ឯកឧត្តមអនុរដ្ឋលេខាធិការ ប៉ែន ផល្លីកា បន្តដឹកនាំក្រុមការងារចម្រុះ ចុះត្រួត​ពិនិត្យ​ស្ថានភាពនេសាទ និងបង្រ្កាបបទល្មើសជលផលនៅស្រុកក្រគរ ខេត្តពោធិ៍សាត់

ចេញ​ផ្សាយ​ ៦ កញ្ញា ២០២៥ 575

នៅថ្ងៃទី៥ ខែកញ្ញា ឆ្នាំ២០២៥ ឯកឧត្តម ប៉ែន ផល្លីកា អនុរដ្ឋលេខាធិការ ក្រសួង​​កសិកម្ម រុក្ខាប្រមាញ់ និងនេសាទតំណាងដ៏ខ្ពង់ខ្ពស់ឯកឧត្តមរដ្ឋមន្ត្រី ឌិត ទីណា បានបន្តដឹកនាំក្រុមការងារជំនាញ ដែលមានលោក ប៉ែន សេរីវុទ្ធី អនុប្រធានការិយាល័យវិវាទកម្ម លោក សេង សុងលី នាយខណ្ឌរដ្ឋបាល​ជលផលពោធិ៍សាត់ស្តីទី និងសហការី លោក លីវ សេងហ៊ីម អភិបាល នៃ​គណៈ​អភិបាលស្រុកក្រគរ កងកម្លាំងយុទ្ធភូមិភាគទី៥ តំបន់ប្រតិបត្តិការសឹករង​ពោធិ៍សាត់ កងរាជអាវុធហត្ថ សរុបចំនួន២៤នាក់ ដោយប្រើប្រាស់កាណូត​ចំនួន​៣គ្រឿង។

ក្នុងប្រតិបត្តិការបង្ក្រាបបទល្មើសនេសាទនោះបាន២ករណី ទី១.នៅចំណុច​ជ្រោយស្តី ភូមិត្រពាំងរំដេញ ដោយបានរុះរើ បំផ្លាញចោលឧបករណ៍​នេសាទ​ខុសច្បាប់នៅនឹងកន្លែង រួមមាន៖ របាំងសាច់អួនក្រឡាញឹកចំនួន ០១របាំង​ប្រវែង ១៥០ម៉ែត្រ, ឡុកសាច់អួនចំនួន១គ្រឿង, លូកងសាច់អួន​ចំនួន​១មាត់, បង្គោលកូនឈើ ចំនួន៣០ដើម និងបានចាក់លែង​កូនត្រីចម្រុះ​ប្រមាណ ១០គីឡូក្រាមចូលបឹងទន្លេសាបវិញ ទី២.នៅចំណុចកំពង់ថ្គោល បានរុះរើបង្គោលឈ្នក់ចំនួន២កន្លែង ស្មើនឹង៣២ដើម។

នាដំណើរបេសកកម្មនោះ ឯកឧត្តម ប៉ែន ផល្លីកា បានសម្តែងការកោត​សរសើរ និងថ្លែងអំណរគុណយ៉ាងជ្រាលជ្រៅ ជូនដល់មន្រ្តី អង្គភាពពាក់ព័ន្ធ​គ្រប់លំដាប់ថ្នាក់ សហគមន៍នេសាទ អាជ្ញាធរមូលដ្ឋាន ជាពិសេសកងកម្លាំង​ចម្រុះនៃកងយោធពលខេមរភូមិន្ទ ដែលបានបំពេញភារកិច្ចយ៉ាង​សកម្មក្នុង​ការបង្រ្កាប ដោយបានកត់សម្គាល់ឃើញថាឧបករណ៍ខុសច្បាប់​មានការថយ​ចុះច្រើន ជាពិសេសរបាំងស្បៃមុង ដែលធ្វើឱ្យកូនត្រីដូចជា៖ ត្រីប្រា ត្រីពោ និងត្រីរៀលជាដើម បានបង្ហាញខ្លួនជាច្រើនគួរឱ្យកត់សម្គាល់ និងប្រជា​នេសាទ​​យល់ដឹងពីការប្រើប្រាស់ឧបករណ៍នារដូវបិទនេសាទ​នេះជាដើម៕