត ឯកឧត្តម លោកជំទាវ លោក លោកស្រី នាងកញ្ញា ភ្ញៀវកិត្តិយសជាតិ-អន្តរជាតិ ថ្នាក់ដឹកនាំមន្ទីរជុំវិញខេត្ត កងកំលាំងប្រដាប់អាវុធ អាជ្ញាធរមូលដ្ឋាន និងបងប្អូនប្រជាពលរដ្ឋប្រមាណ ៣០០នាក់។ បន្ទាប់ពីបានស្តាប់យ៉ាងយកចិត្តទុកដាក់មតិស្វាគមន៍ និងរបាយការណ៍ដ៏មានខ្លឹមសារជុំវិញស្ថានភាពជារួមនៃខេត្តកំពង់ធំដោយសង្ខេម និងចំណាច់អារម្មណ៍ទាក់ទងនឹងប្រធានបទខាងលើរបស់ឯកឧត្តមអភិបាលនៃគណ:អភិបាលខេត្តរួចមក ឯកឧត្តមរដ្ឋមន្ត្រីបានវាយតម្លៃខ្ពស់ចំពោះគណ:អភិបាលខេត្ត ស្រុក ដៃគូពាក់ព័ន្ធទាំងអស់ ដែលបានរៀបចំពិធីដ៏មានអត្ថន័យនេះឡើងទទួលបានលទ្ធផលយ៉ាងល្អប្រសើរ នៅលើទឺកដីដែលសម្បូរទៅដោយព្រៃឈើ ជម្រកសត្វព្រៃ ធនធានធម្មជាតិ និងសំណង់ប្រាសាទបូរាណសំបូរព្រៃគុកដែលជាបេតិកភណ្ឌពិភពលោក។ ឆ្លៀតក្នុងឱកាសនេះ ឯកឧត្តមរដ្ឋមន្ត្រីបានជម្រាបជូនអង្គពិធីអំពីខ្លឹមសារ និងអត្ថន័យនៃទិវាពិភព លោកប្រយុទ្ធប្រឆាំងនឹងការធ្លាក់ចុះគុណភាពដី និងគ្រោះរំាងស្ងួត ក្រោមពាក្យស្លោក “រួមគ្នាប្រយុទ្ធប្រឆំាងនឹងគ្រោះរំាងស្ងួត” ថាទិវានេះ តែងតែប្រារព្ធធ្វើជាសាកលរៀងរាល់ឆ្នាំនៅថ្ងៃទី១៧ ខែមិថុនា ចាប់តាំងពីឆ្នាំ១៩៩៥ តរៀងមក។ ឯកឧត្តមរដ្ឋមន្ត្រីបានរំលេចជូនអង្គពិធីជ្រាបយ៉ាងច្បាស់អំពីមូលហេតុផ្សេងៗ ដែលបង្កឲ្យមានការធ្លាក់ចុះគុណភាពដី និងគ្រោះរាំងស្ងួត ព្រមទាំងផលវិបាកផ្សេងៗ ដែលជះឥទ្ធិពលមកលើសត្តនិករនៅលើភពផែនដី ពិសេសជីវភាពរស់នៅ និងសន្តិសុខស្បៀង។ ព្រឹត្តិការណ៍នាព្រឹកនេះ ចង់បង្ហាញឲ្យឃើញ ប្រាប់ឲ្យដឹង និងទាក់ទាញចំណាប់អារម្មណ៍ពិភពលោកទៅលើគ្រោះរាំងស្ងួត និងគ្រោះទឹកជំនន់ដែលពិភពលោក ក៏ដូចជាកម្ពុជាបាននិងកំពុងជួបប្រទះរៀងរាល់ឆ្នាំ។ ជាងនេះទៅទៀត កង្វះខាតស្បៀងអាហារ និងទឹក ការធ្លាក់ចុះគុណភាពដី ភ្លើងឆេះព្រៃ ជំងឺឆ្លងសត្វ-ដំណាំ សត្វល្អិតចង្រៃបំផ្លាញផលដំណាំ គឺភាគ ច្រើនបណ្តាលមកពីគ្រោះរាំងស្ងួតធ្ងន់ធ្ងរ និងមានរយ:ពេលយូ បានកើតមានកាន់តែខ្លាំងឡើងក្នុងប៉ុន្មានឆ្នាំចុងក្រោយនេះ។ ចំនួនប្រជាជនពិភពលោកនៅតែបន្តកើនឡើង ធ្វើឲ្យតម្រូវការដីដើម្បីផលិតស្បៀង គិតរហូតមកដល់ពេលបច្ចុប្បន្ននេះ ៧០% នៃផ្ទៃដីរបស់យើងត្រូវបានផ្លាស់ប្តូរជា សកល ដោយដាក់សម្ពាធយ៉ាងខ្លាំងលើផលិតភាព និងនិរន្តរភាពនៃធនធានដី។ ពិតណាស់កម្ពុជាប្រារព្ធពិធីថ្ងៃនេះ ស្របពេលដែលពិភពលោកកំពុងធ្វើសកម្មភាព និងយុទ្ធនាការពាក់ព័ន្ធជាច្រើនដើម្បីអបអរសាទរទិវាដ៏មានអត្ថន័យនេះ សំដៅបង្កើនចំណាប់អារម្មណ៍របស់សាធារណ: ជន អំពីសកម្មភាពដែលយើងកំពុងធ្វើជារៀងរាល់ថ្ងៃទាក់ទងនឹងការបរិភោគ ស្លៀកពាក់ ជីវិតរស់នៅសុទ្ធតែជះឥទ្ធិពល ឬអាចធ្វើឲ្យប៉ះពាល់ដល់ធនធានដីយើងទាំងមូល។ លោកបានបន្តថាការធ្លាក់ចុះគុណភាពដីដែលនាំឱ្យមានការថយចុះដីស្រែ ចម្ការ ដែលវិបត្តិទាំង អស់នេះ បាននិងកំពុងកើតឡើងដោយសារការបាត់បង់ព្រៃឈើ និងប្រព័ន្ធបរិស្ថាន រួមទាំងការធ្វើសកម្មភាពលើសកំណត់ ឬលើសសមត្ថភាពរបស់ដី ការដាំដំណាំតែមួយមុខ ការប្រើជី និងថ្នាំកសិកម្មលើសកម្រិត ឬមិនត្រឹមត្រូវតាមបច្ចេកទេស ការជីកយករ៉ែ ការសាងសង់ទំនប់ទឹកមិនត្រឹមត្រូវ ការកាប់បំផ្លាញព្រៃឈើ ព្រៃលិចទឹក ការពង្រីកទីប្រជុំជនធំៗ។ បញ្ហាទាំងឡាយ ទាំងពួង បានទាក់ទាញនូវចំណាប់អារម្មណ៍ជាច្រើនពីសហគមន៍ជាតិ និងអន្តរជាតិ ចំពោះផលប៉ះពាល់សេដ្ឋកិច្ច សង្គម និងបរិស្ថាន។ ជាក់ស្តែង កម្ពុជាក៏ទទួលរងគ្រោះផងដែរពីការប្រែប្រួលអាកាស ធាតុ ដូចជាគ្រោះទឹកជំនន់ ការកើនកម្តៅ គ្រោះរាំងស្ងួត និងខ្យល់ព្យុះ ដែលបង្កលក្ខណៈប៉ះពាល់ធ្ងន់ធ្ងរដល់ផលិតកម្មកសិកម្ម ការចិញ្ចឹមសត្វ ព្រៃឈើ និងជលផលផងដែរនាពេលកន្លងមកនេះ ។ ទិវាដែលយើងកំពុងប្រារព្វនាពេលនេះ ឯកឧត្តមរដ្ឋមន្ត្រីបានបញ្ជាក់ថា វាបានបង្ហាញអំពីឆន្ទៈ ការប្តេជ្ញាចិត្តយ៉ាងមុតមាំរបស់កម្ពុជាក្នុងការចូលរួមជាមួយពិភពលោក ក្នុងក្របខណ្ឌនៃការអនុវត្តអនុសញ្ញា ដែលកម្ពុជាជាភាគីហត្ថលេខីនៃអនុសញ្ញាសហប្រជាជាតិទប់ ស្កាត់រហោស្ថានកម្ម ឬឱនភាពដីនៅថ្ងៃទី១៥ ខែតុលា ឆ្នាំ១៩៩៤ ហើយបានផ្តល់សច្ចាប័ននៅថ្ងៃទី១៣ ខែសីហា ឆ្នាំ១៩៩៧ ដោយមានក្រសួងកសិកម្ម រុក្ខាប្រមាញ់ និងនេសាទ ជាស្ថាប័នបង្គោល។ ដើម្បីលើកទឹកចិត្ត និងបង្កើនចំណាប់អារម្មណ៍ដល់គ្រប់តួអង្គពាក់ព័ន្ធទាំងអស់ឱ្យបានយល់ជ្រួតជ្រាបអំពីព្រឹត្តិការណ៍ដ៏មានសារៈសំខាន់នេះ។ ចុងបញ្ជប់ ឯកឧត្តមរដ្ឋមន្ត្រីបានផ្តល់អនុសាសន៍សំខាន់ៗមួយចំនួនបន្ថែមលើអនុសាសន៍ដែលបានជូនកន្លងមក ជូនអង្គពិធី ពិសេសអ្នកពាក់ព័ន្ធផ្ទាល់ ថាយើងត្រូវសហការចូលរួមប្រយុទ្ធប្រឆាំងនឹងការធ្លាក់ចុះគុណភាពដី និងគ្រោះរំាងស្ងួត ក្រោមពាក្យស្លោក “រួមគ្នាប្រយុទ្ធប្រឆំាងនឹងគ្រោះរំាងស្ងួត” ឲ្យសកម្ម និងកាន់តែមាន ប្រសិទ្ធភាពខ្ពស់ ប្រយោជន៍ដើម្បីធានាសន្តិសុខស្បៀង និរន្តរភាព ស្ថិរភាព គុណភាព និងវិបុល ភាពនៃជីវិតរស់នៅរបស់មនុស្ស សត្វ រុក្ខាជាតិ បរិស្ថាន និងធនធានដីកសិកម្មរបស់យើង។ នាឱកាសនេះ ឯកឧត្តមរដ្ឋមន្ត្រី និងឯកឧត្តមអភិបាលខេត្ត ភ្ញៀវជាតិ-អន្តរជាតិបានចែកកូនឈើ និងពូជដំណាំជូនសមាជិកសហគមន៍យកទៅដាំដុះក្នុងដែនសហគមន៍ និងបានដាំកូនឈើទុកជានិមិត្តរូប បង្ហាញពីការរួមសាមគ្គី និងសហការគ្នារឹងមាំអនុវត្តពាក្យស្លោកខាងលើឲ្យកាន់មាន ប្រសិទ្ធភាពសម្រាប់ខេត្តកំពង់ធំចាប់ពីថ្ងៃនេះតទៅ។