ឯកឧត្តមរដ្ឋលេខាធិការ ហ៊ាន វណ្ណហន អញ្ជើញដឹកនាំក្រុមការងារចុះពិនិត្យការអនុវត្តគម្រោងកែលម្អសន្តិសុខទឹកកម្ពុជា នៅខេត្ដក្រចេះ

ចេញ​ផ្សាយ​ ២៦ មីនា ២០២៦ 764

នារសៀលថ្ងៃទី២៦ ខែមីនា ឆ្នាំ២០២៦ ឯកឧត្តមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោង CaWSIP បានដឹកនាំក្រុមការងារបច្ចេកទេសថ្នាក់ជាតិ និងខេត្ត ចុះសិក្សាស្វែងយល់ពីស្ថានភាពជាក់ស្តែងរបស់ប្រជាកសិករ ក្នុងតំបន់វិសាលភាពនៃប្រព័ន្ធធារាសាស្ត្រកន្ទួត និងស្វាយជ្រុំ ស្ថិតក្នុងស្រុកចិត្របុរី ខេត្តក្រចេះ។
ការចុះពិនិត្យនេះ មានការចូលរួមពីមន្ត្រីអនុវត្តគម្រោងនៃមន្ទីរកសិកម្មខេត្ត មន្ត្រីកសិកម្មឃុំ តំណាងសហគមន៍ និងកសិករទទួលផលសរុបចំនួន២២នាក់ មកពីឃុំកន្ទួត និងឃុំថ្មី។
ក្នុងឱកាសនោះ ឯកឧត្តម បានបញ្ជាក់យ៉ាងច្បាស់ថា បេសកកម្មនេះមានគោលបំណងសំខាន់ គឺដើម្បីពិនិត្យស្វែងរកទីតាំង និងកសិករដែលមានសក្តានុពលខ្ពស់ ក្នុងការទទួលការគាំទ្រពីគម្រោង ជាពិសេសការផ្តល់ផ្ទះសំណាញ់ និងការជំរុញការចងក្រងបង្កើតសហគមន៍កសិកម្មទំនើប។
ឯកឧត្តមបណ្ឌិតបានលើកទឹកចិត្តឱ្យមានការចងក្រងក្រុមផលិត ការបង្កើតលក្ខន្តិកៈ និងការរៀបចំផែនការផលិតកម្ម ផែនការផ្គត់ផ្គង់ទីផ្សារ ដើម្បីធានាឱ្យការផលិតប្រកបដោយនិរន្តរភាពក្នុងរយៈពេលវែង។
ឯកឧត្តមបណ្ឌិតបានបន្ថែមថា លក្ខខណ្ឌជ្រើសរើសសហគមន៍ និងកសិករចូលរួមគម្រោង ផ្តោតសំខាន់លើតម្លាភាពជាចម្បង។ លក្ខខណ្ឌកំណត់សំខាន់ៗ រួមមានសក្ដានុពលនៃទីតាំងភូមិសាស្ត្រ និងជាពិសេសគឺឆន្ទៈពិតប្រាកដ របស់សហគមន៍ និងកសិករក្នុងការចូលរួមអនុវត្តគម្រោងឱ្យទទួលបានជោគជ័យ។
នៅចុងបញ្ចប់ ឯកឧត្តមបណ្ឌិត និងក្រុមការងារ បានចុះពិនិត្យស្ថានភាពទីតាំងជាក់ស្តែង ដើម្បីរៀបចំសាងសង់ផ្ទះសំណាញ់ និងឃ្លាំងប្រមូលផ្តុំកសិផល ក្នុងឃុំថ្មី និងឃុំកន្ទួត ស្រុកចិត្របុរី ខេត្តក្រចេះ ដែលជាតំបន់គោលដៅសំខាន់នៃការអនុវត្តគម្រោង CaWSIP ក្នុងការពង្រឹងសន្តិសុខទឹក និងលើកកម្ពស់ជីវភាពរបស់ប្រជាកសិករនៅតំបន់នោះ៕