ព័ត៌មានផ្សេងៗទៀត
ថ្នាក់ដឹកនាំក្រសួងកសិកម្ម អញ្ជើញដឹកនាំសិក្ខាសាលាផ្សព្វផ្សាយស្តីពី «ការបញ្ជ្រាបយេនឌ័រ និងការលុបបំបាត់ពលកម្មកុមារក្នុងអនុវិស័យជលផល» នៅខេត្តកោះកុង
ចេញផ្សាយ ៤ សីហា ២០២៦ 1787
នៅថ្ងៃទី៣ ខែសីហា ឆ្នាំ២០២៦ ឯកឧត្តម សុខ វិសាល អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ និងជាសមាជិកគណៈកម្មាធិការជាតិប្រឆាំងពលកម្មកុមារ (គ.ជ.ព.ក) បានអញ្ជើញជាអធិបតីភាពក្នុង សិក្ខាសាលាផ្សព្វផ្សាយស្តីពី «ការបញ្ជ្រាបយេនឌ័រ និងការលុបបំបាត់ពលកម្មកុមារក្នុងអនុវិស័យជលផល នៅខេត្តតំបន់ឆ្នេរ» ដែលបានប្រព្រឹត្តទៅនៅវិទ្យាល័យស្រែអំបិល ស្រុកស្រែអំបិល ខេត្តកោះកុង។
សិក្ខាសាលានេះរៀបចំឡើងក្នុងគោលបំណង ដើម្បីបញ្ជ្រាប និងផ្សព្វផ្សាយផែនការយុទ្ធសាស្ត្រស្តីពីសមភាពយេនឌ័រ ព្រមទាំងការលុបបំបាត់ពលកម្មកុមារក្នុងអនុវិស័យជលផល ជូនដល់ភាគីពាក់ព័ន្ធ និងសហគមន៍មូលដ្ឋាន។
អង្គសិក្ខាសាលា បានប្រព្រឹត្តទៅយ៉ាងរលូន ដោយទទួលបានលទ្ធផលសំខាន់ៗ៖ ប្រជានេសាទបានយល់ដឹងបន្ថែមអំពីច្បាប់ និងការទប់ស្កាត់ពលកម្មកុមារ។ តំណាងសហគមន៍នេសាទសន្យាផ្សព្វផ្សាយបន្ត ឱ្យប្រជាពលរដ្ឋប្រុងប្រយ័ត្នចំពោះសកម្មភាពល្មើសច្បាប់នានា។
នៅក្នុងឱកាសនោះផងដែរ ឯកឧត្តម សុខ វិសាល បានថ្លែងអំណរគុណដល់ដៃគូអភិវឌ្ឍន៍ និងបានលើកសំណូមពរដល់តំណាងធនាគារអភិវឌ្ឍន៍អាស៊ី (ADB) ឱ្យបន្តផ្តល់កិច្ចគាំទ្រដល់ការរៀបចំសិក្ខាសាលាផ្សព្វផ្សាយដ៏មានសារៈសំខាន់នេះ ឱ្យបានកាន់តែទូលំទូលាយបន្ថែមទៀត នៅតាមសហគមន៍នេសាទក្នុងខេត្តកោះកុង ក៏ដូចជាបណ្តាខេត្តផ្សេងៗទៀតនៅតាមតំបន់ឆ្នេរសមុទ្រកម្ពុជា៕
