Other News
ឯកឧត្តមរដ្ឋលេខាធិការ គង់ ច័ន្ទវាសនា អញ្ជើញជាអធិបតីក្នុងពិធីបិទកិច្ចប្រជុំបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់មន្ទីរកសិកម្ម រុក្ខាប្រមាញ់ និងនេសាទខេត្តព្រះសីហនុ
ចេញផ្សាយ ២១ មីនា ២០២៦ 1290
នារសៀលថ្ងៃទី២០ ខែមីនា ឆ្នាំ២០២៦ ឯកឧត្តម គង់ ច័ន្ទវាសនា រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួម ពិធីបិទកិច្ចប្រជុំបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់មន្ទីរកសិកម្ម រុក្ខាប្រមាញ់ និងនេសាទ ខេត្តព្រះសីហនុ។ កម្មវិធីនេះមានការអញ្ជើញចូលរួមពីលោកជំទាវអនុរដ្ឋលេខាធិការ ហ៊ូ សុពណ៌ និងឯកឧត្តម នៃ គង់ អភិបាលរងនៃគណៈអភិបាលខេត្តព្រះសីហនុផងដែរ។
ក្នុងនាមក្រសួងកសិកម្ម រុក្ខាប្រមាញ់ និង នេសាទ ឯកឧត្តមរដ្ឋលេខាធិការបានថ្លែងនូវការកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងមន្ត្រីរាជការនៃមន្ទីរកសិកម្ម ព្រមទាំងមន្ត្រីកសិកម្មឃុំទាំងអស់ ដែលបានខិតខំប្រឹងប្រែងបំពេញការងារក្នុងស្មារតីទទួលខុសត្រូវខ្ពស់ និងសម្រេចបានលទ្ធផលយ៉ាងល្អប្រសើរ។ ឯកឧត្តមក៏បានថ្លែងអំណរគុណផងដែរ ចំពោះកិច្ចសហការល្អ និងការគាំទ្ររបស់រដ្ឋបាលខេត្ត ដល់មន្ទីរកសិកម្ម និងមន្ត្រីកសិកម្មឃុំ ក្នុងការអនុវត្តការងារ។
ទន្ទឹមនេះ ឯកឧត្តមបានជម្រាបជូនអង្គពិធីអំពីវឌ្ឍនភាពនៃវិស័យកសិកម្ម និងលទ្ធផលការងារដែលក្រសួងសម្រេចបានក្នុងឆ្នាំ២០២៥កន្លងទៅ ក្នុងការជំរុញអនុវត្តយុទ្ធសាស្ត្របញ្ចកោណដំណាក់កាលទី១ និងកម្មវិធីគោលនយោបាយអាទិភាពទី៥ និងទី៦របស់រាជរដ្ឋាភិបាល ជាពិសេសការដោះស្រាយបញ្ហាប្រឈមជូនប្រជាកសិករនៅទូទាំងប្រទេស។
សម្រាប់ទិសដៅអនុវត្តបន្ត ឯកឧត្តម គង់ ច័ន្ទវាសនា បានផ្តល់អនុសាសន៍ដល់មន្ទីរកសិកម្មខេត្តព្រះសីហនុ និងមន្ត្រីកសិកម្មឃុំសិក្សាទីតាំងដែលមានសក្តានុពលដើម្បីបង្កើតសហគមន៍កសិកម្មទំនើប ដោយផ្តោតលើវារីវប្បកម្ម, បន្តគ្រប់គ្រង ការពារធនធានធម្មជាតិ ប្រកបដោយប្រសិទ្ធភាព និងនិរន្តរភាព តាមរយ:ការជំរុញចុះបញ្ជីដីរដ្ឋ និងការទប់ស្កាត់ និងបង្ក្រាបបទល្មើស, និងបន្តយកចិត្តទុកដាក់ជួយគាំទ្រ និងអន្តរាគមន៍ដោះស្រាយបញ្ហាប្រឈមរបស់កសិករឱ្យកាន់តែមានប្រសិទ្ធភាព។
មុនបញ្ចប់កម្មវិធី ឯកឧត្តមបានផ្តល់ប័ណ្ណសរសើរលើកទឹកចិត្តមន្ត្រីដែលមានស្នាដៃឆ្នើមជាច្រើននាក់ផងដែរ៕
