ថ្នាក់ដឹកនាំក្រសួងកសិកម្ម​ អញ្ជើញបំពេញទស្សនកិច្ចនៅទីក្រុងប៉េកាំង សារធារណរដ្ឋប្រជាមានិតចិន

ចេញ​ផ្សាយ​ ១២ កញ្ញា ២០២៦ 409

​កាលពីថ្ងៃទី៨ ដល់ថ្ងៃទី១០ ខែកញ្ញា ឆ្នាំ២០២៦ ប្រតិភូក្រសួងកសិកម្ម រុក្ខាប្រមាញ់ និងនេសាទ ដឹកនាំដោយ ឯកឧត្តម គី ច័ន្ទរំដួល និងឯកឧត្តម សៀក ឡេង បានអញ្ជើញបំពេញទស្សនកិច្ចផ្លូវការនៅទីក្រុងប៉េកាំង សារធារណរដ្ឋប្រជាមានិតចិន ក្នុងគោលបំណងដកស្រង់បទពិសោធន៍លើបច្ចេកវិទ្យាទំនើប និងប្រព័ន្ធបញ្ញាសិប្បនិម្មិត(AI) ព្រមទាំងស្វែងរកកាលានុវត្តភាពនៃកិច្ចសហប្រតិបត្តិការកសិកម្មឌីជីថល ឆ្លើយតបទៅនឹងការអនុវត្ត «គំនិតផ្ដួចផ្ដើមខ្សែក្រវាត់ និងផ្លូវ» និង«ច្រករបៀងមច្ឆានិងអង្ករ»។
​ដំណើរទស្សនកិច្ចនេះឆ្លើយតបចំទិសដៅយុទ្ធសាស្ត្ររបស់រាជរដ្ឋាភិបាលកម្ពុជា ក្នុងការរុញច្រាន «បរិវត្តកម្មវិស័យកសិកម្ម» (Agricultural Transformation) ដោយធ្វើការផ្លាស់ប្តូរយ៉ាងសកម្មពីកសិកម្មគ្រួសារបែបប្រពៃណីទៅជា «កសិកម្មទំនើប កសិ-ពាណិជ្ជកម្ម និងកសិ-ឧស្សាហកម្ម» ដែលពឹងផ្អែកលើបច្ចេកវិទ្យាច្បាស់លាស់ និងការប្រកួតប្រជែងលើទីផ្សារ។
​ក្នុងដំណើរទស្សនកិច្ចនេះ ឯកឧត្តម គី​ ច័ន្ទរំដួល បានជួបពិភាក្សាការងារជាមួយតំណាងក្រុមហ៊ុន និងស្ថាប័នស្រាវជ្រាវឌីជីថលឈានមុខជាច្រើន រួមមាន៖​ ​(១)​ក្រុមហ៊ុន Daxing Agriculture and Forestry Science and Technology ផ្តោតលើការស្រាវជ្រាវ និងអភិវឌ្ឍបច្ចេកវិទ្យាកសិកម្មទំនើប (២)ក្រុមហ៊ុន Go Global Hub មជ្ឈមណ្ឌលសេវាកម្មច្នៃប្រឌិត (Innovation Service Base) សម្រាប់គាំទ្រសហគ្រាសសេដ្ឋកិច្ចឌីជីថល។
(៣)ក្រុមហ៊ុន China State Farms Group Co., Ltd សហគ្រាសរដ្ឋឈានមុខលើការគ្រប់គ្រងខ្សែច្រវាក់ផលិតកម្ម និងពាណិជ្ជកម្មកសិកម្ម (៤)ផ្សារ Beijing Xinfadi មជ្ឈមណ្ឌលបោះដុំផលិតផលកសិកម្មដ៏ធំជាងគេនៅប៉េកាំង ដើរតួនាទីយ៉ាងសំខាន់ក្នុងការតភ្ជាប់ទីផ្សារកសិផល (៥)Beijing Yizhuang International Science & Innovation Industrial Park ស្ថាប័នអភិវឌ្ឍន៍បច្ចេកវិទ្យាដ្រូន និងបញ្ញាសិប្បនិម្មិត(AI) និង(៦)ក្រុមហ៊ុន Huaxin Zhong'an Security Group ក្រុមហ៊ុនសេវាកម្មសន្តិសុខ និងគ្រប់គ្រងហានិភ័យឈានមុខគេនៅប្រទេសចិន។
​ឯកឧត្តម គី ច័ន្ទរំដួល បានបញ្ជាក់ថាទស្សនកិច្ចនេះ មិនត្រឹមតែជាការផ្លាស់ប្តូរបទពិសោធន៍បច្ចេកវិទ្យាប៉ុណ្ណោះទេ ប៉ុន្តែជាជំហានយុទ្ធសាស្ត្រក្នុងការប្រែក្លាយកម្ពុជាជាជម្រកសន្តិសុខស្បៀង និងជាប្រភពផ្គត់ផ្គង់កសិផលគុណភាពខ្ពស់ តាមរយៈការធ្វើទំនើបកម្មកសិកម្ម ស្របតាមក្របខណ្ឌកិច្ចសហប្រតិបត្តិការត្បូងពេជ្រកម្ពុជា-ចិន៕