ឯកឧត្តមរដ្ឋលេខាធិការ តូច ប៊ុនហួរ អញ្ជើញជាគណៈអធិបតីក្នុង​សិក្ខា​សាលាពិគ្រោះយោបល់ ស្តីពី«ការលើកស្ទួយផលិតកម្មម្រេច​ប្រកបដោយសុវត្ថិភាព និងភាតរភាព» នៅខេត្តត្បូងឃ្មុំ

ចេញ​ផ្សាយ​ ៣០ មិថុនា ២០២៦ 266

នៅថ្ងៃទី៣០ ខែមិថុនា ឆ្នាំ២០២៦ ឯកឧត្តម តូច ប៊ុនហួរ រដ្ឋលេខាធិការ​ក្រសួង​កសិកម្ម រុក្ខាប្រមាញ់ និងនេសាទ បានអញ្ជើញជាគណៈ​អធិបតី​ក្នុងសិក្ខាសាលាពិគ្រោះយោបល់ ស្តីពី «ការលើកស្ទួយផលិត​កម្ម​ម្រេច ប្រកបដោយសុវត្ថិភាព និងភាតរភាព» ដោយមានការ​អញ្ជើញ​ចូលរួមពីឯកឧត្តម សុខ វិសាល អនុរដ្ឋលេខាធិការ លោក​បណ្ឌិត យិន ចាន់សុធី អគ្គនាយករងនៃអគ្គនាយកដ្ឋាន​ក្សេត្រសាស្រ្ត លោកបណ្ឌិត ចាយ ជីម ប្រធាននាយកដ្ឋានកសិឧស្សាហកម្ម លោក ហេង ពិសិដ្ឋ ប្រធានមន្ទីរកសិកម្ម ខេត្តត្បូងឃ្មុំ លោក នុត កញ្ចារ៉ា អនុ​ប្រធាន​មន្ទីរឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍​ខេត្ត​ត្បូងឃ្មុំ លោក Lucas Zahl តំណាងអង្គការGIZ។  កម្មវិធី​សហ​ការ​រៀបចំដោយ មន្ទីរកសិកម្ម ខេត្តត្បូងឃ្មុំ ជាមួយអង្គការGIZ នៃគម្រោង EU-German CAPSAFE ធ្វើឡើងនៅសណ្ឋាគារភីអេនធី​​​​​​ផាលេសក្នុងខេត្តត្បូងឃ្មុំ។
សិក្ខាសាលាពិគ្រោះយោបល់នេះ ធ្វើឡើងក្នុងគោលបំណងដើម្បី ប្រមូល​​នូវបញ្ហាប្រឈមនានា ស្វែងរកដំណោះស្រាយ និងរៀបចំ​ផែន​ការ​សកម្មភាព ឆ្ពោះទៅការកសាងភាពជាដៃគូធុរកិច្ច​ក្នុងវិស័យ​ដំណាំ​ម្រេច។
ថ្លែងក្នុងអង្គសិក្ខាសាលា ឯកឧត្តម តូច ប៊ុនហួរ បានគូសបញ្ជាក់ថា កិច្ច​ពិភាក្សានាពេលនេះ ជាឱកាសមួយដែលសូមយកចិត្តទុកដាក់ ជជែកឱ្យបានផុសផុល ជាពិសេសទៅលើការដាំដុះម្រេចដោយផ្តោត​សំខាន់ទៅលើម្រេចសរីរាង្គ និងសុវត្ថិភាព ដើម្បីធានាបាននូវគុណភាព និងសុវត្ថិភាពដល់អ្នកប្រើប្រាស់ និងការប្រកួតប្រជែងជាមួយ​ទីផ្សារ​ក្នុង និងក្រៅស្រុកផងដែរ។ បន្ថែមពីនេះឯកឧត្តម បានស្នើសុំឱ្យសហ​គមន៍​កសិកម្មទំនើប និងសហគមន៍កសិកម្ម ដែលដាំដុះម្រេច សូម​គិតគូរដល់ការកែច្នៃម្រេច ដើម្បីបន្ថែមតម្លៃលើខ្សែច្រវាក់​ផលិត​កម្ម​ម្រេចផងដែរ៕