ឯកឧត្តមរដ្ឋលេខាធិការ ចាន់ សុវុឌ្ឍ អញ្ជើញដឹកនាំក្រុមការងារ ជួប​សំណេះសំណាលជាមួយនិស្សិតជ័យលាភីអាហារូបករណ៍រដ្ឋាភិបាលសាធារណរដ្ឋកូរ៉េ និងរាជរដ្ឋាភិបាលជប៉ុន សម្រាប់ការសិក្សា ២០២៤-២០២៥

ចេញ​ផ្សាយ​ ២៤ កក្កដា ២០២៤ 2737

នៅថ្ងៃទី២២ ខែកក្កដា ឆ្នាំ ២០២៤ ឯកឧត្តម ចាន់ សុវុឌ្ឍ រដ្ឋលេខាធិការ​ក្រសួងកសិកម្ម រុក្ខាប្រមាញ់ និងនេសាទ អញ្ជើញជាអធិបតី​ ជួប​សំណេះសំណាលជាមួយនិស្សិតជ័យលាភីអាហារូបករណ៍រដ្ឋាភិបាលសាធារណរដ្ឋកូរ៉េ និងរាជរដ្ឋាភិបាលជប៉ុន សម្រាប់ការសិក្សាឆ្នាំ​២០២៤-២០២៥។ កិច្ចសំណេះសំណាលធ្វើឡើងនៅ​ទីស្តីការ​ក្រសួងកសិកម្ម។

សមាសភាពអញ្ជើញចូលរួមមាន លោកជំទាវ ចាន់ ផលលឿន ឯកឧត្តម សួន សេរី ឯកឧត្តម ជា ឆេង ឯកឧត្តម ឃឹម ហ្វីណង់ អនុរដ្ឋលេខាធិការ​ក្រសួង ឯកឧត្តម ង៉ោ ប៊ុនថាន  សាកលវិទ្យាធិការនៃសកលវិទ្យាល័យ​ភូមិន្ទកសិកម្ម លោក សំ ឆោមសង្ហា អគ្គលេខាធិការរងក្រសួងកសិកម្ម លោក ឈុន តូរី នាយកស្តីទីវិទ្យាស្ថានជាតិកសិកម្មព្រៃលាប លោក ទី ចាន់ណា ប្រធាននាយកដ្ឋានបុគ្គលិក លោក ព្រំ សុមានី ប្រធាន​នាយកដ្ឋាន​សហប្រតិបត្តិការអន្តរជាតិ និងនិស្សិតសរុបចំនួន៣០រូប។

ជំនួបនេះធ្វើឡើងក្នុងគោលបំណង ដើម្បីសុំបទពិសោធន៍ និងអនុ​សាសន៍​ណែនាំ​ផ្តល់ពីថ្នាក់ដឹកនាំពាក់ព័ន្ធនៃក្រសួងកសិកម្ម រុក្ខាប្រមាញ់ និងនេសាទ ជូនដល់ប្អូនៗនិស្សិតជ័យលាភីអាហារូបករណ៍​មុននឹងចេញ​ដំណើរទៅបន្តការសិក្សាទៅប្រទេសកូរ៉េ និងប្រទេសជប៉ុន។

ឯកឧត្តមរដ្ឋលេខាធិការ ចាន់ សុវុឌ្ឍ មានប្រសាសន៍ថា ឱកាសទៅបន្តការសិក្សានៅប្រទេសកូរ៉ និងប្រទេសជប៉ុនរបស់ប្អូនៗនិស្សិត កើតឡើងតាមរយៈការខិតខំប្រឹងប្រែងរបស់​រាជរដ្ឋាភិបាល ​ក្នុងពេលដែលប្រទេសមានសុខសន្តិភាពពេញលេញ។ ឯកឧត្តមបាន​បញ្ជាក់​បន្ថែម​ទៀត​ទៅដល់បេក្ខជន និងបេក្ខនារីជ័យលាភី​ទាំងអស់ ត្រូវចេះក្តាប់ឱកាសសិក្សាស្វែងយល់នូវបទពិសោធថ្មីៗ​បន្ថែមទៀតពីប្រទេសកូរ៉េ និងជប៉ុន ដើម្បីយកមកអភិវឌ្ឍមាតុប្រទេសនៅពេលរៀនចប់៕