ព័ត៌មានផ្សេងៗទៀត
កុំសាបរង់ចាំទឹក តែត្រូវធ្វើដីរង់ចាំទឹកវិញ
ចេញផ្សាយ ១៧ មករា ២០១៨ 3601
ការផ្លាស់ប្តូរ ដែលកំពុងតែជំរុញអោយធ្វើឡើងនៅទូទាំងប្រទេសនោះ គឺជាឥរិយាបថបច្ចេកទេស ក្នុងការធ្វើកសិកម្មរបស់កសិករ។ ខណៈអញ្ជើញចុះត្រួតពិនិត្យគ្រោះរាំងស្ងួត ពិនិត្យថ្នាលសំណាប រួមទាំងការដកស្ទូងដោយប្រើពូជស្រាល មិនប្រកាន់រដូវ និងប្រើសំណាបខ្ចីរបស់កសិករនៅ ឃុំនិទាន ស្រុកបសេដ្ឋ នាពេលថ្មីៗនេះ។
ឯកឧត្តមបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានប្រាប់កសិករជាច្រើននាក់ និងមន្ត្រីកសិកម្ម ដែលមានមុខនៅមន្ទីកសិកម្មខេត្តតាកែវ កំពត និងខេត្តកំពង់ឆ្នាំ ដែលមានបទពិសោធន៏ ក្នុងការដោះស្រាយបញ្ហារាំងស្ងួត អំពីអ្វីដែលត្រូវតែផ្លាស់ប្តូចំពោះមុខ ដោយមិនបង្អង់បានតទៅ នៅក្នុងការងារកសិកម្ម ខណៈពេលដែលរដ្ឋាភិបាលកំពុងខិតខំតាមដាន ។
ឯកឧត្តមរដ្ឋមន្ត្រី បានបញ្ជាក់ថា ការផ្លាស់ប្តូរឥរិយាបថ និងបច្ចេកទេស ត្រូវតែជំរុញឲ្យកា្លយជាសកម្មភាពជាក់ស្តែង។ ឯកឧត្តមបន្តថា ភាពរាំងស្ងូត គឺជាក្តីកង្វល់របស់ក្រសួងកសិកម្ម រុក្ខាប្រមាញ់ និងនេសាទ និងរបស់ថ្នាក់ដឹកនាំរដ្ឋាភិបាល ពិសេសសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
ដើម្បីដោះស្រាយបញ្ហាចំពោះមុខ កសិករត្រូវឈប់សាបស្រូវ រង់ចាំទឹក តែត្រូវធ្វើដីរង់ចាំទឹកវិញ ដែលមានន័យថា ធ្វើដីដែលមានអោយហើយស្រេច ពេលមានទឹក គឺត្រូវធ្វើភ្លាម ។ ឈប់ប្រើពូជធ្ងន់ ដោយត្រូវប្រើពូជស្រាល មិនប្រកាន់រដូវជំនួសវិញ ជាមួយនឹងការអនុវត្តន៏នូវ ប.វ.ស ។ ភ្លឺស្រែត្រូវតែលើកអោយបានធំៗ ដើម្បីទប់ទឹកក្នុងស្រែអោយបានគត់មត់ ។ សាបរួមគ្នាដោយរកទីតាំងជិតប្រភពទឹក ងាយជួយសង្គ្រោះពេលជួបបញ្ហារាំងស្ងួត។
ឯកឧត្តម រដ្ឋមន្ត្រី បន្តទៀតថា ចំពោះអ្នកមានទឹកស្ទួងរួចហើយ កុំប្រញាប់ដើរចោលស្រែ ត្រូវឧស្សាហ៍ ចុះស្រែមើលទឹក មើលភ្លឺ សត្វល្អិត និងស្មៅចង្រៃ ព្រោះមិនប្រាកដថា ស្ទូងហើយ បានទទួលផលល្អនៅពេលច្រូតកាត់នោះទេ។ ដរាបណាគ្មានការថែទាំបានល្អ។ មន្ទីកសិកម្មអគ្គនាយកដ្ឋានកសិករ ត្រូវចុះតាមដានតំបន់នោះ អោយបានជាប់ជាប្រចាំ ក្នុងករណីមានការកែប្រែយ៉ាងណានោះ រាយការណ៍ជូនក្រសួងជាបន្ទាន់ ដើម្បីក្រសួងចុះជួយអន្តរាគមន៏ឲ្យទាន់ពេលវេលា ។
នៅទីនោះ ឯកឧត្តម រដ្ឋមន្ត្រី ក៏បានណែនាំផងដែរ ដល់កសិករឲ្យប្តូរសំណាបចាស់ និងជំនួសវិញដោយសំណាបថ្មី ពីព្រោះសំណាបចាស់អស់ពេលធ្វើការលូតលាស់ បើស្ទួងទៅ ក៏មិនបែកគុម្ពដែរ ។ ប៉ុន្តែបើពុំមានជំរើសទេ គឺស្ទូងត្រូវដោយចាប់អោយបានច្រើនដើម។ ដោយសារពេលនេះ គឺជាចុងរដូវដកស្ទួង ។
